Friday, 24 April 2015

AVENGERS 2 – சினிமா விமர்சனம்






AGE OF ULTRON

இப்படத்தின் இயக்குநர் ஜோஸ் வேட்டன் மீது சென்ற வாரம் ஒரு புகார் எழுந்தது . அதாவது தலைவர்  2012-ல் எழுதிய CABIN IN THE WOODS எனும் பேய்த்திரைப்படம் , தன்னுடைய கதையைத் திருடித்தான் எழுதப்பட்டது என ஒருவர் வழக்குத்தொடுத்திருந்தார் . என்னடா இது என்று அதிர்ந்து நின்றேன் . பின்ன ! தலைவர் யாரு ? 2012 –ல் உலகையே கலக்கிய அவெஞ்சர்ஸ் முதல் பாகத்தை எழுதி, இயக்கிவர் . அப்பேர்பட்டவர்மேல் அபாண்டமாக பழிசுமத்துகிறார்களே என்று பொங்கி எழுந்தேன் . அதெல்லாம் எவ்வளவு பெரிய தவறு என்று இன்றுதான் புரிந்துகொண்டேன் . உண்மையாகவே இவர் கதையைத்திருடியிருப்பாரோ என்று சந்தேகப்படுமளவுக்கு என்னை வதக்கியெடுத்து விட்டார் . அதற்குமுன் ஒரு சிறுகுறிப்பு . இது என்னுடைய பார்வையில் எழுதும் பதிவு . இப்பதிவில் வந்து ‘யோவ் ! நீ சீட்டுக்கு அடியில படுத்துகினு படம்பாரு யா . இது ஒரு அற்புதமான காவியம் ’ என்றெல்லாம் கமெண்ட வேண்டாம் . அப்படி கமெண்ட ஆசையிருந்தால் என்னுடைய நம்பருக்கு டிக்கட் சார்ஜ் 70 + பார்க்கிங் டோக்கன் 10 + பெட்ரோல் சார்ஜ் 30 என மொத்தம் 110 ரூபாய்க்கு ரிசார்ஜ் செய்துவிட்டு , பின் கமெண்டலாம் .

பொதுவாக சூப்பர்ஹீரோ திரைப்படங்களில் லாஜிக் என்ற வார்த்தையை கபாலத்திலிருந்து கழட்டிவைத்துவிட்டுத்தான் பார்க்கவேண்டும் . இத்திரைப்படத்தைப் பார்க்கவேண்டுமெனில் கபாலத்தையே கழட்டிவைத்துவிட்டு வேண்டுமானால் ட்ரைசெய்யலாம் . கொஞ்சம்கூட கூச்சமே படாமல் அவெஞ்சரின் முதல்பாகத்தில் என்னசெய்தார்களோ , அதே கருமாந்திரத்தை இதிலும் செய்துவைத்துள்ளார்கள் . முதல்பாதியானது பூமர் சூயிங்கத்தைவிட சொய்ங்சொய்ங் எனில் இரண்டாம்பாதி அனுமன் வாலைவிட இழுஇழுஇழுவென இழுத்துக்கொண்டே போகிறது . அதாகப்பட்டது முதல்பாகத்தில் முதல்பாதியானது இழுவை என்பதை எப்பேர்பட்ட அவெஞ்சர் ரசிகனும் ஒப்புக்கொள்வான் . ஆனால் அந்த இழுவையின் பிண்ணனியில் ஒரு மெல்லிய த்ரில்லர் வகையறா கதை இருக்கும் . நாமும் ஏதாவது நடக்கும் நடக்கும் என எதிர்பார்ப்போம் . இத்தனைக்கும் முதல்பாகம் வருவதற்குமுன் வெளிவந்த அவெஞ்சரின் மற்றைய படங்களான கேப்டன் அமெரிக்கா , அயர்ன்மேன், தோர் , ஹல்க் போன்ற படங்களோட முதல்பாகம் எவ்விதத்திலும் சம்பந்தப்பட்டிருக்காது  (Exept thor & captain america). ஆனாலும் நம்மை ஒருவகையாக ஆசுவாசப்படுத்தி இரண்டாம்பாதியின்  கடைசி அரைமணிநேரம் நம்மை யோசிக்கவிடாமல் ஏதேதோ செய்து நம்மை வசியப்படுத்தியிருப்பார்கள் . ஆனால் இப்படமோ , மற்ற அவெஞ்சரின் அனைத்துப்பாகங்களிலும் சம்பந்தப்பட்டு இருக்கிறது . எடுத்துக்காட்டாக கேப்டன் அமெரிக்காவின் தி வின்டர் சோல்ஜர் திரைப்படத்தில் நிக் ஃப்யூரியின் உண்மை முகம் . தாரின் இரண்டாம் பாகத்தில் தப்பிய லோகியின் மீதி . ஆனால் சம்பந்தமே இல்லாமல் ஆர்ட்டிஃபிஷியல் இன்டெலிஜென்ஸை எடுத்து , தனக்கு துளிகூட இன்டெலிஜென்ஸ் இல்லை என்பதை நிருபித்திருக்கிறார் இயக்குநர் ஜாஸ் .

மார்வல் நிறுவனம் எப்படித்தான் இப்படியொரு உப்புசப்பையற்ற திரைக்கதையை ஏற்றுக்கொண்டு திரைப்படத்தை இயக்க வாய்ப்பு வழங்கியதோ தெரியவில்லை . உலகின் ஆற்றல்மிக்க ஹீரோக்களை வைத்து நொன்டி விளையாட்டு விளையாடிருக்கிறார்களோ என்ற எண்ணம்தான் வருகிறது . இது வின்டர் சோல்ஜர் போல் த்ரில்லர் – ட்ராமாவிலும் வராமல் , அயர்ன்மேன் போல் பக்கா கமர்ஷியலாகவும் வராமல் , தோர் போல் என்டர்டெய்ன்ட்மென்டாகவும் வராமல் எல்லாவற்றையும் குழப்பி பஞ்சாமிர்தமாகவும் எடுக்காமல் வாந்தியாக்கிருக்கிறார்கள் . சரி , கிராபிக்ஸ் குப்பை என்றாலும் , கொடுத்த காசுக்கு ஏற்ற கிராபிக்ஸாவது இருக்கும் என்று எதிர்பார்த்தால் அதுவுமில்லை . பொதுவாக இருட்டாக எடுக்கப்படும் காட்சிகளில் செலவு குறைவாக , எளிமையாக கிராபிக்சை இயக்கிவிடலாம் . அந்த கருமத்தை ஏற்கனவே அவெஞ்சர்ஸின் முதல்பாகத்திலேயே  செய்திருப்பார்கள் . இப்படத்தின் செலவைக்குறைக இவர்கள் செய்த காரியம் அதுதான் . படம் முழுக்க இருட்டு தான் . சில காட்சிகள் வெளிச்சத்தில் எடுக்கப்பட்டிருந்தாலும் அதுவும் ஒருவித பழுப்பு வண்ண நிறத்தில் படமாக்கி கண்ணுக்கு சூட்டினை ஏற்றிவிட்டார்கள் . அதனாலோ என்னவோ , ஒரு கருமாந்திரமும் பெரிதாக தெரியவில்லை . இதற்குமுன் வந்த அவெஞ்சரின் மற்ற படங்களின் கிராபிக்ஸ் காட்சிகள் பகலில் எடுத்திருப்பார்கள் .  நல்ல தெளிவான HD யில் பார்ப்பது போன்றதொரு உணர்வினைத்தரும் . ஆனால் இப்படமோ தியேட்டர்க்குள்ளேயே திருட்டுவிசிடியில் பார்த்தது போலிருந்தது .  சில இடங்களில் கிராபிக்ஸ் நன்றாக இருந்தும் இந்த கேவலமான DI யினால் பெரிதாக தெரியவில்லை .  

