நினைவுகள் - சிறுகதை

வேறு வழியில்லை . இவர்கள் எங்கள் காதலை பிரித்துவிடுவார்கள் . அவளைக்கூட்டிக்கொண்டு ஓடுவதைத்தவிர வேறு வழியில்லை . முதலில்  இதை அவளிடம் சொல்லிவிடவேண்டும் என்றவாறு என் போனில் , wife என்று பதிந்திருந்த நம்பருக்கு போன் செய்யலாம் என்று எடுத்தேன் . அச்சமயத்தில் , வேறொரு அழைப்பு வந்துவிட்டது . இவள் வேறு கூப்பிடுகிறாளே ! என்ன செய்யலாம் என்று யோசித்தவாறே போனை என் காதில் பொருத்தினேன் .

‘சொல்லு’

‘நா இன்னைக்கு சிங்கப்பூர் கிளம்பறேன் . நைட் ஃப்ளைட்’

‘ம்’

‘உன்னால வரமுடியுமா ? ப்ளீஸ் பாத்துட்டு போயடறேன் ’

‘தெரியல . பாக்கலாம் . இப்போ கொஞ்சம் வேலையா இருக்கேன் . நா அப்றமா கால் பன்றேன்’

நான் சொல்லநினைத்ததை , சொல்லமுடியாமல் அவள் குரலை மீண்டும் கேட்க திராணியில்லாமல் கட் செய்தேன். இப்போது , உடனே , என் தேவதைக்கு போன் செய்து விஷயத்தைக்கூறினேன் .

‘தங்கம் . இது சரிப்படாது . நா காலைல 6 மணிக்கு உங்க வீட்டு முன்னாடி வந்து, மூனு டைம் ஹார்ன் அடிக்கிறேன் . நீ அப்படியே கிளம்பி வந்துடு . நா , உனக்கு புடவ , எல்லாம் வாங்கி வச்சிட்டேன் .நாளைக்கு சின்னதிருப்பதில கல்யாணம் ’

‘எனக்கு பயமா இருக்குங்க’

‘கவலப்படாத. நா இருக்கேன் . இத விட்டா வேற வழி நமக்கு இல்ல .’

அவள் குரலில் பயம்கலந்த சோகத்தை என்னால்  உணரமுடிந்தது .அவளிடம் பேசி விட்டு என் நண்பர்களையும் அழைத்துப்பேசினேன் . எல்லாம் ஓகே ஆகிவிட்டது . நாளை காலையில் , எனக்கு திருமணம் .

---------------------------------------------------------------------------------------------------------------------

‘டேய் எழுந்திரிடா . அந்த பொண்ணு வந்துடுச்சி’

என்றுகூரிய என் தாயின் முகத்தைப்பார்த்தவாறே அன்றைய தினமும் விழித்தேன் . தினசரி என் தாயின் எழில்முகத்தில் விழிப்பதாலோ என்னவோ, படித்துமுடித்த ஆறுமாதமாய் வேலைக்கு போகாமல் எவ்வித கமிட்மென்டும் இல்லாமல் ஜாலியாக இருக்கிறேன் . படிக்கும்போதே ‘ஆறுவது சினம்’ என்ற ஔவையின் சொல்லுக்கு அடிபணிந்தவன் என்பதால் , அரசியல்வாதியான அப்பாவின் அனல்பொங்கும் கேள்விகளுக்கு ஜஸ்ட் லைக் தட் என்று சென்றுவிடுவேன் . இன்றைய இளைஞர்களுக்கு முக்கிய கடைமையான சிகரெட் புகைத்தலை தவறாமல் செய்துவரும் , குடியைக் கை விட்ட குடிமகன் நான் . மூன்றுமாதங்களுக்கு முன் தாயின் கண்ணீரால் , கைகழுவிய குடியை மட்டும் விட்டிராமல் இருந்தால் , தமிழகத்தை வாழவைக்கும் புண்ணியவான்களுல் இப்போதும் ஒருவனாயிருந்திருப்பேன் . ‘குடி , குடியைக்கெடுக்கும் ‘ . கரெக்ட்தான் . அர்த்தம் தவறாக புரிந்துகொண்ட பலரில் நானும் ஒருவன் . முதலில் வரும் குடி , ‘சரக்கை ’ குறிக்கவில்லை . ‘குடும்பத்தை ‘ தான் குறிக்கிறது என்பது அப்போது தான் புரிந்தது .

