Saturday, 26 March 2016

BATMAN v SUPERMAN : DAWN OF JUSTICE – சினிமா விமர்சனம்





ஒவ்வொரு வருடமும் ரிலிசாகும் படங்களில் கண்டிப்பாக இந்த இந்த படங்களுக்கெல்லாம் தியேட்டருக்குச் சென்றே ஆகவேண்டும் என்ற ஒரு லிஸ்ட் நம்மிடம் இருக்கும்; நானும் அம்மாதிரியே தான் இருந்தேன். ஆனால் இந்த ஆண்டு, ஒரே ஒரு திரைப்படம் மட்டும் பார்க்கவே கூடாது என்று ஆண்டின் தொடக்கத்திலேயே முடிவெடுத்தது இத்திரைப்படத்திற்குத்தான். முக்கிய காரணம் கிறிஸ்டோபர் நோலன். பேட்மேன் எனும் சூப்பர்ஹீரோவை மக்கள் மத்தியில் ஒரு லெஜன்டாக உருவாக்கிவிட்டு அவர் சென்றார். பேட்மேனை ரீபூட் செய்த மாதிரி சூப்பர்மேனையும் ரீபூட் செய்தால் நன்கு கல்லா கட்டிவிடலாம் என்று நினைத்த வார்னர் பிரதர்ஸ் அதையும் சக்ஸசாக நிறைவேற்றியது. சூப்பர் மேனின் ரீபூட் வெர்சனனான மேன் ஆஃப் ஸ்டீல் 2013-ல் வெளிவந்து சூப்பர்மேனுக்கு உயிர்கொடுத்தது. சூப்பர்மேனின் இரண்டாம் பாகத்திற்காக வார்னர் பிரதர்ஸ் செய்த கொடுமை தான் இந்த படம்.

முதலில் இந்த திரைப்படத்தைப் பார்க்கும்முன் அவசியம் பார்க்கவேண்டிய இரண்டு திரைப்படங்களை இங்கு கூறிவிடுகிறேன். ஸ்னைடர் இயக்கத்தில்  2013-ல் வெளிவந்த மேன் ஆஃப் ஸ்டீல் மற்றும் ஜேய் ஓலிவா இயக்கத்தில் 2001-ல் வெளிவந்த அனிமேசன் திரைப்படமான த டார்க் நைட் ரிட்டர்ன்சின் இருபாகங்கள். இவ்விரண்டு திரைப்படங்கள் மட்டுமில்லாமல் வொன்டர் வுமனைப் பற்றியும் கொஞ்சம் தெரிந்துகொள்வது நல்லது. முடிந்தால் ஃப்ராங் மில்லரின் சூப்பர்மேன் & பேட்மேன் காமிக்ஸ் வரிசைகளையும் ஆக்சன் காமி்க்ஸ்களில் வந்த வில்லன் லெக்ஸ் லூதரின் கதைகளையும் படித்துவிட்டால் இன்னும் சிறப்பு. என்னடா ஒரு படத்தைப் பார்க்க இவ்வளவு ஹோம்வொர்க் செய்யவேண்டுமா என நீங்கள் கேட்பது புரிகிறது. இவற்றையெல்லாம் தெரிந்துகொள்ளாமல் இப்படத்தைப் பார்த்தால், திரையரங்கில் நீங்கள் தூங்கிவழியும் அபாயம் அதிகமாக இருப்பதால் வேறுவழியின்றி நானும் உங்களுக்கு பரிந்துரைக்க வேண்டியுள்ளது.  

இதற்கான காரணம் வார்னர் பிரதர்ஸின் சரியான திட்டமின்மையே. மார்வெல் தனது அவெஞ்சரை வெளியிடுமுன் அவெஞ்சர்களில் உள்ள ஒவ்வொரு ஹீரோவுக்கும் ஒரு திரைப்படத்தை முன்பே கொடுத்துவிட்டு, அவர்களைப் பற்றிய அறிமுகத்தைத் தந்த பின் தனது அவெஞ்சரை வெளியிட்டது. ஆனால் டி.சி. காமிக்ஸின் சில கேரக்டர்களை ஒருங்கிணைத்து எடுக்கப்பட்டிருக்கும் இத்திரைப்படமானது அந்த கேரக்டர்களைப் பற்றிய எந்தவொரு அறிமுகத்தையும் நமக்குத்தராமல் இனிமேல்தான் அவர்களின் இன்ட்ரோ என்று கிளைமேக்சில் கூறி நம்மை பெரிதளவாய் ஏமாற்றிவிட்டது. காமிக்ஸ் அனுபவமற்றவர்களுக்கு அக்குவாமேன், தன்டர்ஸ்ட்ரோம் போன்ற டி.சியின் மியூட்டன்ட் ஹீரோக்களைப்பற்றி அறிந்து கொள்வதற்கான வாய்ப்புகளே இல்லை. இவ்வளவு ஏன்? சூப்பர்ஹீரோ படங்களை தொடர்ந்து பார்த்துவரும் நானே இத்திரைப்படத்தில் வொன்டர்வுமனைத் தவிர ஒருசில செகன்ட் வரும் மற்ற ஹீரோக்களை கண்டுபிடிப்பதற்குள் போதும்போதுமென ஆகிவிட்டது. இதன் அடுத்த பாகமான ஜஸ்டிஸ் லீக்கில் அனைத்து சூப்பர்ஹீரோக்களும் இணையப்போகிறார்கள். அந்த படமானது ஒரு அறிமுகப்படலமாக இருக்கும்பட்சத்தில் அவெஞ்சர் முதல்பாகத்தின் முதல்பாதி போன்ற சோர்வினைத்தான் தரும். வொன்டர்வுமன் திரைப்படம் 2017-ல் வெளிவரும்பட்சத்தில் அதிலேயே மற்ற ஹீரோக்களின் அறிமுகத்தை எதிர்பார்க்கலாம். ஆனால் முதலில் வொன்டர்வுமன் திரைப்படம் வந்திருந்தால் இத்திரைப்படமானது பார்க்கும்போது வேறொரு உணர்வைத் தந்திருக்கும் வாய்ப்புகள் அதிகம்.

சரி, புரியாத பாஷையில் ஏதேதோ சொல்லி வெறுப்பேத்தாமல் திரைப்படத்திற்கு செல்லலாம். வியாழன் அன்றே இத்திரைப்படத்தைப் பார்த்துவந்த ஆரூர்மூனா செந்தில் அண்ணன், படம் ஒன்றும் புரியவில்லை, மொக்கையாக போகிறது என்றார். அதையும் தாண்டி திரைப்படத்திற்கு திரையரங்கிற்கு சென்றபோது பார்த்துவிட்ட ஒவ்வொருவரும் தியேட்டரை விட்டு வெளியில் வரும்போதே கொட்டாவியுடன் வந்தார்கள். சரிதான் , வான்டேட்ட சைத்தானத் தூக்கி பைக்குள்ள போட்டுக்கினு தியேட்டருக்கு வந்துட்டோம்போலனு நினைத்துக்கொண்டே போனேன். 