இந்த ஆர்ட்டிஃபிஷியல் இன்டலிஜென்ஸ் பற்றி குப்ரிக்கிலிருந்து ஸ்பில்பெர்க் , நோலன் என இக்கால இயக்குநர்கள் வரை கையான்டுள்ளார்கள் . ஆனால் முட்டாள்தனமாக கையான்டவர்களில் முதலாமானவர் இப்படத்தின் இயக்குநராகத்தான் இருப்பார் . இவ்வளவு அடிமுட்டாள்தனமான வில்லனை நான் தெலுங்குபடங்களில் கூட பார்த்தது இல்லை . அதுவும் சுயமாக யோசிக்கும் ஒரு மெஷின் , இப்படி கொஞ்சம்கூட யோசிக்கத்தெரியாத அளவிற்கு இருக்குமென்று நான் நினைத்துக்கூட பார்க்கவில்லை . மனிதனின் 4 % மூளை வேலைசெய்தாலே பட்டையைக்கிளப்பி விடுவான் . அப்படி இருக்கும்போது அதைக்காட்டிலும் அட்வான்ஸ்டாக இருக்கும் ஒரு  AI ரோபோ , படுகேவலமாக யோசிப்பதற்குபதில், தமிழ் சினிமாவில் துரைசிங்கத்திடம் அடிவாங்கிய பாகிஸ்தான் தீவிரவாதியையே வில்லனாக போட்டிருக்கலாம் . இது என்னவோ கவிதையெல்லாம் பாடிக்கொண்டு ‘நான் உலகை மாற்றுகிறேன்’ என மொக்கைப்போடுகிறது .

முதலில் சூப்பர்ஹீரோக்களின் டெபினிஷன் என்ன ? எங்கேயிருந்தாவது வில்லன் கிளம்பினால் அவனைப்போட்டுத்தள்ளிவிட்டு பூமியைக்காப்பாற்றுவது தானே ? ஆனால் இந்த அவெஞ்சர்ஸ் இருக்கானுங்களே ! வில்லனாக முதல்காட்சியில் வந்து பரிதாபமாக இறப்பவனே செய்திருந்தால் கூட இந்த ரோபாட் வில்லனை உருவாக்கியிருக்கமாட்டான் . ஆனால் அவனிடமிருந்து உலகைக்காக்கிறேன் எனக்கூறிவிட்டு , ச்சும்மா இருந்த ரோபோவிற்கு சக்திகொடுக்கிறேன் என்று இவர்களே அந்த வில்லன் ரோபாட்டையும் உருவாக்கிவிட்டு , குத்துதே குடையுதே என்று ஒரு ஊரையே நாசமாக்கிவிட்டார்கள் . கடைசியில் நாங்கள் தான் உலகை காப்பாற்றியவர்கள் என்று பெருமைப்பீற்றிக்கொள்கிறார்கள் . இதேபோல் தான் முதல் பாகத்திலும் செய்திருப்பார்கள் என்றாலும் வில்லன் தானாக வலிய வந்து சிக்குவான் . ஆனால் இப்படத்திலோ , இவர்களே உருவாக்கிவிட்டு கதறுவார்கள் . நான் அப்போதே நினைத்தேன் . அந்த AGE OF ULTRAN , AGE OF EXTINCTION என வரும்படங்களெல்லாம் நம் பொறுமையை சோதித்துவிடும் என்று . ஆனால் இன்று தான் தெளிவாக உணர்ந்தேன் . இனிமேல் எக்காரணம் கொண்டும் AGE என்று ஸ்டார்ட் ஆகும் படத்திற்கு போகவே கூடாது .

சரி , செம காண்டாகி முதல்ல கதைய சொல்லுடா ! அப்றம் மொக்கையா ? நல்லா இருக்கானு நாங்க பாத்துக்கறோம்னு நீங்க திட்றது கேக்குது . ஏற்கனவே கேப்டன் அமெரிக்காவின் முதல்பாகத்தில் மிச்சம்மீதி தப்பியிருந்த ஹைட்ராவின் ஆட்கள் , லோகியின் சின்ன கல்லை (I think its tesaract) ஏதோ பரிசோதனை செய்கிறார்கள் . அதை அழிக்கவரும் அவெஞ்சர்களிடம் அந்தக்கல் கிடைக்கறது . மாட்டு சாணத்தையே எடுத்து நோண்டிப்பார்க்கும் ஸ்டார்க் , அந்த கல்லைச்சும்மா விடுவாரா ? அதை நோண்டி கடைசியில் அதிலிருந்து AI யை உருவாக்க முடியும்  ( ARTIFICIAL INTELLIGENCE பற்றி மேலும் அறிய விரும்புபவர்கள் இங்கே க்ளிக்கவும் ) என்பதனை கண்டறிகிறார் . அதன்படியே செய்து அதை உருவாக்கியும் விடுகிறார் . அதன்பெயர்தான் அல்ட்ரான் . அந்த அல்ட்ரானானது உலகைக்காப்பாற்ற உருவாக்கப்பட்டது . ஆனால் அது உண்மையாக உலகம் நன்கு வாழவேண்டுமெனில் அதனை மாற்றம் செய்யவேண்டும் என்று முடிவெடுக்கிறது . அதன்படி அவெஞ்சர்ஸ்தான் உலகின் மிகப்பெரும் ஆபத்தாக இருக்கிறார்கள் என்று நினைத்து அவர்களைப்போட்டுத்தள்ள முடிவெடுக்கிறது . அதேநேரம் உலகம் மீண்டும் அழிந்தால்தான் சமநிலையாகும் என்றும் நினைக்கிறது . இங்கு இன்னொரு விஷயம் என்னவெனில் ஹைட்ராவின் ஆட்கள் ஒரு அண்ணன் – தங்கைக்கு விஷேச சக்தி கிடைக்க வழிசெய்திருக்கிறது . அதன்படி பீட்ரோ என்பவனுக்கு DAYS OF FUTURE-ஐப்போல் மிகவேகமாக செயல்படும் சக்தியும் அவன் தங்கையான வான்டேவுக்கு ஹிப்னாடிசம் எனும் சக்தியும் கிடைக்கிறது . இவர்கள் இருவரும் டோனி ஸ்டார்க் மீது கடுமையான கோவத்தில் இருப்பதால் அவெஞ்சர்சை எதிர்க்கிறார்கள் . இந்நேரத்தில் புதிதாக உருவான அல்ட்ரான் இவர்கள் இருவரையும் வைத்து அவெஞ்சர்ஸுக்கு கண்ணாமூச்சி காட்டுகிறது. ஒருகட்டத்தில் மனித திசுக்களை வைத்து உண்மையாகவே ஒரு AI-யை உருவாக்குகிறது . அது உருவானால் பேரழிவாக இருக்கும் என்பதால் அவெஞ்சர்ஸ் இறங்குகிறார்கள் . அதேநேரம் பீட்ரோவும் வான்டேவும்  அல்ட்ரானின் உண்மை குணத்தை அறிந்து அவெஞ்சர்ஸுடன் கூட்டணி சேருகிறார்கள் . அதன்பின் அந்த மனித AI அவெஞ்சர்ஸிடம் வருகிறது . அதை ஸ்டார்க் நல்ல AIயாக மாற்றுகிறார் . அதேநேரம் ஒரு நகரையே பிழந்தெடுத்துக்கொண்டு அல்ட்ரான் செல்லுகிறது . அதை பூமியில் மீண்டும் மோதவிட்டு பேரழிவை ஏற்படுத்தி உலகை அழிக்கமுயற்சிக்கிறது . அதை இவர்கள் எப்படி முறியடிக்கிறார்கள் என்பதே கிளைமாக்ஸ்.