-------------------------------------------------------------------------------------------

மனதில் படபடப்பு அதிகரித்தபடி இருந்தது. இன்னும் ஒருநாளில் திருமணம் . காலையில் அவள் என் மனைவியாக போகிறாள் . அவள் கால்களில் மெட்டிப்போட கிழே குனிந்தவன் , இன்னு அவள் காலடியிலேதான் இருக்கிறேன் என்ற என் அண்ணனின் வாசகங்கள் வேறு என்னை பயமுறுத்தியது . ரிசப்சன் என்பதால் , அடிக்கும் வெயிலையும் பொருட்படுத்தாமல் கோட் வாங்கி என் சுதந்திரத்திற்கு கேட் போட்டுவிட்டார்கள் . அருகில் , என் வருங்கால அருமைப்பத்தினியும் முகம் முழுக்க ப்ளீச்சிங் பவுடரும் ரோஸ்பவுடரும் ஒருசேர அப்பியவள் போல் வேர்வை மழையில் நனைந்துகொண்டிருந்தாள் .இரண்டுமணிநேரமாக , ஒவ்வொருவனையும் மேடையில் வரவேற்று எனக்கு கால் வலிக்க ஆரம்பித்தது .ஏற்கனவே ஒரு வருடத்திற்குமுன் காலில் ஒரு சர்ஜரி வேறு.

--------------------------------------------------------------------------------------------------

‘நாம BREAK – UP பண்ணிக்கலாம் மெக்னேஷ் . இனி நமக்கு செட் ஆகாது ‘

‘என்னாச்சு ஷெரின் . ஏன்டி இப்டி பேசுற ?’

‘Don’t call me டீ . okay ? I don’t Want This bullshit anymore ’

“Just Listen to me .What happened to you ? Pls tell me ”

“Nothing . just leave me alone ”

“ஷெரின் . நீ இல்லனா , நான் செத்துடுவேனு உனக்கு தெரியாதா ? நீ இல்லாம நா எப்டிடீ ?”

‘ஓ ! ப்ளாக்மெய்ல் பன்றியா ?’

‘அப்டி இல்லடா . நா உண்மைய தான் சொல்றேன் . நாம எதுக்காக பிரியனும் ? நா என்ன தப்பு செஞ்சேன் ? ’

‘முதல்ல என்ன புரிஞ்சிக்கோ ! இந்த 2 yearsல , நமக்குள்ள சண்ட தான் அதிகம் . உன்னால என் சந்தோஷமெல்லாம் போய்டுச்சி . அத பன்னாத , இத பன்னாத , அங்க போகாத , இங்க போகாத , அவன்கிட்ட பேசாத , Facebook ல ஆன்லைன் வராத , வெளிய போகாத  , சினிமா பாக்கதனு நீ போட்ட ஒவ்வொரு கன்டிசனும் என்ன எவ்ளோ கஷ்டமாக்குச்சுனு தெரியுமா ? ஆனா அவ்ளவையும் உனக்காக நா செஞ்சேன் . ஆனா நீ , உங்கம்மா இருக்காங்க , அவங்கமுன்னாடி பேசமுடியாது , அம்மா கூப்டறாங்க அப்டி இப்டினு சொல்லி என்ன எவ்ளோ avoid பண்ணமுடியுமோ , அவ்ளோ அவாய்ட் பண்ண .உங்கிட்ட ஒரு சின்ன விஷயம்கூட Share பண்ணமுடியல . லாஸ்ட் 2 மன்த்ஸ்ல , நாம பேசுனது வெறும் 8 நிமிஷம்தான் . உன்ன நினச்சி தினந்தினம் நா அழுததுதான் மிச்சம் . இதுல after marriage, என்ன , என் பேரன்ட்ஸ விட்டு பிரிஞ்சிவேற வர சொல்ற . என்னால இதெல்லாம் முடியாது. நா தெளிவா யோசிச்சுதா சொல்றேன் . Let’s Breakup .என்ன , ரெண்டுபேரும் one weak அழுவோம் . அப்றம் நார்மலா இருக்கப்போறோம் . தினமும் அழுதுட்டே இருக்கறதவிட இது எவ்ளோ பெட்டர் . So , Don’t try to call me ever and Ever . Take Care . Good Bye ’