படத்தைப்பார்க்கும்முன் முந்தைய பாகமான மேன் ஆஃப் ஸ்டீல்லை ஒருதபா, ஒருபத்தியில் பார்த்துவிடலாம். பூமியைவிட நாகரீகத்தில் முன்னேறிய கிரிப்டான் எனும் கிரகத்தில் வாழ்ந்துவரும் கிரிப்டானியர்கள் பார்ப்பதற்கு மனிதனைப் போன்ற தோற்றமுடையவர்கள். அவர்கள் வாழ்ந்துவரும் கிரிப்டான் கிரகம் அழிவின் விழிம்பில் உள்ளது. அக்கிரகத்தின் ராணுவஜெனரலான ஸாட் (ZOD) , தன் கிரகத்தைக் காப்பாற்ற ஒருவழி யோசிக்கிறார். கிரிப்டானியர்களுக்கு இயற்கையாக புணர்ந்து குழந்தைப்பெற்றுக்கொள்ளும் தகுதி கிடையாது. அவர்கள் குழந்தைப் பெற்றுக்கொள்ள வேண்டுமெனில் கவுன்சிலை அணுகி அப்ரூவல் வாங்கி, தனக்கு எப்படிப்பட்ட மகன் வேண்டும் என்று முன்பே சொல்லிவிட்டால் கோடெக்ஸ் எனும் டெக்னாலஜியைப் பயன்படுத்தி குழந்தையை உருவாக்குவார்கள். ஜெனரல் ஸாட், அந்த கோடெக்சைக் கைப்பற்றி, அதைக்கொண்டு வேறொரு உலகில் கிரிப்டானை மீண்டும் உருவாக்கிவிடவேண்டும் என்று முனைகிறான். இதை எதிர்க்கும் சயின்டிஸ்ட்  கால், கோடெக்சை என்க்ரிப்ட் செய்து , இயற்கை முறையில் பிறந்த தன் மகனின் உடலில் செலுத்திவிடுகிறார். கிரிப்டானின் எதிர்காலம் இவன்தான் என்றென்னும் தன் குழந்தையை, கால்லும் அவர் மனைவி லாராவும் ஒரு ஸ்பேஷ் ஷிப்பில் வைத்து , வாழ்வதற்கு ஏற்ற உலகமான பூமிக்கு அனுப்பிவிடுகிறார்கள். கிரிப்டான் அழிகிறது; ஜெனரல் ஸாடும் அவனின் கூட்டாளிகளும் தண்டனை எனும் பெயரில் தப்பித்துவிடுகிறார்கள்.

பூமிக்கு வந்த அந்த குழந்தையை ஜொனதன் , மார்த்தா தம்பதியினர் எடுத்து கிளார்க் எனப்பெயரிட்டு வளர்க்கின்றனர். சிறுவயதுமுதலே கிளார்க்குக்கு ஏதோ அதீத சக்தி இருக்க, தன் தாயின் அரவணைப்பினால் அதைக்கட்டுப்படுத்துகிறான். வளர்ந்தபின் தன்னை உலகினுருப்பவர்களுக்கு இடையே மறைத்துக்கொள்கிறான். அப்படியான காலகட்டத்தில் அவனின் ஒரிஜினல் தந்தையான கால்-லின் நினைவுகளைச் சந்திக்கும் கிளார்க், தான் யாரென்று உணருகிறான். இன்னொருபுறம் ஜெனரல் ஸாட், கிளார்க்கின் உடலிலுள்ள கோடெக்ஸை அடைவதற்காக பூமிக்கு வருகிறான். ஜெனரல் ஸாட் பூமியை, கிரிப்டானாக மாற்றிவிடலாமென ஐடியா செய்ய, அதை சூப்பர்மேன் எப்படியெல்லாம் சண்டைபோட்டுத் தடுக்கிறார் என்பதனை கடைசி 43 நிமிடங்கள் கிராபிக்ஸ் கலக்கலாகக் காட்டியிருப்பார்கள். கடைசி 30 நிமிடத்தில் சண்டை எனும் பெயரில் ஒரு பெரிய (சிகாகோ - மெட்ரோபோலிஸ்) நகரத்தையே அழித்துவிடுகிறார்கள்; வில்லனும் அழிந்துவிடுகிறான்.


இப்போது இந்த பாகத்திற்கு வரலாம். படத்தில் வரும் கேரக்ட்ர்களுக்கு ஒரு இன்ட்ரோ கொடுத்துவிட்டு கதைக்குச் செல்லலாம்.

லக்ஸ் லூதர் – காமிக்ஸ் உலகின் 4வது மிகப்பெரிய வில்லன். இவன் ஒரு சைக்கோபாத். பேட்மேனுக்கு ஜோக்கர் எப்படியோ அப்படி சூப்பர்மேனுக்கு இவன். கோடிஸ்வரனான இவன் தன் லேப்பை வைத்து விதவிதமாக எதையாவது கண்டுபிடித்துக்கொண்டே இருப்பதுதான் வேலை.

ப்ரூஸ் வெய்ன் – மெட்ரோபோலிஸ் நகரின் அருகிலிருக்கும் கோதம் நகரின் மிகப்பெரிய கோடிஸ்வரர் ப்ரூஸ் வெய்ன். சிறுவயதில் ஒரு திருடனால் தன் தாய், தந்தையை இழந்துவிடும் சிறுவன் ப்ரூசுக்கு வௌவால்கள் உதவிசெய்கின்றன. தன் அறிவைக்கொண்டு கோதம் நகரின் குற்றங்களைத் பேட்மேன் எனும் பெயரில் இரவில் தடுத்துவந்த ப்ரூஸ் வெய்ன், பகல்நேரத்தில் ஒருகுடிகார  ப்ளேபாய் மில்லியனராக உலாவருகிறார். இப்படத்தின் கதைப்படி இப்போது ப்ரூசின் வயது 55. பேட்மேனின் விசுவாமான பட்லர் ஆல்ப்ரட். பேட்மேன் பற்றி மேலும் அறிந்துகொள்ள கீழே உள்ள 3 பதிவுகளைப் படியுங்கள்.


க்ளார்க் – ஜெனரல் ஸாடை அழித்தபின், சூப்பர்மேன் டெய்லி ஹன்ட் எனும் பத்திரிக்கையில் செய்தி சேகரிப்பாளராக இருக்கிறார்.  கோதம் நகரில் நடக்கும் குற்றங்களுக்கு பேட்மேன்தான் காரணம் என நம்பும் க்ளார்க், அதைத்தன் பத்திரிக்கையில் வெளிக்கொணர முயற்சிக்கிறான்.

லேன் – சூப்பர்மேன் என்கிற க்ளார்க்கின் உயிர்க்காதலி. உலகமே ஒருபுறம் அழிந்துகொண்டிருந்தாலும், லேனுக்கு ஒரு சிறுகாயம்கூட வராமல் காப்பாற்ற எங்கிருந்தாலும் வந்துவிடுவார் சூப்பர்மேன். (பழைய சூப்பர்மேன் திரைப்படத்தில் லேன் இறந்துவிட, அவளைக்காப்பாற்ற அவளைத்தூக்கிக்கொண்டு ரிவர்ஸில் பூமியைச்சுற்றி, காலத்தையே ரீவைன்ட் செய்துவிடுவார் என்றால் பார்த்துக்கொள்ளுங்கள் எவ்வளவு காதல் என்று).