இந்த அல்ட்ரான் கான்செப்ட் அப்படியே எந்திரனை நியாபகப்படுத்துகிறது . ஓ சாரி ! I ROBOT-ஐ நியாபகப்படுத்துகிறது . பீட்ரோவின் சக்தி DAYS OF FUTURE ஐயும் கிளைமேக்ஸ் நகர இடம்பெயர்வு முதல்பாகத்தையும் , கேப்டன் அமெரிக்காவின் இரண்டாம் பாகத்தையும் நினைவிற்கு கொண்டுவருகிறது . இந்த அல்ட்ரான் கேரக்டர் 1968 – ல் வெளிவந்த காமிக்சைக்கொண்டு வடிவமைத்திருந்ததாலோ என்னவோ , அதேகாலகட்டத்திலிருந்த மூளைத்திறனையே பயன்படுத்தியிருக்கிறார்கள் . படம்பார்க்கும்போது ஆடியன்சுக்கு ‘இது என்ன ? அது எப்படி ?’ என்று டவுட் வரவேண்டும் . ஆனால் இங்கோ அவெஞ்சர்களே அப்படி சந்தேகப்பட்டு கேட்டுக்கொண்டிருக்கிறார்களே தவிர , நமக்கு வெறுப்பு தான் வருகிறது . அப்படியே விளக்குவதும் புரியும்படி விளக்கினால் தேவலாம் . ஒருவேளை தமிழில் சரியானபடி மேட்டரை டப் செய்யவில்லையோ என்னவோ !  படத்தின்முடிவைப்பார்க்கும்போது இப்பாகம் வேண்டுமென்றே மொக்கையாக எடுக்கவேண்டும் என்று கங்கணம் கட்டி எடுத்திருப்பார்கள் என்ற எண்ணம்தான் தோன்றுகிறது . 300 படத்தின் இரண்டாம்பாகம் கூட மூன்றாம் பாகத்தின் ஹைப்பை அதிகரிக்கவேண்டுமென்ற நோக்கத்தில் எடுக்கப்பட்டிருந்தாலும் அதில் ஒருமுறை பார்க்கும் வண்ணம் எடுத்திருப்பார்கள் . ஆனால் இங்கோ ‘டேய் ! நீ எப்படி கொட்டாவி விடாம பாக்கறனு நானும் பாக்கறேன்டா’ என்ற சபதத்துடன் எடுத்துள்ளார்கள் .

படத்தின் ஆறுதலாக நான் நினைப்பது முதல் இருபது நிமிட காட்சிகள் ,கடைசி 10 நிமிட காட்சிகள் மற்றும் ஆங்காங்கே வரும் ஹூயுமரான வசனங்கள் . கமர்ஷியலாக ஆடியன்ஸிடம் ஹைப்பை ஏற்றவேண்டும் என்று ஏதேதோ பெரும்பிரயத்தனம் செய்திருக்கிறார்கள் . ஆனால் நாம் தூங்கியபின் ஹைப் ஏற்றி என்ன பிரயோஜனம் ? நன்றாக இருந்தாலும் நம்மால் ரசி்ககமுடியாமல் போய்விடுகிறது . இசை , ஒளிப்பதிவு பற்றியெல்லாம் நான் கவனிக்கவில்லை . அசுவாரஸ்யமான திரைக்கதை , அதைப்பற்றி யோசிக்கவே விடவில்லை . தியேட்டரைவிட்டு வெளியேறுவது எப்போது என்ற ஆவல்தான் மிகுந்திருந்தது . எடிட்டரை நினைத்தால்தான் பாவமாக இருக்கிறது . ஏதோ ஒன்றிரண்டு காட்சிகளைத்தவிர மற்றவற்றையெல்லாம் படக் , படக்கென்று கட் செய்துவிட்டார் . தேவையில்லாத காட்சிகளை எல்லாம் அப்படியே ஓடவிட்டுவிட்டார் . சரி , அந்த காட்சிகளை கட் செய்தால் மிஞ்சுவது முக்கால்மணிநேரத்திரைப்படம் என்பதால்தான் அதை கட் செய்யாமல் விட்டுவிட்டார் என நினைக்கிறேன் . இந்த DI , VISUAL EFFECTS, CGI போன்ற துறைகளுக்கு சரியான சம்பளம் தரவில்லை என்று நினைக்கிறேன் . 3D யும் சுமார் ரகம் தான் .