------------------------------------------------------------------

இன்றைய காலைப்பொழுது , என்னால் என் தாயின் முகத்தில் எழமுடியவில்லை. வீட்டில் அனைவரும் உறங்கிக்கொண்டிருந்தார்கள் . ஏற்கனவே , என் நண்பர்களிடம் பேசியபடி , வீட்டின்வெளியே வந்து போன் செய்தேன் .அந்த அதிகாலை நேரத்தில் , எங்கள் ஊரில் இன்னும் யாரும் விழிக்கவில்லை . அவள் கண்டிப்பாக என்னுடன் வந்துவிடுவாள் . காலையில் , கோவிலில் திருமணத்தை முடித்துக்கொண்டு , என் கேரள நண்பனின் வீட்டிற்கு சென்றுவிடவேண்டும் . பின் , ஒருவாரம் கழித்து வீட்டிற்கு வந்து பெற்றவர்களின் காலில் விழுந்துவிடவேண்டும் . என்ன ஆனாலும் , அவளின் தந்தை , மண்திட்டு மண்டையன் காலில் மாத்திரம் மட்டும் விழவே கூடாது என்று முடிவெடுத்துவிட்டேன் . என் நண்பன் , ஏற்கனவே பேசியபடி பைக்கில் நிற்க , அவனிடமிருந்து பைக்கை வாங்க நான் ஓட்டிக்கொண்டு சென்றேன் .

-----------------------------------------------------

“டேய் எழுந்திரிடா . அந்த பொண்ணு வந்துடுச்சி .”

வேகமாக எழுந்து வீட்டின் வாயிற்படிக்கு வந்தேன். எதிரிலிருக்கும் ரோட்டில் , அவளின் காலேஜ் பஸ்ஸிற்காக காத்திருந்தாள் .மொட்டு அரும்பி , மலராய் மலர்ந்த மல்லிகைப்போல் , பொலிவுடன் காணப்பட்டாள் . வேகவ்வேகமாய் ப்ரஷ் செய்து முகத்தைக்கழுவி , தலையை சிவி , சிறிய அலங்காரம் செய்து , அவளுக்கு என் சிங்கார முகத்தைக்காட்டும்பொருட்டு , வாசலுக்கு வந்தேன் . சரியாய் டீ-யுடன் என் தாயும் வர வாங்கி , அருந்தியபடியே அவளை ரசிக்க ஆரம்பித்தேன் . இன்னும் 25 நிமிடம் உள்ளது ; அவளை அழைத்துச்செல்லும் கல்லூரிப்பேருந்துவர . இன்னும் 10 நிமிடத்தில் அவளின் கல்லூரித்தோழிகள் அவளைச்சுற்றிலும் காணப்படுவார்கள் . இதுதான் தக்க சமயம் . இவளை சந்தித்து , ஒருவாரம் ஆகிவிட்டது .கல்லூரி முதலாமாண்டு சேர்ந்திருக்கிறாள் போல . பார்த்த முதல் பார்வையிலே , பல வார்த்தைகளை கண்களை உதடுகளாக்கி என்னிடம் பேசினாள் . அவளின் கண்வனப்பிற்காகவே அவளை மணம் செய்துகொள்ள மனம் ஏங்கியது .இப்போதுகூட என்னைப்பார்ரத்தவாறு அவள் கண்கள் எனும் உதடுகள் பேசும் வார்த்தைகளை , எனது கண்கள் எனும் காதுகள் கவ்விக்கொள்ள முயர்ச்சித்து தோல்வியைத்தழுவிக்கொண்டிருந்தது . இன்று எப்படியும் அவளிடம் பேசியாக வேண்டும் .அதற்கு முன்னேற்பாடாக , அவளின் பின்னாலிருக்கும் என் சித்தப்பாவின் கடையில் வைத்து என் சித்தியிடம் உதவி கோரியாயிற்று .