டயானா – 5000 வருடங்களாக வாழ்ந்து வரும் அழிவில்லா பெண்; வொண்டர் உமனுக்கும் சூப்பர்மேன் போன்று பறக்கும் சக்தியோடு, கேடயம் மற்றும் கத்தியும் எக்ஸ்ட்ரா பிட்டிங்ஸ். எப்போதெல்லாம் படுபயங்கர தீய சக்திகள் வெளிவருகிறதோ அப்போதெல்லாம் தன் சுயரூபத்தை வெளிப்படுத்தி காட்டு,காட்டென காட்டிவிட்டுச்செல்வார்.

இப்போது கதை என்னவென்றால், போனபாகத்தில் சூப்பர்மேன் செய்த சாகங்களால் அவருக்கு எந்தளவிற்கு ரசிகர்கள் உருவானார்களோ, அதே அளவுக்கு எதிர்ப்பாளர்களும் உருவானார்கள். அந்த எதிர்ப்பாளர்களில் மிகமுக்கியமான இருவர் லக்ஸ் லூதர் மற்றும் பேட்மேன். சூப்பர்மேன் மாதிரியான அதீதசக்தியுள்ளவர்களால் என்றும் பூமிக்கு பேராபத்துதான் என்பதை இருவரும் உணருகிறார்கள். லக்ஸ் லூதர், போன பாகத்தில் ஜெனரல் ஸாட் பூமியை அழிக்கப் பயன்படுத்திய கிரிப்டானிய உலோகங்களில் இருந்து ஒரு பவர்புல் ஆயுதத்தைச் செய்யமுயற்சிக்கிறான். ஆனால் அதை பேட்மேன் அவனிடமிருந்து ஆட்டையைப்போடுகிறார். அதனால் பேட்மேன்மீது செம காண்டில் இருக்கிறான் லக்ஸ் லூதர்.

எதிர்ப்பாளர்கள் ஒருபுறம்; ஆதரிப்பவர்கள் ஒருபுறம் என இருதலைக்கொள்ளியாய் இருக்கும் சூப்பர்மேனுக்கு கோதம்நகரில் பெருகிவரும் குற்றங்களுக்கெல்லாம் காரணம் பேட்மேன் தான் என நினைக்கிறான். பேட்மேனைச் சந்தித்து நீ செய்வது தவறு ; இனி திருத்திக்கொள் என மிரட்டிவிட்டு செல்கிறார். பேட்மேன் லக்ஸ் லூதரின் ஆயுதத்தைத் திருடும்முன் அவனைப்பற்றி உளவு பார்க்கச்செல்கிறார். அப்போது டயானா எனும் பெண்ணைப் பார்க்கிறார். உளவு பார்த்த இடத்திலிருந்து பேட்மேன் கண்டுபிடிப்பது, டயானா 1918-ல் தன் குழுவினருடன் போர்புரிவது போன்றதொரு புகைப்படம். மேலும் அதில் புதுப்புது சூப்பர்ஹீரோக்களைப் பற்றியும் அறிந்துகொள்கிறார்.

காண்டில் இருக்கும் லக்ஸ் லூதர், தனக்கு அல்வா கொடுத்த பேட்மேனைத் தீர்த்துக்கட்ட முடிவெடுக்கிறான். சூப்பர்மேனின் தாயைக்கடத்தி வைத்துக்கொண்டு, பேட்மேனைப்போட்டுத் தள்ளினால் உன் தாய் பிழைப்பாள் என மிரட்டுகிறான். இன்னொருபுறம் சூப்பர்மேனை அழிக்க ரெடியாகும் பேட்மேன், சூப்பர்மேனுக்கு அறைகூவல் கொடுக்கிறார். இதேநேரத்தில் ஆயுதம் கைவிட்டுப்போன லக்ஸ், முந்தைய பாகத்தில் மிச்சமான ஜெனரல் ஸாடின் உயிரற்ற பிரதேத்தைக்கொண்டு, கிரிப்டானிய விண்கலத்தின் அதீத சக்தியைவைத்து ஒரு புது உயிரினத்தை உருவாக்குகிறான். இத்தனைப் பிரச்சனைகளையும் சூப்பர்மேன் எதிர்கொள்ள, மீதி என்ன நடந்தது என்பதுதான் கடைசி அரைமணிநேரம். அதையும் சொல்லிவிடலாம்தான்; 400 மில்லியன் டாலருக்கும்மேல் செலவு செய்து எடுத்திருக்கிறார்கள் என்பதால் சொல்ல மனம்வரவில்லை.

உண்மையில் பேட்மேன் கேரக்டரை சர்வநாசம் செய்துவிடுவார்கள் என நினைத்தேன்; ஆனால் பரவாயில்லை. பேட்மேனை முடிந்தவரை சரியானபடியே உபயோக்கித்திருக்கிரார்கள். ஆனால் எந்நிலையிலும் யாரையும் கொல்லாத பேட்மேனே இத்திரைப்படத்தில் சிலரைக்கொல்வது போல் காட்டியதை மனம் ஒப்புக்கொள்ளவில்லை. என்னடா  பேட்மேன் , பேட்மேன் என்று புலம்புகிறான் என்று யோசிக்காதிர்கள். உண்மையில் காமிசைப்பொறுத்தவரை சூப்பர்மேன் வெஸ் பேட்மேன் என்பதே டைட்டில். ஆனால் பேட்மேனிற்கு உலகளவில் இருக்கும் ரசிகர்களுக்கு மதிப்புக்கொடுக்கும் வகையில் பேட்மேன் வெஸ் சூப்பர்மேன் என டைட்டிலிலேயே பேட்மேனுக்கு முன்னுரிமை கொடுத்திருக்கிறார்கள். அதேபோல் பேட்மேனுக்கு ஏற்ற சரியான நடிகராக பென் அஃப்லெக்கை செலக்ட் செய்திருக்கிறார்கள். ஓரிடத்தில்கூட பேட்மேனுக்கான கெத்தை விட்டுக்கொடுக்காமல் திரைப்படத்தை நகர்த்தியிருக்கிறார்கள். ஆனால் அது ஒரு சூப்பர்ஹீரோவுக்குண்டான மரியாதையைத் தந்திருக்கிறதே தவிர, பேட்மேன் எனும் லெஜன்ட்டை இப்படிப்பார்ப்பது மனதிற்கு ஒவ்வாத ஒன்றாகிவிட்டது.

சூப்பர்மேன் பற்றி என்ன சொல்ல? எல்லாம் அவர்தான். இல்லாத சக்தியே இல்லாத  கிரிப்டானியர். இந்த படத்திலும் ஏதேதோ செய்திருக்கிறார். வொண்டர்வுமன் கேரக்டரை காமிக்ஸ் படிக்காமல், திரைப்படம் பார்க்காமல் ஒருமுடிவுக்கு வருவது கடினம்தான். ஏதோ கிளைமேக்ஸ் ஃபைட்டில் பறந்து பறந்து செய்துகொண்டிருந்தார். ஒவ்வொரு சூப்பர்ஹீரோ திரைப்படத்திலும் ஹீரோயின் வடிவமைப்பு  ஏன் இவ்வளவு மட்டமாக இருக்கிறது என்பதுதான் புரியவில்லை. லேன் கதாபாத்திரமானது தானே தேடிச்சென்று வில்லனிடம் சிக்கிக்கொண்டு, ஹீரோவுக்கு பிரச்சனை உண்டாக்குவதற்கென்றே அளவெடுத்து தைத்த ஒரு கேரக்டர்.