மொத்தத்தில் , ரொம்ப எதிர்பார்த்து மட்டும் போய்விடாதீர்கள் . அப்புறம் என்னைப்போலவே புலம்பிக்கொண்டிருக்கவேண்டும் . எந்தவிதமான எதிர்பார்ப்போ , அவெஞ்சரின் மற்ற பாகங்களை பார்க்காமல் இருந்தாலோ இந்த திரைப்படத்தை தாரளமாக பார்க்கலாம் . கான்செப்ட் என்றபெயரில் செம குழப்பு குழப்புவார்கள் . அதைத்தெரிந்து்கொண்டாலும் ஒன்றும் பிரயோஜனமில்லை .   படுசுமார்ர ரகமாகத்தான் படம் இருக்கிறது . நான் வின்டர் சோல்ஜர் பார்த்த பாதிப்பில் சென்றதால் பெருத்த ஏமாற்றமாகிவிட்டது . அதனால் கொஞ்சம் ஓவராகவே எழுதிவிட்டேன் . அடுத்த இரு சீக்வலும் வின்டர் சோல்ஜரின் இயக்குநர்கள் இயக்குவதால் அதை நம்பலாம் .  இத்திரைப்படம் அவெஞ்சர் ரசிகர்களுக்கு பெருத்த ஏமாற்றம்தான் . என் நண்பர்களுல் பலர் அவெஞ்சரின் சீரியஸ் ரசிகர்கள் . எனக்கு மட்டும் தான் இந்தஃபீலிங்கோ என்று அவர்களிடமும் கருத்தைக்கேட்டேன் . அவர்களே படம் படு DISSAPPOINTMENT என்றுதான் தெரிவித்தார்கள் . இனி உங்கள் இஷ்டம் .

Wednesday, 22 April 2015

THE DEPARTED – ஒரு பார்வை



ஒருசில படங்களைப்பார்க்கும் போது நம்மை அப்படியே கட்டி இழுத்துக்கொண்டு செல்வார்கள் . ஆனால் நாம் அசந்த நேரம் பார்த்து அப்படியே நம்மை நிலைகுலையவைக்கும் விதமாக ஒரு முடிவினைத் தருவார்கள் . நம்மால் அதன் தாக்கத்திலிருந்து தப்பிக்கவே முடியாது . எப்படிச்சொல்லலாம் என்றால் நாம் காதலிக்கும் பெண் நம் காதலை ஏற்றுக்கொள்ளாமல் போகும்போது , அவளுடைய அழகான தோழி நம்மைக்காதலிப்பதாக  சொன்னால் நமக்கு எப்படியிருக்கும்நம் காதலியையும் மறக்கமுடியாமல் , வழிய வந்தவளையும் விட்டுவிடமுடியாமல் ஒருவித பதற்றநிலைக்குத்தள்ளப்படுவோமே ! அம்மாதிரியான நிலைக்குத் தள்ளிவிடுவார்கள் . ROAD TO PERDITION திரைப்படம் பார்க்கும்போது , எல்லாப்பிரச்சனையையும் டாம் ஹேங்ஸ்  சால்வ் செய்துவிட்டு , கடைசியில் தன் மகனுடன் அமைதியான வாழ்க்கையை வாழ முற்படுவார் . நாமும்அப்பாடி ! எப்படியோ ஹீரோ தப்பிச்சிட்டாரு . இனிமேலாச்சும் சந்தோஷமா இருக்கட்டும்னுமனதினுள் வாழ்த்துவோம் . நாம் வாழ்த்தி முடிப்பதற்குள் உள்ளே ஒரு கொலைகாரன் புகுந்து டாம்ஹேங்சைப்போட்டுத் தள்ளிவிடுவான் . நமக்கு ஒருநிமிடம் என்ன நடந்தது என்பதே புரியாது . ‘என்ன ! சிவாஜி செத்துட்டாரா ?’ என்பதுபோல் நம் முகம் தானாக ரியாக்சனைக்காட்டும் . இதேபோல் ஆரண்யகாண்டம் கிளைமேக்சினையும் குறிப்பிடலாம்எப்படியோ ஜாக்கியிடம் இருந்து ரவியும் அவன் அப்பாவிக் காதலியும் தப்பிவிட்டார்கள் என நினைக்கும்போதுபட்டென்று ரவியைப்போட்டு விட்டு அந்த பெண் எஸ்ஸாகிவிடுவாள் . நாம் எதிர்பார்க்காத ஒன்று அங்கு நடக்கும் . அடுத்த காட்சியே அவள் ரோட்டினை கிராஸ் செய்யும்போது லாரி ஒன்று மிகவேகமாக அவளை மோதவருவது போல் காட்டியிருப்பார்கள் . அவளை அடித்துச் சாகடிக்கப்போகிறது என்று நாம் நம்பும்போது அங்கேயும் நம் எதிர்பார்ப்பை அப்படியே நொறுக்கிவிட்டு அவள் பிழைத்துவிட்டாள் என்பதுபோல் காட்டியிருப்பார்கள் . அதாவது நாம் எதிர்பார்ப்பது நடக்காமல் போய்விடுகிறது . நாமோ அதை ஏற்றுக்கொள்ளவும் முடியாமல் , மறக்கவும் முடியாமல் தவித்துக்கொண்டிருப்போம் . இதுதான் ஒரு திரைப்படம் , வாசகனிடம் ஏற்படுத்தும் தாக்கங்களில் முதன்மையானது.

தமிழில் கறுப்பு ஆடு என்று நமக்குள் ஒளிந்திருக்கும் துரோகிகளை குறிப்பிடவோம் அல்லவா ? அதேபோல் அமெரிக்காவில் RAT என்று துரோகிகளைக்குறிப்பிடுவார்கள் . அப்படிப்பட்ட துரோகிகளை மையமாக வைத்து படம் எடுத்து பெரும்புகழ் அடைந்த இயக்குநர் ஸ்கார்சேசேயின் அட்டகாசமான திரைப்படம் தான் தி டாபார்ட்டட் . ஸ்கார்சேசேக்கென்று ஒரு அதிர்ஷ்டம் உள்ளது . அவரின் பெரும்பாலான ஹிட் படங்கள் எல்லாம் மாஃபியா சம்பந்தமானது தான் . அதேபோல் மாஃபியா மற்றும் இரு கறுப்பு ஆடுகளை வைத்து பட்டாசு கிளப்பியிருக்கும் திரைப்படம்தான் இது .

படத்தின் கதை என்னவென்றால் நம் கமலின் காக்கிச்சட்டை போன்றதுதான் . ஆனால் அது கிடையாது . மாஃபியா தலைவனான ஃப்ரான்சிஸ் காஸ்டெல்லாவைப் (ஜாக் நிக்கல்சன்) பிடிக்க முயலும் போலிஸ் அதிகாரிகளான டிக்னமும் குயினைனும் ஒரு அன்டர்கவர் காப்பை (லியானர்டோ டீ காப்ரியோ) அனுப்பி வைக்கிறார்கள் .  அதேநேரம் காஸ்டெல்லாவோ போலிஸில் ஒருவனைச்சேர்த்துவிட்டு (மேட் டாமன்) அங்கு உளவுபார்க்கவிடுகிறான் . இப்போது என்ன பிரச்சனை என்றால் டிக்னம் மற்றும் குயினைனுக்கு போலிஸிலேயே யாரோ உளவு பார்ப்பது தெரிகிறது . அதேநேரம் காஸ்டெல்லாவுக்கும் தன் கும்பலில் யாரோ உளவு பார்க்கிறார்கள் என்று தெரிகிறது . அந்த கறுப்பு ஆடு யார் ? என இருபுறமும் தேட ஆரம்பிக்கிறார்கள் . அதைத்தொடர்ந்து நடக்கும் சம்பவங்களே இத்திரைப்படம். உலகில் நல்லது , கெட்டது இரண்டும் நிலவியிருக்கிறது . நாம் எப்போதும் நல்லதே ஜெயிக்கும் என்றுதான் கூறிவருகிறோம் . ஆனால்  நல்லதுதான் ஜெயிக்கிறதா ? நல்லவனுக்கு எல்லா உதவியும் கிடைக்கிறதா ? இதுதான் படத்தின் மேஜர் கரு .