-----------------------------------------------------------

‘Good Bye ’ என்ற ஷெரின் சொல்லிய கடைசி வார்த்தையின் சக்தியை அக்கணமே உணர்ந்தேன் .அவ்வார்த்தை என் காதுகளில் கடப்பாறையை இறக்கியதுபோன்றதொரு வலியை  ஏற்படுத்த , அதை என் மனதால் உணர்ந்தேன் . அவள் போன் கட் செய்துவிட்டாள் . உலகின் அனைத்து உயிரினங்களும் கண்டங்களின் மோதலினால் மீண்டும் அழிந்து போனதுபோலும் , நான் ஒருவன் மாத்திரமே , அநாதையாக தவிப்பது போலவும் இருந்தது .முதல் காதல்வலி , என் நெஞ்சைப்பிளந்து மனம் முழுத ஆக்கிரமித்து , உடலை நடுநடுங்க வைத்தது . எப்படியாயினும் அவள் திரும்ப போன் பண்ண மாட்டாளா என்ற என் அசட்டுத்தனம் , மனம் முழுக்கப்பரவ , அந்நம்பிக்கையிலே வாழ ஆரம்பித்தேன் .

----------------------------------------------------------------------

எப்படியோ , ரிஷப்சன் முடிந்தாயிற்று . கட்டிலில் அமரும் போது அத்தனை வலி .மெல்ல தூங்கலாம் என்றால் , இன்னும் 4 மணிநேரத்தில் கல்யாணம் . என் நண்பர்கள் அனைவரும் மிலிட்டரி ரம்மின் முன் தோற்று வாந்தியெடுத்து ஒரு அறையில் படுத்திருந்தார்கள் .என் தந்தை , நாளை திருமண சமையலில் , எப்படி இருக்கவேண்டும் என்று விளக்குவதற்காக சமையலறையில் குடிகொள்ள , என் தாயோ பகல் முழுவதும் ஓடியாடி செய்த வேலையின் களைப்பில் உறங்கச்சென்றுவிட்டாள் . மெல்ல கண்களை மூடி , கனவுகளுக்கு மனதை வார்த்தேன் .

-------------------------------------

அதிகாலை குளிரை உணரமுடியாத நிலையில் நானிருக்க , என் நண்பனோ , குளிரின் தாக்கத்தில் நடுங்கிக்கொண்டிருப்பது எனக்கு தெரிந்தது . இன்னும் 5 நிமிடத்தில் , கார் வைத்திருக்கும் பிரவீன் வீட்டிற்கு சென்று , அங்கிருந்து 4 நண்பர்களுடன் அவள் வீட்டிற்கு செல்லவேண்டும் .மீதமுள்ளவர்கள் , நேராக கோயிலுக்கு சென்றுவிடவேண்டும் என்பது ப்ளான் . அவளுக்கா நான் எடுத்ததிருந்த Skyblue கலர் பட்டு சீலை , என்கையில் இருந்த பையினுள் கிடந்தது .

-----------------------------------------------

டீ டம்ளரை வைத்த கையோடு எதிர்ரோட்டில் இருக்கும் என் சித்தியின் கடைக்கு சென்றேன் .என் தாயிற்கு , நான் இவளை சைட் அடிப்பது உட்பட எல்லாம் தெரியும் .இப்போது கூட நான் அவளிடம் பேசப்போகிறேன் என்பதும் தெரிந்துதான் வைத்திருப்பாள் . இதோ அவளருகில் நெருங்க நெருங்க , எங்கோ மறைந்திருந்த பயமும் என் மனதை நோக்கி நெருங்க ஆரம்பித்தது . எங்கள் வீட்டை சுற்றியும் , என் அங்காளிப்பங்காளிகளின் வீடுகள் ஆக்கிரமித்துள்ளதால் , அவளை நேருக்குநேர் பார்த்துபேசமுடியாது . என்னதான் அவள் எனக்கு மாமன் மகள் என்றாலும் அவளின் குடும்பத்திற்கும் , எங்களின் குடும்பத்திற்கும் அந்தளவு பழக்கமில்லை . நேராக கடைக்கு சென்றேன் . சித்தப்பா காலையில் இருக்கமாட்டார் என்பதும் எனக்குத்தெரியும் . என் சித்தியை நோக்கி ,