படத்தின் இரு ப்ளஸ்கள் என்றால் பேட்மேனும் சூப்பர்மேனும் மோதிக்கொள்ளும் காட்சியும், கிளைமேக்ஸ் 20 நிமிடக்காட்சியுமே. பேட்மேன் அறிவாலும் தன் சமயோசிதத்தாலும் சூப்பர்மேனை பந்தாடும்போது விசில் பறக்கிறது. ஆனால் பேட்மேன், சூப்பர்மேனைக் கொல்லப்போகும் சமயத்தில் சூப்பர்மேன் ஒரேஒரு வார்த்தையில் அவர் மனதை மாற்றிவிடுவதெல்லாம் தியாகராஜ பாகவதர் காலத்து காட்சி. படுமொன்னையான சீன் அது. இம்மாதிரியான மொன்னையான சீன்களை டைஜிஸ்ட் செய்வதற்காகவே ஹன்ஸ் ஜிம்மரை இசையமைப்பாளராய் அமர்த்தியிருக்கிறார்கள். அவரும் தன்னால் முடிந்தளவு இசையால் படத்தை நகர்த்திச்சென்றிருக்கிறார். பல இடங்களில் பிண்ணனி இசை மிரட்டல். ஒளிப்பதிவாளரும் தன் பங்கைச் சிறப்பாக செய்துள்ளார். இருட்டில் எடுக்கப்பட்டிருக்கும் காட்சிகள் கூட மிகத்தெளிவாக பார்க்கமுடிந்தது.

மைனஸ்கள் என்று கோடிக்கணக்கில் சொல்லலாம். கதாசிரியர் டேவிட்.எஸ்.கோயர் நல்ல கதாசிரியர் தான். படத்திலும் நல்ல கதைதான். திரைக்கதையாசிரியர் க்றிஸ் டெர்ரியோ ஆர்கோ படத்திற்காக ஆஸ்கார் வாங்கியவர். அதேபோல் இயக்குநர் ஸேக் ஸ்னைடரும் ஏற்கனவே 300, வாட்ச்மேன் போன்ற திரைப்படங்களை எடுத்திருக்கிறார். எனினும் இவர்கள் மூவரும் ஒன்றிணைந்து உருப்படியான ஒரு திரைப்படத்தைக்கொடுக்க முடியாமல் போய்விட்டது எனலாம். இதற்கு மிகமுக்கிய காரணம் இன்றைய காலகட்டத்து சூப்பர்ஹீரோ திரைப்படங்கள். இப்போது எடுக்கப்படும் சூப்பர்ஹீரோ திரைப்படங்கள் விசுவல் ரீதியாக மட்டுமில்லாமல், திரைக்கதை மற்றும் காட்சிகளை நகர்த்தும் விதத்திலும் பல்வேறு வகையில் வேறுபட்டு வருகிறது. சூப்பர்ஹீரோக்களை பெரும்கடவுளாக சித்தரிப்பதற்கு பதில் மனிதர்களுக்கு நெருக்கமானவராக சித்தரிக்கவேண்டும் என்று ஒவ்வொரு இயக்குநர்களும் முயன்று வருகின்றனர். அப்படியொரு கட்டத்தில் , இந்த திரைப்படத்தில் மனிதர்களைப்பற்றிய காட்சிகள இல்லை எனலாம். எவ்வளவு பேர் செத்தாலும் பரவாயில்லை, சூப்பர்மேன் தன் தாயையும், காதலியையும் தேடித்தான் முதலில் செல்கிறார். அந்த இடத்திலேயே நமக்கும் சூப்பர்மேனுக்குமான இடைவெளி  அதிகரிக்கிறது.

இவ்வளவு சக்திகள் கொண்ட ஒருவருக்கு பிரச்சனை வருகிறது என்றால் அதைத்தீர்க்க வழியில்லாமல் சக்திகளே இல்லாத பேட்மேனிடத்தில் அவர் உதவி கேட்பதெல்லாம் சும்மா உட்டாலங்கடி. காதலி எங்கே போயிருந்தாலும் அவளைக் கண்டறிந்து தேடிவரும் சூப்பர்தேனால் தன்னை வளர்த்தத் தாயை எங்கு மறைத்து வைத்திருக்கிறார்கள் என்பதை கண்டுபிடுக்க முடியவில்லையாம்!? கிரிப்டான் ஆயுதம் தன் அருகில் இருந்தாலே சக்தியிழக்கும் சூப்பர்மேன் அதை எடுத்துக்கொண்டு பறந்துபோய் குத்தும்போதெல்லாம் போங்கய்யா போங்கு என்று சொல்லத்தோன்றியது. அதேபோல் ஒரே வார்த்தையில் பேட்மேன் மனம் மாறுவது, கடைசியில் சூப்பர்மேன் உயிரெழுத்தல் எல்லாம் சும்மானாச்சுக்கும் டெம்ப்ட் ஏற்ற எடுக்கப்பட்டது. நாங்க அதெல்லாம் டார்க் நைட் ரைசசிலேயே பார்த்துவிட்டோம் பாஸ்.

அதேபோல் திரைக்கதையின் தேக்கநிலையையும் ஒரு மைனசாக குறிப்பிடலாம். கிளைமேக்ஸ் ஃபைட் முடிந்தபின் ஆங்காங்கே கொத்துபரோட்டா போட்டதுபோல் காட்டும் காட்சிகளும், அடுத்த பாகத்திற்கான ஹைப் ஏற்றும் காட்சிகளும் அச்சு அசல் டார்க் நைட் ரைசஸின் உல்டா. முதல்பாதியில் பல காட்சிகளை ஏதோ மிகமுக்கியமானதுபோல் காட்டிவிட்டு, அதைத்தொடர்ந்து என்ன நடந்தது என்ற கன்டினியுவேசனே இல்லாமல் இஷ்டத்துக்கு நகர்த்திக்கொண்டே போனதெல்லாம் திரைக்கதை சொதப்பல்.


மொத்தத்தில் ஜஸ்டிஸ் லீக்கை பெரிதும் எதிர்பார்ப்பவர்கள் , மேன் ஆஃப் ஸ்டீலைப் பார்த்தவர்கள் ஒருமுறைப் பார்க்கலாம். அதுவும் அடுத்தபாகத்திற்கான கன்டினிவியுட்டி மிஸ் ஆகிடக்கூடாது என்ற ஒரே காரணத்திற்காக. அதிதீவிர நோலனின் பேட்மேன் ரசிகர்கள், இந்த படத்திற்கு செல்லாமல் இருப்பதே உத்தமம். மற்றபடி பெரிதாக சொல்லிக்கொள்ள எதுவும் இல்லை. 

Sunday, 13 March 2016

THE BUTTERFLY EFFECT – சினிமா விமர்சனம்



என்.டி.ஆரின் நானக்கு ப்ரேமதோ திரை விமர்சனத்தை எழுதும்போது இடையில் இத்திரைப்படத்தைப் பற்றி எதேச்சையாக குறிப்பிட்டேன். இந்த திரைப்படம் நினைவுக்கு வந்ததும் உடனே இந்தபடத்தைப் பற்றி இத்தனை நாள் எழுதாமல் விட்டுவிட்டோமே என்ற எண்ணம்தான் தோன்றியது. அப்படி ஒரு ஸ்பெசல் ட்ரீட்மென்ட் தான் இத்திரைப்படம். உங்களுக்கு பல சர்ப்பரைஸ்களைக்கொடுக்கும் வல்லமை வாய்ந்தது இந்த பட்டர்ப்ளை எஃபெக்ட்.