I don't wanna be a product of my environment.
I want my environment to be a product of me.

என்றவாறு தல ஜாக் நிக்கல்சன் அறிமுகமாகும் காட்சியில் அப்படியே உடல் சிலிர்க்கும் . அவரின் இன்ட்ரோ காட்சியானது படத்தைப்பார்த்தபின் மீண்டும் பார்க்கும்போது விசிலடிக்க வைக்கும் ரகம் . அசால்டாக ஒரு ஜோடியை சுட்டுவிட்டு “JEEZ ! SHE FEL FUNNY” என்று கமென்ட் அடிக்கும்போது , அந்த கொலைக்கூட ஜாலியான விஷயமாகத்தெரியும் . என்னைப்பொறுத்த வரை வன்முறை அழகியல் மற்றும் டார்க் ஹூயூமரை மிகச்சாதாரணமாக அதேநேரம் ரசிக்கும்படி படைக்கும் திறமை ஸ்கார்சேசேக்கு மட்டுமே உண்டு. ஒரு காட்சியில் காப்ரியோ பாரில் அமர்ந்துகொண்டு க்ரான்பெர்ரி ஜூஸ் ஆர்டர் செய்வார் . அப்போது அருகிலிருப்பவன் ‘WHAT ? R U GOT PERIOD ?’ என கலாய்க்க , அவனை காப்ரியோ நாலு சாத்து , சாத்துவார் . அப்போது ஒரு பெருசு உள்ளே புகுந்து தடுக்கும் . வில்லனின் அல்லக்கைகளில் முக்கிய கையான அந்த பெருசின் பேச்சினைக்கேட்டு காப்ரியோ அமைதியாகிவிடுவார் . அடிபட்டவனிடம் அந்த பெருசு சென்றுவிடு . நம்ம பையன் தான்என்று சொல்ல , அவனோஎன்று சலிப்படைந்து இழுத்துக்கொண்டு சொல்லுவான் .  ‘என்னடா னு இழுக்கற என்று அந்த பெருசும் நாலு சாத்து சாத்துவார் . இதுமட்டுமின்றி படத்தின் இடையில் வரும் சீனர்களிடம் பிஸ்னஸ் பேசும் காட்சிகள் திக் திக் ரகம் . ஒருபுறம் காப்ரியோ போலிஸிடம் போட்டுக்கொடுக்க இன்னொருபுறம் போலிசிலிருக்கும் மேட் டாமன் ஜாக்கிடம் போட்டுக்கொடுக்க என இருபுறமும் நடக்கும் தில்லுமுல்லு வேலைகளும் அதைத்தொடர்ந்து ஜாக் நிக்கல்சன் அவர்களைத் தப்பிக்கவிடுவதும் அட்டகாசம் .

இப்படத்தின் திரைக்கதை என்பது எந்தளவிற்கு கட்டக்கோப்பானது என்பதை படத்தைப்பார்க்கும்போது தெரிந்துகொள்ளலாம் . மேலோட்டமாக பார்க்கும்போது லீனியராக பயணிப்பதுபோல் தெரிந்தாலும் ஹீரோயின் சம்பந்தமான காட்சிகள்  நான்-லீனியரிலேயே நகர்கிறது . மேட் டேமன் வீட்டிற்கு ஹீரோயின் வருவது போல் முதலிலேயே காட்டிவிடுவார்கள் . ஆனால் சிறிதுநேரம் கழித்து அவள் தன் சொந்தவீட்டில் காப்ரியோவுடன் பேசிக்கொண்டிருக்கும்போது நாளை தன் பாய்பிரெண்ட் வீட்டிற்கே குடிபெயர்வதாக சொல்வாள் . அதேபோல் கவுன்சிலிங் காட்சிகளும் முதலிலேயே வந்துவிட்டு , பின் எதற்காக காப்ரியோ கவுன்சிலிங் வருகிறார் என சிறிதுநேரம் கழித்து காட்டுவார்கள் . ஒருவிஷயம் நடந்துகொண்டிருக்கும்போது  வெளிப்படும் வசனங்களை மட்டும் ஓடவிட்டு அதனுடன் சம்பந்தப்படாத சில விஷயங்களை விஷுவலாக காட்டிவிட்டு பின் வசனம் முடியும் தருவாயில் அனைத்தையும் சம்பந்தப்படுத்தும் மெத்தேடில் படம்பிடித்திருப்பது அட்டகாசம் . ஆரம்பக்காட்சியை அப்படியே எடுத்துக்காட்டாக சொல்லலாம் . இதில் இம்மிப்பிசகினாலும் அப்படியே குழப்பிவிடும் என்றாலும் இயக்குநர் ஸ்கார்சேசே ஆச்சே ! அதேபோல் படத்தின் வசனம் அட்ட்காசமானதொரு சிறப்பு . படத்தின் பெரும்பலமே அதுதான் .

Fu*king rats.
It's wearing me thin. என்று காஸ்டெல்லோ சொல்லுமிடத்தில் அவரின் சகாவான ஃப்ரெஞ்ச்
Francis, it's a nation of fu*king rats.
என்று சொல்லுவார் . இதேபோல் பல இடங்களில் வசனம் கைத்தட்டலை பெறவைத்துவிடும் . எத்தனைமுறை பார்த்தாலும் இத்திரைப்படம் சலிக்காமல் இருப்பதற்கு ஸ்கார்சேசேயின் இயக்கத்திற்கு அடுத்து கட்டுப்பாடான திரைக்கதை , வசனம் மற்றும் இசை ஆகிய மூன்றும்தான் காரணம் .