‘சித்தி . அவகிட்ட பேசுங்க .ப்ளீஸ் ’

‘இருடா . எனக்கு பயமாயிருக்கு ’

‘அய்யோ. ஏந்தா இப்டி இருக்கிங்ளோ. போய் பேராச்சும் கேளுங்க சித்தி ’ என்று சொல்லி முடிக்கும் முன்னரே , கண்களால் என்னை விழுங்கும் என் ஒருவார கனவு தேவதை என் அருகில் நின்றிருந்தாள் .

          ------------------------------------------------------------------------------------------

ஷெரின் கூறியதும் உண்மைதான் .அவளை காதலித்த 2 ஆண்டுகளில் , நான் போடாத கன்டிஷன்களை விரல்விட்டு எண்ணிவிடலாம் .ஆனால் , அந்த கன்டிஷன்கள் எதற்கு என்று அவள் புரிந்துகொள்ளாதது என்னுள் வருத்ததை அதிகரித்தது.  நான்குடியிருந்த வீட்டின் எதிர்வீட்டின் உறவினருக்கு , ஷெரின் குடும்பம் ஒருவகையில் தூரத்து சொந்தம் . சிங்கப்பூரில் இருக்கும் ஷெரின் , ஒருமுறை வந்திருந்தபோது , ஏற்பட்ட பழக்கம் காதல் கரையில் முடிந்தது .அந்நாட்டில் , எல்லோரும் சாதாரணமாக பழகுவது , கிராமத்தானான , என் மரமண்டையில் விளங்காததால் , அவளுக்கு போட ஆரம்பித்த கன்டிசன்கள் அதிகரிக்க ,எங்களுக்குள் இருந்த காதல் குறைந்துவிட்டது . சிறுசிறு சண்டைகள் வளர்ந்து பூதாகரமாகி , இப்போது உடைந்த கண்ணாடிபோல் , சிதறிவிட்டது .

                      ---------------------------------------------------------

‘தம்பி . கலெக்டர் ராம்குமார் வந்திருக்காரு . அவர அழச்சிகிட்டு வா .’ நேராக மணமகன் அறையில் சிறிய மேக்கப் போட்டுக்கொண்டிருந்த நான் , வேகமாக சென்று அவரை வரவேற்று , முதல் வரிசையில் அமரவைத்தேன் . .ஒரு தாசில்தாரின் திருமணத்திற்கு , கலெக்டர் வருவது இயல்புதானே . பின் , சிறிதுநேரத்தில் மணமேடையில் அமர்ந்தேன் . இன்னும் 1மணிநேரத்தில் முகூர்த்தம் . மணம் ஆகப்போகின்றது .இருமணம் , திருமணம் எனும் பந்தத்தில் ஒருமணமாக போகுறது .

                            ---------------------------------------------

 காரை கிளப்பியாயிற்று . மற்றவர்கள் , பைக்கை எடுத்துக்கொண்டு , முன்னே கோவிலுக்கு சென்றனர் . இன்னும் 6 மணியாக ஒருமணிநேரமுள்ளது . ஆனால் , அவளின் வீட்டை அடைய 20 நிமிடங்களே போதும் . என்ன செய்யலாம் என்று யோசித்தேன் . பின் ஒருவாறு முடிவெடுத்து , அவளுக்கு ஒரு sms தட்டிவிட்டேன் . அவள் பார்ப்பாலா , என்கின்ற என் சந்தேகத்தை உடைத்தெறியும் வண்ணம் , இன்னும் அவள் தூங்கவேயில்லை என்பதை எனக்கு தெரிவிக்கும் பொருட்டு , உடனே ok என்று மெசேஜ் செய்திருந்தாள் . ஒருவருட காதலாயிற்றே .

                           ---------------------------------------------------------

‘அக்கா ! A4 SHEET இருக்கா ?’