ஏற்கனவே நானக்கு ப்ரேமதோ திரைப்படத்தைப் பற்றிய பதிவிலே கேயாஸ் தியரியைப்பற்றியும் அதன் கோட்பாடுகளில் ஒன்றான பட்டர்ஃப்ளை எஃபெக்ட் பற்றியும் பார்த்தோம். அந்த கான்செப்டை அப்படியே வைத்து ஒரு பக்காவான திரைக்கதையை எழுதினால் எப்படியிருக்கும்? அதுதான் இந்த திரைப்படம். கேயாஸின்படி குத்துமதிப்பான நிகழ்காலம் குத்துமதிப்பற்ற எதிர்காலத்தை உருவாக்காது என்பதைவைத்து நாம் நம் இறந்தகாலத்தை மாற்றமுனைந்தால் என்னவாகும் என்பதே இத்திரைப்படம்.

நினைத்துப்பாருங்கள்; உங்கள் வாழ்க்கையின் மிகமுக்கியமான இறந்தகாலத்துக்கு இப்போது உள்ள நீங்கள் சென்றால் என்ன செய்வீர்கள்? எடுத்துக்காட்டாக ஒரு ஐந்தாண்டுகளுக்குமுன் நீங்கள் ஒருகொலையைச் செய்கிறீர்கள். அதற்காக ஏழாண்டுகள் கடுங்காவல் தண்டனையும் பெறுகிறீர்கள். திடீரென இன்றைய உங்கள் நினைவுகள் ஐந்தாண்டுகளுக்குமுன் அந்த கொலை நடந்த இடத்திற்கும் நேரத்திற்கும் செல்கின்றது. அப்போது உங்களின் இன்றைய நினைவுகள் கொலையை நடக்கவிடாமல் செய்யமுயலுமல்லவா? அப்படியாக உங்கள் நினைவுகள் அந்த கொலையைத் தடுத்துவிட்டால் , அந்த கொலைக்குப்பின் உங்கள் வாழ்க்கையில் ஏற்பட்ட இந்த ஐந்தாண்டுகாலமானது மாறிவிடும். ஒரு புதிய எதிர்காலத்தை உருவாக்கிவிடுமல்லவா? ஆனால் உருவாகும் புதிய எதிர்காலமானது இந்த ஐந்தாண்டை விட மிகமோசமானதாக இருந்தால் என்ன செய்வீர்கள்? மீண்டும் இறந்தகாலத்துக்கு சென்று வேறு எதாவது செய்ய முயற்சிப்பீர்கள் அல்லவா? அதேதான் இந்த திரைப்படம்.

ஒருமுக்கிய முன்குறிப்பு – வித்தியாசமான திரைக்கதை கொண்ட திரைப்படங்களைப் பார்ப்பவர்கள் கீழே உள்ள கதையைப்படிக்காமல் படத்தைப் பார்த்துவிடுங்கள். ஏனெனில் இவ்விமர்சனத்தில் கிளைமேக்ஸ் தவிர மற்ற அனைத்துக்காட்சிகளையும் தெளிவாக கூறப்பட இருப்பதால் படித்துவிட்டு படம்பார்க்கும்போது படத்தின் முழுமையான எஃபெக்ட் உங்களை வந்தடையாது. படம் நிகழ்காலத்தில் துவங்கி இறந்தகாலத்திற்கு சென்று எதிர்காலத்தில் முடிகிறது. ஈவன் என்பவன் ஒரு மருத்துவமனைக்குள் எங்கெங்கோ ஓடுகிறான். அவனை சிலர் துரத்த அவன் ஒரிடத்தில் அமர்ந்து ஒருவிசயத்தை மிக அவசரமாக எழுதுகிறான். அதைத்தொடர்ந்து அவனது கடந்தகாலத்தை நோக்கி திரைப்படம் பயணிக்கிறது. ஈவனுக்கு சிறுவயதில் ஒரு பிரச்சனை; அவனுக்கு திடீரென்று சிலகணங்கள் என்ன நடந்ததென்று தெரியாமல் ப்ளாக் அவுட் ஆகிவிடுகிறது. மிகமுக்கியமான 5 நினைவிழப்புகளை இங்கே வரிசைப்படுத்திவிடலாம். பின்னே வரும் கதையை புரிந்துகொள்ள இந்த வரிசை உங்களுக்கு உதவும்.

1.   பள்ளியில் அவனுடைய ஆசிரியை அவன் தாயாரை அழைத்து ‘ஓவியம் வரையச்சொன்னால் உன்மகன் என்ன வரைந்திருக்கிறான் பாருங்கள்’ என்று ஒரு ஓவியத்தைக்காட்டுகிறார். அதில் கையில் கத்தியுடன் ஒருவன் இரண்டு பேரை கொலைச்செய்ததைப்போல் வரைந்திருக்க, ‘என்னடா மவனே இது?’ என்று கேட்கும் தாயிடம் ‘எனக்கு எதுவுமே தெரியாது’ என்கிறான். சரி இவனுக்கு ஏதோ பிரச்சனை என்று ஸ்கேன்னிங் எல்லாம் எடுத்துப்பார்க்கிறார் தாயார். மேலும் இம்மாதிரியான நியாபக மறதியைச்சரி செய்யும் நோக்கில் டைரி எழுதச்சொல்கிறாள்.

2.   ஒருமுறை அவனது தாயார் ஈவனை அவனுடைய தோழி கெய்லியின் தந்தையிடம் விட்டுச்செல்கிறார். கெய்லியின் தந்தையோ ஒரு Shithead  Person (அந்த கேரக்டரை வேறு எப்படி சொல்வதென்று தெரியவில்லை; வேண்டுமென்றால் ஒரு அரைபைத்தியம் பிடித்த சைக்கோ என்று வைத்துக்கொள்ளுங்கள்). அவன் தன் மகளையும் ஈவனையும் வைத்து படமெடுப்பதாகக் கூறுகிறான். மறுபடியும் நினைவு மறக்கிறது; விழித்துப்பார்த்தால் இரு குழந்தைகளும் நிர்வாணமாக இருக்கிறார்கள்.

3.   அடுத்ததாக ஈவன் மனநிலை மருத்துவமனையில் இருக்கும் தன் தந்தையைப் பார்க்க ஆசையாய் செல்கிறான். அவர்களிருவரும் பேசிக்கொண்டிருக்கும்போது மீண்டும் ப்ளாக் அவுட்; திடீரென பார்த்தால் அவனின்  சொந்த தந்தையே அவனை கொல்ல முயற்சிக்கிறார். அப்போது அவனின் தந்தை செக்யூரிட்டிகளால் தாக்கப்பட்டு இறக்கிறார். ஈவனுக்கு இப்போது டீன் ஏஜ் பருவம் துவங்குகிறது.