GOOD FELLAS திரைப்படத்தைப்பற்றி எழுதியபோது ஸ்கார்சேசே தன் திரைப்படத்தில் அற்புதமாக இசையைப் பயன்படுத்துவதைப்பற்றி எழுதியிருந்தேன் . இப்படத்திலோ அவர் ஒருபடி மேலே சென்றிருக்கிறார் எனலாம் . இசையையும் ரசிக்கவைத்து , அதை படத்துடன் சரியானபடிஒன்றவைக்கும் திறமை இன்றைய இயக்குநர்களிடம் கூட இல்லை . நோலன் கூட ஹன்ஸ் ஜிம்மரின் புண்ணியத்தால் தான் பிழைத்துக்கொண்டிருக்கிறார் . இன்டர்ஸ்டெல்லர் , ரைசஸ் தவிர்த்து அவருடைய முந்தைய படங்களில் ஜிம்மரின் இசை கலைகட்டியிருந்தாலும் அது ஏனோ படத்தில் பெரிய தாக்கத்தினை ஏற்படுத்தவில்லை என்றே தோன்றும் . க்வென்டின் படங்களில் பிண்ணனி இசை பிரமாதமாக இருந்தாலும் படத்துடன் அது ஒன்றிவருகிறதா என்று கவனித்துப்பார்த்தால் நான் சொல்லாமலே  உங்களுக்குத்தானாக புரியும்  . அர்வ்னாஸ்கி மாத்திரமே இவ்விஷயத்தில் ஸ்கார்சேசே போன்றே இசையை பயன்படுத்துகிறார் . அவரைத்தவிர்த்து மற்ற இளம்இயக்குநர்களெல்லாம் இசையை படத்தின் ஒரு அங்கமாகவே நினைக்கிறார்களே தவிர படத்தின் உயிர்ப்பாக நினைக்கவில்லை . தமிழில் செல்வா தன் படங்களில் அட்டகாசமாக இசையைப் பயன்படுத்தியிருப்பார் . ஷங்கர் , கௌதம் போன்ற பெருந்தலைகள் எல்லாம் இன்னும் பிண்ணனி இசையை சரியாக பயன்படுத்தவில்லையோ என்றுதான் நினைக்கத்தோன்றுகிறது . இப்படத்தில்  "I'm Shipping Up to Boston"  தீம் வரும்போதெல்லாம் தானாக உடல் சிலிர்க்கும் . அதுவும் இரண்டு மேஜரான காட்சிகளில் . அதேபோல் "The Departed Tango" "Sail On, Sailor" ஆகிய தீம்களும் அட்டகாசமாக இருக்கும் . படம்பார்த்துவிட்டு தனியாக டவுன்லோட் செய்து கேட்டுப்பாருங்கள் .

படத்தில் வில்லியம் காஸ்டிகன் கேரக்டர் இவ்வாறாக இருக்கும் . அவன் வாழ்ந்தது ஒரு மோசமான சூழலில் . அவன் குடும்பம் மொத்தம் கிரிமினல்கள் . ஆனால் அவனோ சிறுவயதிலிருந்தே நல்லவனாக வளர்ந்தவன் . போலிசாகவேண்டும் என்பது அவனுடைய ஆசை . ஆனால் அது நடக்காமல் போகிறது . அவனுடைய  ஆசை நிறைவேற வேண்டும் என்பதற்காக போலிஸ் உளவாளியாக பணியாற்றுகிறார் . அதுவும் எங்கே ? மிகப்பெரும் ஆபத்தான படுபயங்கர குற்றவாளியான நிக்கல்சனிடம் . பில்லியின் காதல் உண்மையாக இருந்தாலும் அதுவும் நிறைவேறாமலே போகிறது . என்னதான் அவன் போலிஸ் உளவாளியாக இருந்தாலும் அவனுக்கு எந்தவிதமான OFFICIAL சப்போர்ட்டும் கிடையாது , அதை அவன் நினைத்தாலும் பெறமுடியாது . அவனுடைய உயிர்க்கும் யாரும் உத்திரவாதம் கிடையாது .

சுல்லிவனோ அப்படியில்லை . அவன் குடும்பத்தில் இருப்பவர்கள் நல்லவர்கள் . அவன் நேசித்தவேலைக்கு அவன் செல்லவில்லை . தாய் , தந்தையை சிறுவயதிலே இழந்து பணம் பிடித்துப்போக நிக்கல்சனிடம் இணைந்துகொள்கிறான் . அவன் எதிர்பார்க்காத விஷயங்கள் எல்லாம் நடக்கிறது . போலிசில் இணைந்தவனுக்கு உடனே ப்ரமோஷன் கிடைக்கிறது . அப்படியே முன்னேறி கடைசியில் டிக்சனின் இடத்திற்கே வந்துவிடுகிறான் . கிளைமேக்ஸின்போது கிட்டத்தட்ட ஒரு பெரிய போலிஸ் அதிகாரியாக மாறிவிடுகிறான் . இத்தனைக்கும் அவன் அவ்வளவு திறமையானவன் கிடையாது . அதை அவனுடைய அதிர்ஷ்டம் என்று சொல்லலாம் . காதலியும் அவனுக்கு உடனே கிடைத்துவிடுவாள் . படம் முடியும்போது ஒரு எலி ஓடும் . அந்த எலியைப்பார்த்ததும் உங்கள் மனதில் என்ன தோன்றுகிறது ? யாரின் உருவம் உடனே அதை நியாபகப்படுத்துகிறது என்று யோசித்துப்பாருங்கள் . அவர்தான் இப்படத்தில் பர்ஃபெக்ட் RAT .

ப்ரான்சிஸ் காஸ்டெல்லோ  - ஒரு மாஃபியாத்தலைவன் . இவ்வுலகில் எதுவாக இருந்தாலும் நாம்தான் அதை எடுத்துக்கொள்ள வேண்டும் என்று வாழ்பவன் . யாராக இருந்தாலும் அசால்டாக போட்டுத்தள்ளிவிட்டு சிரித்துக்கொண்டிருப்பான் . ஆனால் ஒன்றைக் கவனிக்கவேண்டும் . காஸ்டெல்லாவும் கிட்டத்தட்ட ஒரு கறுப்பு ஆடு தான் . அவன் தன்னுடன் வேலைசெய்யும் ஆட்களை FBI-யிடம் அவ்வப்போது கோர்த்துவிடுவான் .  அவனுடைய சகா  ஃப்ரெஞ்ச் என்கிற அர்னால்ட் அவரின் படுபயங்கர விசுவாசி . தன் மனைவியால் காஸ்டெல்லாக்கு பிரச்சனை வரலாம் என்றெண்ணி கட்டிய மனைவியையே போட்டுத்தள்ளிவிடுவார் .


டிக்னம் மற்றும் குயினைன் பாத்திரங்களைப் பார்த்தால் இருவரும் நேர்மையானவர்கள் .  டிக்னம் உடனுக்குடன் உணர்ச்சிவசப்படக்கூடியவர் . ஆனால் குயினைன் தன் வயதுக்கேற்றார்போல் பொறுப்புடன் இருப்பவர் . டிக்னம் , குயினைன் இறந்தபோது உணர்ச்சிவசப்பட்டதால் தான் அவருக்கு சஸ்பென்ட் கிடைக்கிறது . அந்நேரத்தில் அவர் சஸ்பெண்ட் ஆகாமல் இருந்திருந்தால் படத்தின் முடிவு வேறுமாதிரியிருந்திருக்கும் .  