‘எத்தன வேணும்மா ?’

‘4 தாங்க ’

‘இரும்மா . உள்ள இருக்கு . எடுத்து தரேன் .’

‘சரிக்கா ’

என்னை அவள் மீண்டும் பார்க்க , சமாளிக்கமுடியாமல் தவித்த எனக்குள் ஒரு குருட்டுத்தைரியம் வர ,

‘நீங்க ராஜா மாம பொண்ணு தான ?’

‘ஆமாங்க’

‘உங்க பேரு’

‘ரூபா’

‘என்ன படிக்கிறிங்க ?’

“B.Sc Maths’

‘இந்தாம்மா ! 2 ரூ ஆச்சு’

‘இந்தாங்கக்கா .’

ரூபா , A4 பேப்பரை வாங்கிவிட்டு ,மெல்ல என்னப்பார்த்து புன்னகைத்தவாறே கிளம்பினாள் .தூரத்தில் ,அவளின் தோழி வருவது தெரிந்தது .

                          -------------------------------------------------

இரண்டுமாதங்கள் ஆகிவிட்டது .ஷெரின் இன்னும் போன்செய்யவில்லை .என் பிறந்தநாளான இன்று கூட அவளுக்கு போன் செய்ய மனம் வரவில்லை . வேறுவழியில்லை .அவளுக்கு செய்த சத்தியத்தை தகர்ந்தெறிந்துவிட்டு குடிக்க ஆரம்பித்தேன் . இனி ஆறுமாதங்கள் தினமும் என்னுடன் வரப்போகின்றது இந்த குடிப்பழக்கம் என்பது தெரியாமலே குடிக்க ஆரம்பித்தேன் .

              -----------------------------------------------------------------------------

‘கட்டிமேளம் கட்டிமேளம்’ என்ற ஐயரின் குரல் என்காதினுள் ஒலிக்க , தாலியை எடுத்து , அவளின் கழுத்தை நோக்கி என் கை சென்றது.  சுற்றி இருப்பவர்களை ஒருமுறை பார்த்தேன் . ஏற்கனவே மணமான ஆண்களின் முகத்தில் ‘அச்சோ பாவம் இந்த பையன் ’ என்ற ஏளனச்சிரிப்பும் , மணமாகத ஆண்களின் முகத்தில் ‘சே ! செம ஃபிகரு. இன்னைக்கு நைட்டு செமையா என்ஜாய் பண்ணப்போறான்’ என்ற பொறாமையும் இருப்பதை அறிந்தேன் . என்னுள்ளோ ,26 ஆண்டு பேச்சிலர்   வாழ்கை இன்றோடு முடியப்போகின்றது என்ற வருத்தமும் , மணவாழ்க்கை ஆரம்பிக்கப்போகின்றது என்ற சந்தோஷமும் பரவ முதல்முடிச்சைப்போட்டேன் .

                 ------------------------------------------------------------

காரை எடுத்துக்கொண்டு கிளம்பினோம் . இன்னும் சிறிது தூரம்தான் . அந்த வளைவில் என்னவோ பெரிதாக தெரிகின்றதே ! என்னவாயிருக்கும் என்று யோசிக்கும் வேளையில் ‘படார்’ என்ற சத்தமும் , காரினுள் ‘அய்யோ’ என்ற சத்தமும் வர ஆரம்பித்தது . என்ன நடந்திருக்கும் என்று யோசிப்பதற்குள் , என் சுயநினைவை இழக்க ஆரம்பித்தேன் .

                             ------------------------------------------------

‘சொல்லு ரூபா’

‘நாம லவ் பன்ற விஷயம் எங்கப்பாவுக்கு தெரிஞ்சிடுச்சி மெகு .’

‘என்னடி சொல்ற ? எப்டி தெரிஞ்சது ?’

அவள் சில விஷயங்களை கூறினாள் . அத்துடன் , அவளுக்கு திருமண ஏற்பாடு நடக்கப்போவதாகவும் கூறினாள் .