4.   கெய்லி, கெய்லியின் சகோதரன் டாம், ஈவனின் நண்பன் லென்னி ஆகியோர் ஒரு டைனமைட் வெடிகுண்டை ஒரு வீட்டின் போஸ்ட்பாக்ஸில் வைத்து வெடிக்கவைக்கிறார்கள். வெடிக்கும்போது மீண்டும் ஈவனுக்கு ப்ளாக் அவுட்.

5.   சிலநாட்களில் கெய்லியும் ஈவனும் காதலிப்பதை அறியும் கெய்லியின் சகோதரன்  டாம் கோவத்தில் ஈவனின் செல்லநாயை உயிரோட கொழுத்த முயற்சிக்கிறான். அதைத்தடுக்க போகும் ஈவனுக்கு இம்முறையும் ப்ளாக் அவுட்.

என்னடா இத்தனை ப்ளாக் அவுட் என்று காண்டாகதீர்கள்; இதுவரை நான் சொன்ன கதை வெறும் 25 நிமிடங்களில் நடப்பது மட்டுமே. மேலே சொன்ன நிகழ்வுக்குப்பின் ஈவனின் தாயார் அவனுடன் வேறொரு இடத்திற்கு குடிப்பெயர, கண்டிப்பாக கெய்லியை வந்து சந்திப்பதாக கெய்லியிடம் வாக்களித்துவிட்டு கிளம்புகிறான் ஈவன்; ஆனால் அவளைச்சந்திக்கவில்லை. காலங்கள் உருண்டோடுகிறது. கல்லூரியில் படிக்கும் ஈவன் ஒருநிகழ்வில் தன் பழைய டைரியை எடுத்துப்படிக்கிறான். அந்த டைரியில் குறிப்பிட்டிருக்கும் நிகழ்வு டாம், ஈவனின் செல்லநாயை எரிக்கப்போகும் நிகழ்ச்சிக்கு அவனை அழைத்துச்செல்கிறது. அங்கு என்ன நடந்தது என்பதை தெரிந்துகொள்கிறான். இது உண்மைதானா என்பதை கன்பார்ம் செய்ய ஈவனின் சிறுவயது தோழனான லென்னியிடம் செல்கிறான். அவன் ஏறத்தாழ மனதளவில் பாதிக்கப்பட்டவனாக இருப்பதை அறிகிறான்; மேலும் அந்நிகழ்ச்சியை உண்மை என்றும் அறிகிறான்.

அதன்பின் மீண்டும் வேறொரு டைரியை எடுக்கிறான். அதிலிருக்கும் நிகழ்வுகளுக்கு தன் நினைவை பயணிக்க வைக்கிறான். அதன்படி அவன் செல்லும் இடம் நால்வரும் இணைந்து டைனமைட்டை ஒரு வீட்டின் போஸ்ட்பாக்ஸில் வைத்தார்கள் அல்லவா? அங்கு செல்கிறான். அந்த இடத்தில் நடக்கும் நிகழ்வு என்னவெனில் போஸ்ட்பாக்ஸை நோக்கி அந்த வீட்டின் உரிமையாளரான ஒரு பெண் கைக்குழந்தையுடன் வருகிறது. ஏற்படும் வெடிவிபத்தில் இருவரும் மரணமடைகின்றனர். உடனே விழித்தெழும் ஈவன் தன்னுடைய இன்னொரு ப்ளாக் அவட்டான சிறுவயதில் கெய்லியுடன் நிர்வாணமாக இருந்ததைப் பற்றி அறிய அவளைச் சந்திக்கச்செல்கிறான். அவளுடைய வாழ்க்கையோ மிகப்பரிதாபமான நிலையில் இருக்கிறது. அவளிடம் வினவும் போது ‘என்னை ஏன் விட்டுச்சென்றாய்? உன்னை நம்பிதானே நான் என் தந்தையுடன் இருந்தேன். நீ மட்டும் இல்லையென்றால் என் தாயாருடன் எங்கோ தொலைதூரத்தில் சென்று நிம்மதியாக வாழ்ந்திருப்பேன்’ என்று அழுகிறாள். அன்று இரவே அவள் தற்கொலையும் செய்துகொள்கிறாள்.

இறந்தகாலத்திற்கு தன்னால் செல்லமுடிகிறதென்றால் அக்காலத்தையும் மாற்றமுடியும் என நம்பும் ஈவன் இம்முறை சிறுவயதின் அக்கோரமான நினைவுகளுக்கு தன் டைரியின்வழியே பயணிக்கிறான். அங்கு சென்று கெய்லியின் தந்தையை திட்டி, மிரட்டி விடுகிறான். நிகழ்வு முடிகிறது; கண்விழித்துப் பார்த்தால் இவன் ஒரு லேடிஸ் ஹாஸ்டலில் கெய்லியுடன் படுத்துக்கொண்டிருக்கிறான்; ஆம் எதிர்காலம் மாறிவிடுகிறது.  ஆனால் இங்கும் ஒரு பிரச்சனை. கெய்லியை தொல்லை செய்யாத அவளின் தந்தை கெய்லியின் சகோதரன் டாமை தொல்லை செய்து அவனை மனநோயாளியாக மாற்றிவிடுகிறான். ஈவனை வெறுக்கும் அவன் ஈவனுடன் சண்டையில் ஈடுபடும்போது  ஈவனால் கொல்லப்படுகிறான். ஜெயில் வாழ்க்கை.

ஜெயிலில் இருந்து தன் தாயிடம் கேட்டு தன் பழைய டைரியை வாங்கும் ஈவனுக்கு அங்கிருக்கும் ஹோமோசெக்ஸ் கைதிகளால் பிரச்சனை ஏற்படுகிறது. அதை சரிசெய்து அவன் இப்போது செல்லும் நினைவு டாம், ஈவனின் நாயை எரிக்கப்போகும் இடம். எப்படியும் டாம் எரிப்பதை முன்னாலே அறிந்திருக்கும் ஈவன் அதைத்தடுக்கும் பொருட்டு தன் நண்பனான லென்னியிடம் சில முன்னேற்பாடுகளை சொல்கிறான். நாயைக்கொழுத்தப்போகும் முன் லென்னி, டாமை கொன்றுவிடுகிறான். எதிர்காலம் மீண்டும் மாறிவிடுகிறது. இம்முறை ஈவன் கதையின் முதல்பாராவில் பார்த்த இடத்துக்கு வந்துவிடுகிறான். ஆனால் ஈவனின் நண்பன் லென்னி, மனநோயாளிக்கான மருத்துவமனையில் கட்டப்பட்டிருக்கிறான். அதேநேரம் தன் தந்தைக்கும் இப்படியான பிரச்சனைகள் இருந்ததை அறியும் ஈவன் தன் தந்தையிடம் உதவி கேட்க கடந்காலத்துக்கு பயணிக்கிறான். அங்கு அவன் தந்தையிடம் ஹெல்ப் கேட்க, அவரோ நீ என்னதான் மாற்றினாலும் யாரையாவது நீ இழந்தே ஆகவேண்டும். உன்னால் அது முடியாது, ஒழுங்காய் இதை விட்டுவிடு என்று கூற அதைக்கேட்காமல் நான் பார்த்துக்கொள்வேன் நீங்கள் ஐடியா கொடுங்கள் என்கிறான். இவனால் பெரும் ஆபத்து நிகழும் என்று ஊகித்த அவனது தந்தை அவனைக் கொல்ல வருகிறார். அதன்பின் நடப்பதை முன்பே பார்த்துவிட்டோம். செக்யூரிட்டிகளால் கொல்லப்பட்டு அவனது தந்தை இறக்கிறார்.