ஃப்ரான்சிஸ் காஸ்டெல்லோவாக தல ஜாக் நிக்கல்சன் . வில்லியம் காஸ்டிகன் ஜூனியராக லியனார்டோ டீ காப்ரியோ . சுல்லிவனாக மாட் டேமன் . டிக்னமாக மார்க் வாஹ்ல்பர்க் . குயினன் ஆக மார்ட்டின் ஷீன் . ஸ்கார்சேசேயின் ஆஸ்தான திரைக்கதை ஆசிரியர் வில்லியம் மனோகன் திரைக்கதை எழுத , ஏறத்தாழ 30 ஆண்டுகளாக ஸ்கார்சேசேயின் படங்களுக்கு எடிட்டாராக இருக்கும் தெல்மாவின் எடிட்டிங்கில் , ஹோவர்ட் ஷோர்ரின் இசையில்  ப்ராட் பிட் தயாரிப்பில் INFERNAL AFFAIRS எனும் சீனப்படத்தின் மூலக்கதையைத் தழுவி ரீமேக் செய்யப்பட்ட இத்திரைப்படம் வெளிவந்த ஆண்டு 2006 .


நடிப்பைத்தொழிலாக பார்க்கும் நடிகர்கள் மத்தியில் நடிப்பை உயிராக நினைப்பவராகத்தான் லியானர்டோ டீ காப்ரியோ இருக்கிறார் . தன் மொத்தக்குடும்பத்தையும் வைத்து கிழிகிழியென கிழித்துத்தொங்கப்போடும் இடத்தில் , அவருக்கு வரும் கோவத்தை காட்டமுடியாமல் வெறுப்பில் முகம் வெளிரிப்போவதும் , அதைத்தொடர்ந்து போலிஸ் ஆகமுடியாது என்று அவர்கள் சொல்லும்போது மனிதர் நடிப்பின் உச்சத்தைத்தொட்டிருகிறார் . குயினனைச்சந்திக்கும்போது தாங்கள் எதிரிகளால் சூழப்பட்டிருப்பதை உணர்ந்து அங்கிருந்து காப்ரியோ தப்பித்து வரும்வேளையில் திடுமென குயினைன் உடல் மேலிருந்து காப்ரியோ முன் விழும் காட்சியில் காப்ரியோவின் ரியாக்சன்லாம் சான்ஸே இல்ல ரகம் . தன் மன அழுத்தத்தைக் குறைப்பதற்காக டாக்டராக இருக்கும் ஹீரோயினிடம் செல்லும் காப்ரியோ , அவளுக்கு கவுன்சிலிங் கொடுத்து அவளையே கரெக்ட் செய்யுமிடமெல்லாம் ரசனையான காட்சிகள் . GANGS OF NEWYORK , THE AVIATOR ஆகிய படங்களைத்தொடர்ந்து காப்ரியோ , ஸ்கார்சேசேயுடன் இணைந்த மூன்றாவது திரைப்படம் . இத்திரைப்படத்திற்காக பாஸ்டன் நகர மக்களிடம் சென்று அவர்களுடன் பழகி , அவர்களைப்பற்றி சிறிய ஆராய்ச்சியே செய்து தன் கேரக்டரை மேன்மேலும் செதுக்கியிருக்கிறார் காப்ரியோ .  இதன்பின் காப்ரியோ SHUTTER ISLAND , WOLF OF THE WALL STREET என இரு படங்களில் ஸ்கார்சேசேயுடன் இணைந்து பணிபுரிந்தார் . இதற்கு காரணம் ஸ்கார்சேசே நடிகர்களின் இயக்குநர் . ஒரு திரைப்படத்தில் தன் பெயர் மாத்திரமே முத்திரையாக தெரியவேண்டும் என்று மெனக்கெடும் இயக்குநர்களுக்கு மத்தியில் உடன் பணிபுரியும் மற்றவர்களையும் மேலே கொண்டுவர முயற்சிக்கும் இயக்குநராக ஸ்கார்சேசே இருப்பார் . ஏறத்தாழ 30 ஆண்டுகளாக சினிமா இயக்கியிருந்தாலும் இத்திரைப்படத்திற்காகத்தான் முதன்முதலில் ஆஸ்கார் பெற்றார் . ஆனால் இவருடைய ஆஸ்தான எடிட்டரான தெல்மா , இவருக்கு முன்பே மூன்றுமுறை ஆஸ்கார் பெற்றிருக்கிறார் . அது அனைத்தும் பெற்றுக்கொடுத்தது இவருடைய திரைப்படங்கள் தான் . அதேபோல் ராபர்ட் டீ நீரோவிற்கும் ஆஸ்கார் வாங்கித்தந்த பெருமை ஸ்கார்சேசேயே சேரும் . பலமுறை ஆஸ்கார் நாமிநேட் ஆகியும் விருது கிடைக்காமல் வெளியேறிய ஸ்கார்சேசே அதைப்பற்றி பெரிதாக அலட்டிக்கொள்ள மாட்டார் . ஆனால் இப்படத்திற்கு ஆஸ்கார் கிடைத்ததும் என்னது , எனக்கா ? எப்பா . ஒருமுறை அந்த லிஸ்ட்ட செக் பண்ணுங்கஎன்று தலைவர் கமெண்டினாராம் . இவ்விருதை தன் நீண்டகால சகாக்களான ஃப்ரான்சிஸ் போர்ட் கொப்பல்லோ , ஜார்ஜ் லூகாஸ் மற்றும் ஸ்பில்பெர்க் ஆகியோர் கையில் வாங்கியபோது அவ்விருதைக் கொடுத்தவர்கள் கண்டிப்பாக பெருமைப்பட்டிருப்பார்கள் . என்னைப்பொறுத்தவரை இப்படத்துடன் ஸ்கார்சேசேயின் மாஸ்டர்பீஸ்களான GOOD FELLAS , TAXI DRIVER , GUNDUN , RAGING BULL போன்ற திரைப்படங்களுக்கும் நியாயமாக ஆஸ்கார் கிடைத்திருக்கவேண்டும் .