‘சரி இரு. நா வீட்டுல பேசிட்டு , உனக்கு திருப்பி கால் பன்றேன் ’

எங்கள் வீட்டில் மெல்ல பேசினேன் .முதலில் மறுத்த என் தந்தை பின் ஒப்புக்கொண்டு அவர்கள் வீட்டில் பேச சென்றார் . அப்போது என் செல்போன் சிணுங்க ,

‘ஹலோ’

‘நா ஷெரின் பேசுறேன்’

‘ம்’

‘எப்டி இருக்கடா ?’

‘நல்ல இருக்கேன் ஷெரின் . என்ன திடீர்னு ?’

‘நா சென்னை வந்துருக்கேன் . உன்னப்பாக்கனும்போல இருக்கு . இங்கதான் மாமா வீட்டுல இருக்கேன் . உன்னால வரமுடியாம ?’

‘இல்ல . நா சேலத்துல இருக்கேன்’

‘ஓ . அப்றம் ?’

‘எதுவுமில்ல’

‘இந்த 3 வருஷமா உனக்கு நா ரொம்ப கஷ்டத்த கொடுத்துட்டேன் தான ? I Am Extreamly Sorry டா . எனக்கு உன்ன உடனே பாக்கனும்போல இருக்கு .ப்ளீஸ் வாடா’

‘ம். நா கொஞ்சம் வேலையா இருக்கேன் . திருப்பிக்கூப்டறேன்’

அவள் அழுகையை பொறுட்படுத்தாமல் என் போனை கட் செய்தேன் . 3 வருஷமா இல்லாத அக்கறை இப்போ எதுக்கு இவளுக்கு என்று கண்டமேனிக்கு அவளை மனதினுள் திட்டிக்கொண்டிருந்தேன் . இருந்தாலும்பாவம் , அவளிடம் ஒருவார்த்தை என்னவென்று கேட்டிருக்கலாம் . மனது ஒருவிதமாய் தவிக்க ஆரம்பித்தது . அதோ என் பெற்றோர் , ரூபா வீட்டிற்கு சென்று திரும்பியுள்ளார்கள் .ஜாதகம் அனைத்தும் வாங்கிவந்துவிட்டார்கள் .மீண்டும் ஷெரினிடம் இருந்துபோன் .

‘I love you So much da . I am Extreamly Sorry for that .Pls Don’t Ignore me’

எனக்கு அவளிடம் என்ன சொல்வதென்றே தெரியாமல் அவள் போனை கட் செய்தேன் .இன்னும் அறைமணிநேரம் அவளுடன் பேசினால் ,அவளை மணம் கூட செய்துவிடுவேன் . என்ன செய்வதென்று தெரியவில்லை . என் முதல்காதலை புதுப்பிக்க நினைத்தால் , ரூபா ஒருபுறம் கண்ணீரும் கம்பலையுமாய் காட்சியளித்துக்கொண்டிருக்கிறாள் . ஆம் , எனக்கு ரூபா தான் , பொருத்தமானவள் .இன்னொருமுறை ஷெரின் போன் செய்தால் , அவளிடம் அதைக்கூறியாகவிட வேண்டும் .

                  ---------------------------------------------------------------------

 ‘என்னங்க ! மாப்ள ஒருமாதிரி சொன்டி சொன்டி நடக்குறாரு ?’

‘அது ஒன்னுமில்லைங்க சகல .ஒருவருஷத்துக்குமுன்னாடி ஒரு சின்ன கார் ஆக்ஸிடன்ட் . அதுனால தான் ’

‘சரி சரி .மாப்ள என்ன படிச்சிருக்காரு ’

‘என்ஜினியரிங் . சென்னைல முடிச்சிருக்காரு ’

என் மாமனாரும் , இன்னொரு ஆளும் பேசுவது தெளிவாக கேட்டது . கல்யாணம் முடிந்துவிட்டது . வீட்டிற்கும் வந்தாயிற்று . முகூர்த்த நேரத்தின்போது வரமுடியாமல் சென்றவர்கள் , ஒவ்வொருவராக வந்து வாழ்த்திச்சென்றனர் .