மீண்டும் நிகழ்காலத்துக்கு எவ்வித மாற்றமும் இல்லாமல் வரும் ஈவன் , கெய்லியைச் சந்திக்கச்செல்கிறான். அவளோ ஹிப்பியாக மாறிவிடுகிறாள் (ஹிப்பி கலாச்சாரம் என்றால் ஜாலியாக போதைமருந்துகள் எடுத்துக்கொண்டு தன் இஷ்டத்துக்கு வாழும் கலாச்சாரம் என்று சொல்லலாம்). இப்போது என்ன செய்யலாம் என்று யோசித்த ஈவன் இம்முறை செல்வது போஸ்ட் பாக்ஸில் பாம் வைத்த நிகழ்விற்கு. அங்கு சென்று கைக்குழந்தையுடன் இருக்கும் அப்பெண்ணை காப்பாற்ற முயலுகிறான். எதிர்காலம் மீண்டும் மாறுகிறது. இம்முறை டாம், ஈவனின் தோழனாக மாறுகிறான். அவன்தான் அப்பெண்ணையும் அக்குழந்தையையும் காப்பாற்றுகிறான் என்று எல்லோரும் புகழ்வதால் அவனுடைய தீய குணங்கள் மாறி நல்லவனாக மாறுகிறான் டாம். ஆனால் பெரிய பிரச்சனை என்னவென்றால் வெடிவிபத்தில் ஈவனின் இரு கைகளும் கால்களும் போய்விடுகிறது. இதைவிடக்கொடுமை என்னவென்றால் லென்னியும் கெய்லியும் காதலிக்கிறார்கள். சரி, நமக்கு என்னவானாலும் சரி, மற்றவர்கள் அனைவரும் நல்ல நிலமையில் இருக்கிறார்கள் என சந்தோஷமடையும் ஈவன் தன் தாயைச் சந்திக்கச்செல்கிறான். அவள் மருத்துவமனையில் கேன்சரினால் பாதிக்கப்பட்டு சாகும்நிலையில் இருக்கிறாள். இவனுக்கு கை,கால் போனதிலிருந்து சிகரெட் போன்ற போதைவஸ்துக்களின் பழக்கத்தால் இவள் இப்படி ஆகிவிட்டாள் என்பதை அறியும் ஈவன் இம்முறை எப்படியாவது எல்லாவற்றையும் சரிசெய்தாகிவிடவேண்டுமென கிளம்புகிறான்.

அவன் மீண்டும் செல்வது குழந்தைப்பருவ நிகழ்ச்சிக்கு. கெய்லியின் வீட்டில் அவளின் தந்தையை மிரட்டும் நிகழ்விற்கு செல்கிறான். ஏற்கனவே அந்த போஸ்ட் பாக்ஸில் வெடிக்கவைக்கப்படும் டைனமைட் கெய்லியின் வீட்டில் இருந்து எடுக்கப்பட்டது தான். அந்த டைனமைடை வைத்து பயமுறுத்தலாம் என்றெண்ணும் ஈவனின் கால்குலேசன் தவறாகிப்போக, வெடிவிபத்தில் சிக்கி கெய்லி இறந்துவிடுகிறாள். இவனை மனநோயாளியாக சிறையில் அடைத்துவைத்து விடுகிறார்கள். இப்போது பெரும் பிரச்சனை என்னவென்றால் அவனால் கடந்தகால நிகழ்வுகளுக்கு செல்லமுடியாது. ஏன் தெரியுமா? அவனுடைய டைரிகளை வைத்துத்தான் அவனால் பழைய நிகழ்வுகளுக்கு செல்லமுடிந்தது. ஆனால் கெய்லியின் வீட்டில் நடந்த நிகழ்வுகளுக்கு பின்தான் அவனது டைரியின் பெரும்பகுதி எழுதப்பட்டிருக்கும். ஆனால் கெய்லியின் வீட்டில் நடந்த வெடிவிபத்தினால் அவன் அப்போதே ஜெயிலில் அடைக்கப்பட்டுவிட்டான் என்பதால் டைரியை எழுதமுடியாது. இதையெல்லாம் எப்படி சரிசெய்து மீள்கிறான் என்பதே கிளைமேக்ஸ்.

   
க்ரப்பர், எரிக் ப்ரஸ் ஆகிய இருவரும் இணைந்து எழுதி, இணைந்து இயக்கியுள்ள இந்த திரைப்படம் வெளிவந்த ஆண்டு 2004. இருவரும் ஏற்கனவே ப்ளன்ட் எனும் திரைப்படத்தை எழுதிதயாரித்துள்ளனர். ஆனால் இருவரின் பெயரும் வெளியில் தெரிய மிகமுக்கியமான காரணம் FINAL DESTINATION திரைப்படத்தின் இரண்டாம் பாகம் தான். ஆம் அதை எழுதியவர்கள் இவர்களிருவரும் தான். அதைத்தொடர்ந்து இயக்கி வெளிவந்த இத்திரைப்படம் விமர்சனரீதியாக பலத்த அடிவாங்கியது. ஆனால் வசூல் ரீதியில் நல்ல ரிசல்ட். ஆனால் என்னைப்பொறுத்தவரை இத்திரைப்படம் விமர்சகர்கள் மத்தியில் கொண்டாடப்படாமல் போனதற்கு என்ன காரணம் என்று இதுவரை தெரியவில்லை. எல்லோரும் புரியவில்லை என்று சொல்வதுகூட அபத்தம். வலிமையான திரைக்கதையில் எளிமையான உத்தியைக் கையாண்டுள்ளனர்; அவ்வளவே.  

படத்தில் திரைக்கதையைத் தாண்டி கவனிக்கவைத்தவர் ஹீரோயின் எமி. ஒவ்வொரு காட்சியும் உள்வாங்கி நடித்துள்ளார். பாரில் வேலை செய்யும் பெண்ணாக, ஹிப்பியாக, ரிச்சான கல்லூரி பெண்ணாக, நல்ல தோழியாக, காதலியாக என அனைத்தையும் மிகச்சிறப்பாக செய்துள்ளார். பாரில் வேலைசெய்யும்போது தெரியாமல் பொருளை கீழே தவறவிட்டு அதை மீண்டும் எடுக்கும்போது அருகிலிருப்பவன் அவளின் பின்புறம் கையை வைத்ததும் உடனே கோவப்பட்டு, தன் நிலையை உணர்ந்து அமைதியாகி ஒரு வெறுமையான சிரிப்பை உதிர்த்து விட்டு நகரும் இடத்தில் க்ளாஸ். அதைத்தொடர்ந்து ஹீரோவை பலநாட்களுக்குப்பின் பார்த்ததும் முகத்தில் ஆச்சரியத்தைக்காட்டி, தொடர்ந்த காட்சிகளில் என்னை ஏன் விட்டுச்சென்றாய் என அழும்போது காட்டும் முகபாவங்களும் அருமை. ஹீரோவைச்சுற்றியே படம் நகர்ந்தாலும், ஹீரோவின் முகம் செட்டானாலும் நடிப்பு போதவில்லையோ என்று தோனும்படியான நடிப்பு ஆஷ்டனுடையது. ஆனால் எப்படியோ சமாளித்துவிடுகிறார். படத்தின் இசை, ஒளிப்பதிவு எல்லாம் ஒரு லோ பட்ஜெட் திரைப்படத்துக்குண்டானதே. கவனிக்கவைக்கும்படியானது எடிட்டிங். ஒரு காட்சியையும் மிஸ் செய்யாமல் தெளிவாய் கத்தரித்து ஒட்டியுள்ளார் பீட்டர்.