ஸ்கார்சேசேயே என்னிடம் வந்து தம்பி ! இந்த படத்தோட ஹீரோ காப்ரியோ தாம்பாஎன்றாலும் நான் ஏற்றுக்கொள்ளவே மாட்டேன் . என்னைப்பொறுத்தவரை படத்தின் ஹீரோ தல தான் . ‘தலஜாக் நிக்கல்சனின் நடிப்பைப்பற்றி விமர்சிக்கவே தனி தைரியம் வேண்டும்  . சிங்கம் எப்படி வேட்டையாடும் என்று சொல்லித்தான் தெரியவேண்டுமா ? இப்படத்தில் தலைவர் வரும் ஒவ்வொரு காட்சியும் அட்டகாசம் . டீகாப்ரியோவின் கையை உடைத்துக்கொண்டே நீ போலிஸா என்று விசாரிப்பதாகட்டும்அதன்பின் அவருடைய சகாவுடன் அமர்ந்துகொண்டு பேசும் அக்காட்சியாகட்டும் சரவெடி . வில்லத்தனம் கலந்த ஒரு சிரிப்பினை உதிர்க்கும்போது நிக்கல்சனின் மேனரிசம் , கிழட்டுச்சிங்கத்தின் கர்ஜனையாய் ஒலிக்கும் அவரது குரல் நம்மை அப்படியே கட்டிப்போடுகிறது . படத்தில் என்ன நடந்தாலும் நிக்கல்சன் மட்டும் சாகக்கூடாது என்று நான் பதறியவாறே படம்பார்த்தது தனிக்கதை .  காட்டில் என்னதான் சிறுத்தை , புலி என பல்வேறு விலங்குகள் வெறித்தனமாக வேட்டையாடினாலும் சிங்கத்தின்முன் ஈடாகுமா ? இப்படத்தைப்பொறுத்தவரை காப்ரியோ உயிரைக்கொடுத்து நடித்திருந்தாலும் , மாட் டேமன் அமைதியாக துரோகத்தனம் செய்வதை வெளிப்படுத்தியிருந்தாலும் அவையனைத்தும் தலைவரின் காட்சிகள் வரும்போது ஜூஜுபியாகி விடுகிறது . ஒருவேளை நான் US-ல் பிறந்திருந்து இக்காலக்கட்டத்தில் இப்படம் வந்திருந்தால் முதல் நாள் முதல் ஷோவன்று தல-க்கென்று பெரிய ப்ளக்ஸ் அடித்து பாலாபிஷேகம் செய்து தியேட்டரில் தல வரும் காட்சியிலெல்லாம் விசிலடித்து தூள் கிளப்பியிருப்பேன் . என்னசெய்ய ? கொஞ்சம் லேட் . என்னடா இவன் ? இந்தாள பத்தி இப்படி புகழ்ந்து தள்ளுறான்னு பாக்கறிங்களா ? இவரோட நடிப்பு பற்றி அறிய நான் சஜ்ஜஸ்ட் செய்யும் ஒரே திரைப்படம் THE SHINING . அது ஒன்று போதும் , தல யாரென்று தெரிந்துகொள்ள . இவருடைய பாத அச்சினை ஒரு தியேட்டரில் ப்ரேம் போட்டு ஜாக் நிக்கல்சனே இங்க வந்துருக்காருங்கஎன்று பெருமையுடன் வைத்துள்ளார்கள். மொத்தம் 12 ஆஸ்கார் நாமிநேசன் . 3 முறை ஆஸ்கார் வென்றவர். இதுமட்டுமில்லை , உலகில் இருக்கும் அத்தனை விருதுகளையும் வாங்கி வீட்டில் அடுக்க இடமில்லாமல் தவித்த ஆள் . விருது வாங்குவதற்கென்றே டிசைன் செய்யப்பட்ட மனிதர் என்றால் அது தல தான் . மேலும் படத்தில் காஸ்டெல்லோவும் சுல்லிவனும் தியேட்டரில் சந்திக்கும் காட்சியில் டில்டோமேட்டர் தலயின் ஐடியாதான் .

டிக்னமாக வரும் மார்க் , இப்படத்திற்காக முதன்முறையாக அகாடமி விருதினைத்தட்டிசென்றார் . படம் முழுதும் கெட்டவார்த்தை பேசிக்கொண்டே ஆஸ்காரைத்தட்டிச் சென்ற  ஒரே ஆக்டர் இவர் தான் . படத்தில் அதிகமாக FU*K என்பதைக்கூறியவரும் இவர்தான் . படத்தில் அனைவரும் பேசும் FU*K தவிர்த்துவிட்டுப்பார்த்தால் 1.30 மணிநேரம் தான் படத்தின் நீளம் வரும் .

இப்படத்தில் ஒரு விஷயம் பொதுவாக இருக்கும் . காஸ்டெல்லவும் காஸ்டிகனும் ஐரிஷ் அமெரிக்கர்கள் . இதேபோல் ஸ்கார்சேசேயின் முந்தைய படங்களான GANGS OF NEWYORK , GOOD FELLAS , TAXI DRIVER ஆகிய படங்களிலும் ஐரிஷ்அமெரிக்கன் மற்றும் இத்தாலிய பழக்கவழக்கங்கள் போன்றவற்றை அடிப்படையாக கொண்ட பிண்ணனி இருக்கும்.  காரணம் ஸ்கார்சேசே ஒரு ஐரிஷ்அமெரிக்கர் . பொதுவாக ஒரு படத்தில் ட்விஸ்ட் இருக்கும் . அது நம் எண்ணத்தை அப்படியே தலைகீழாக மாற்றிப்போட்டுவிடும் அல்லது நமக்கு ஏமாற்றத்தைத்தரும் . இவையிரண்டு தான் படத்தின் ட்விஸ்டாக இருக்கும் . இன்னொன்றையும் நாம் புரிந்துகொள்ளவேண்டும் . நாம் எதிர்பார்த்தது அப்படியே வருவது ட்விஸ்ட் கிடையாது . பெரும்பாலான படங்கள் மேலே கூறிய இருவகையான ட்விட்களில் ஏதாவதொன்றை பின்பற்றிதான் முடியும் . ஆனால் இப்படத்தில் மட்டும்தான் இரண்டு வகையான ட்விஸ்டையும் ஒருசேரவைத்து கொடுத்திருக்கிறார்கள் . முதலில் குயினைன் மற்றும் நிக்கல்சன்  இறப்பது எதிர்பார்க்காத ஆனால் ஏற்றுக்கொள்ளக்கூடிய ட்விஸ்ட். காப்ரியோ காட்சியோ ஒருதுளிக்கூட எதிர்பார்க்காத , ஏற்றுக்கொள்ளமுடியாத ட்விஸ்ட். கடைசியில் வரும் ட்விஸ்ட் அனைத்தையும் டைஜஸ்ட் செய்யும்விதமாக இருக்கும் .

இத்திரைப்படம் தமிழில் பத்து வருடங்களுக்குப்பின் ரீமேக் ஆகவேண்டும் . அதில் ஹாலிவுட் தல கேரக்டரில் தமிழ்நாட்டுத் தல நடிக்கவேண்டும் என்பது என் ஆசை . நடக்குமா என்பது சந்தேகம்தான் . இத்திரைப்படத்தைப்பார்த்து INSPIRE ஆன J.D.சக்ரவர்த்தி , தெலுங்கில் HOMAN என்ற பெயரில் திரைக்கதை எழுதி இயக்கி பேர் வாங்கினார். இத்திரைப்படத்தின் இன்ஸ்பிரேசன் உற்று கவனித்தால் மீகாமனில்கூட தெரியும் . இப்போது இந்தியில்கூட இத்திரைப்படத்தை ரீமேக் செய்ய ஹிருத்திக் ஆர்வமாக இருக்கிறார் என்ற செய்தியும் வெளிவருகிறது .

-