‘தம்பி . நம்ம எம் .எல் . ஏ பாலகணேஷ் வந்திருக்காப்ல . ’ என்ற என் தந்தையின் குரல்கேட்டு ,என் நண்பர்களின் கூட்டத்திலிருந்து என்னை விடுவித்துக்கொண்டு அவரை பார்க்கச்சென்றேன் .

                   ----------------------------------------------------------------

‘அம்மா . என்னம்மா ஆச்சு ? ’

‘ராஜா . ஜாதகம் பொருந்தலடா . உனக்கும் அந்தபொண்ணுக்கும் சுத்தமா சரிவரல . வெறும் மூனு பொருத்தம்தா இருக்கு . அதுனால ….’

எனக்கு சுர்ரென்று தலையில் ஏறியது . எவ்வளவு நேரம் மன்றாடினாலும் , எங்கள் குடும்பத்தின் பதில் , அவளை திருமணம் செய்தால் , ஒன்று ரூபா இறந்துவிடுவாள் , இல்லையேல் நான் இறந்துவிடுவேன் .

அவளுடன் வாழாமல் இருப்பதற்கு  பதில் , வாழ்ந்துவிட்டு இறக்கலாம் என்ற முடிவு எப்படி என்னுள் வந்தது என்று தெரியவில்லை . உடனே , என் நண்பர்களுடன் கலந்தாலோசித்து, அவளுடன் ஓடிச்சென்று திருமணம் செய்வதுதான் ஒரே வழி என்று முடிவெடுத்தேன் . இப்போது அவளுக்கு உடனே போன் செய்து இதை தெரிவிக்கவேண்டும் என்ற எண்ணத்தில் என் போனில் , wife என்று பதிந்திருந்த நம்பருக்கு போன் செய்யலாம் என்று எடுத்தேன் . அந்நேரம் , ஷெரினிடம் இருந்து போன் .

                                -------------------------------

அவரை பார்த்து அவரின் வாழ்த்தை பெற்றேன் . என்னதானாயினும் அவர் எனக்கு வேலை வாங்கி கொடுத்தவராயிற்றே .

‘எங்கப்பா பொண்ணு ?’

‘இருங்க சார் .உள்ள இருக்காங்க . கூட்டிட்டு வரேன்’

நேராக உள்ளே சென்று என் மனைவியை அழைத்தேன் .

‘பூஜா . எம்.எல்.ஏ வந்திருக்காரு .’

                      --------------------------------------------------------

என்னால் நம்பவே முடியவில்லை .நான் அடிபட்டு கிடந்த இருபது நாட்களுல் , ரூபாவின் அப்பா , இன்னொருவனுக்கு அவளை மணமுடித்து கொடுத்துவிட்டானாம் . என்ன செய்வதென்றே புரியவில்லை . வாழ்வது எவ்வளவு கொடுமை என்பது , அப்போதுதான் எனக்கு புரிந்தது . இதைக்காட்டிலும் நான் சாவதே மேல் .எதற்கு சாகவேண்டும் , இன்னொருவனை கல்யாணம் செய்த அவளே வாழும்போது நாம் எதற்கு சாகவேண்டும் ? என்றுபலவாறான எண்ணச்சிக்கல்களுக்கிடையே மாட்டித்தவித்தேன் . இவ்வாறகவே 3 மாதம் சென்றது . பின் ஒரு எம்.எல் . ஏ உதவியுடன் , எவனுக்கோ லஞ்சம் கொடுத்து , என் தந்தை அரசுவேலையை வாங்கிக்கொடுத்தார் . வேலைக்கு செல்ல செல்ல , நினைவுகள் மறைய ஆரம்பித்தது . ஷெரினிடம் உண்மையை சொல்லியாயிற்று. அதிலிருந்து , அவள் கடந்த இருமாதங்களாக போன் செய்வதையே நிறுத்தியிருந்தாள் . மனதில் இருந்த காயங்கள் , வலியை மறந்த வடுக்களாய் தங்க , அவ்வடுக்களை பார்க்கும்போது ஏற்படும் நினைவுகள் அவ்வப்போது குறுக்கிட்டாலும் , வலியற்ற அவை , என்னை எதுவும் செய்யாமல் செல்ல ஆரம்பித்தன .