திரைப்படம் பார்க்கும்முன் கவனிக்கவேண்டியவை – படத்தின் ஓரிடத்தில் நிர்வாணக்காட்சி வருகிறது (ஹீரோயினோடது இல்ல). டீன் ஏஜில் இருக்கும் இருக்கும் ஹீரோவும் ஹீரோயினும் முத்தமிடும் காட்சி வருகிறது. ஹீரோவின் நண்பராக வரும் ஒரு காட்ஜில்லா மேட்டர் செய்யும் காட்சி இரண்டு இடத்திலும், ஹீரோவின் நண்பரும் ஹீரோயினும் மேட்டர் செய்யும் ஒரு காட்சியும் இடம்பெறுகிறது. அதனால் குடும்பத்துடன் பார்ப்பதைத் தவிர்ப்பது நல்லது. முடிந்தால் சென்சார் கட்டுடன் கூடிய ப்ரிண்ட் தரவிறக்கிக்கொள்ளவும். இதைத்தவிர படத்தை ஆரம்பித்துவிட்டால் நடுநடுவே PAUSE செய்துவிட்டு போவதைத்தவிர்க்கவும். முழுதிரைப்படத்தையும் ஒரே மூச்சில் பார்த்துவிடுவது நலம்.




Saturday, 12 March 2016

காதலும் கடந்து போகும் - சினிமா விமர்சனம்



சில பிறமொழித்திரைப்படங்களைப் பார்க்கும்போது ‘ச்சே! இப்படி ஒரு மேக்கிங் தமிழ்ல இல்லயே’ என்று நம்மையே ஃபீல் பண்ணவைத்துவிடும். ஆனால் அந்த மொழியில் எடுக்கப்பட்ட திரைப்படங்கள் நம் மொழியில் ரீமேக் செய்யப்படும்போது கொத்திக்குதறி கொத்துப்பரோட்டா போட்டு கொடுப்பார்கள். என்னடா இது என்று நம்மை பந்தாடாத குறையாக தியேட்டரைவிட்டு அனுப்பி வைப்பார்கள். ஆனால் ஒரு திரைப்படத்தின் மூலக்கதையை மட்டும் வைத்து அதை அழகியல் காட்சிப்படுத்தலுடன் ஸ்மூத்தாக நகர்த்தியிருக்கிறார் நலன் குமாரசாமி.


குறும்படத்திலிருந்து சினிமாவிற்கு வந்தவர்களில் முதல் திரைப்படத்திலேயே கமர்சியல் ரீதியாகவும் சரி, விமர்சன ரீதியாகவும் சரி; உச்சத்திற்கு சென்ற முதல் டைரக்டர் நலன். 2013-ல் சூது கவ்வும் வந்தபோது எப்படியாவது முதல்நாளே பார்த்துவிடவேண்டும் என்று நைட்ஷோ சென்று பார்த்தபோது ‘ஓ.கே. தமிழ்சினிமாவின் எதிர்காலம் இந்த திரைப்படத்தின்மூலம் வேறு லெவலுக்கு நகர்த்திச் செல்லப்படபோகிறது’ என்று மனதினுள் பிக்ஸ் செய்தேன். அதேபோல் அதைத்தொடர்ந்து எடுக்கப்பட்ட பல புதுமுக இயக்குநர்களின் திரைப்படம் மட்டுமில்லாமல் பல மூத்த இயக்குநர்களும் தங்களின் திரைப்படங்களில் திரைக்கதைக்கு முக்கியத்துவம் கொடுக்க ஆரம்பித்தார்கள். இதற்கு எடுத்துக்காட்டாக எண்ணற்ற திரைப்படங்களைக்கூறலாம். கிட்டத்தட்ட ஒரு ட்ரென்ட் செட்டர் திரைப்படம் என்றுகூட சூதுகவ்வும் திரைப்படத்தைக் கூறலாம். அப்படியொரு திரைப்படத்தைக்கொடுத்த இயக்குநர் மூன்றாண்டுகளாக திரைப்படம் எடுக்காமல் இருந்தது மன்னிக்கமுடியாத குற்றம்.


அடுத்து என்ன திரைப்படம் எடுப்பார் என்று எல்லோரும் எதிர்பார்த்துக்கொண்டிருக்கும்போது காதலும் கடந்து போகும் என்று யாருக்கும் தெரியாமல் படத்தை எடுத்து படக்கென்று ரிலிஸ் செய்துவிட்டார். முதல் திரைப்படத்தில் டார்க் ஹுயூமரை அள்ளித்தெளித்த ஒரு இயக்குநர் இரண்டாவதாக ரொமான்டிக் மூவி என்றதும் எனக்கே ஒருநிமிடம் பக்கென்றாகிவிட்டது. சரி, எப்படியும் சினிமாவை நன்கு ரசித்து வந்தவர் எடுக்கும் திரைப்படம் கண்டிப்பாக ஏமாற்றாது என்றுதான் தியேட்டருக்குச் சென்றேன்.

விழுப்புரத்திலிருந்து தந்தையிடம் கெஞ்சி வேலைக்காக சென்னை வருகிறார் யாழினி. ஒரு பெரிய கம்பெனியில் வேலை பார்த்துக்கொண்டிருக்கும் யாழினியின் கம்பெனி திடீரென இழுத்து மூடப்படுவதால் கொஞ்ச நாட்களில் கையிருப்பு குறைய ஆரம்பிக்கிறது. வேலை போன விசயத்தை வீட்டிற்கு தெரியப்படுத்தாமல் அடுத்த வேலையைத்தேடுகிறார். இன்னொருபுறம் வீட்டை காலிசெய்துவிட்டு ஒரு லோக்கலான ஏரியாவில் வீடுஎடுத்து கம்மி வாடகையில் தங்குகிறார். அந்த வீட்டின் எதிர் வீட்டில் கதிர் எனும் அடியாள் இருக்கிறார். யாழினியின் வாழ்க்கையில் கதிர் செய்யும் மாற்றங்களே இத்திரைப்படம்.


படத்தின் கதையைவிட காட்சியமைப்பும் திரைக்கதையையுமே செம ஸ்ட்ராங். ஒரு குளிர்ச்சியான கஸாட்டா ஐஸ்கீரிமை சாப்பிடும்போது தோன்றும் எண்ணங்களை அப்படியே இந்த படம் நம் மனதுக்குள் கடத்துகிறது. சின்னச்சின்ன அழகான விசயங்களாகட்டும், ஒவ்வொருத்தரின் கேரக்டரைசேசனாகட்டும்; முடிந்தவரை நுணுக்கமாக காட்டியிருப்பது பாராட்டத்தக்கது. ஒவ்வொரு காட்சியும் ஐஸ்க்ரீம் சாப்பிடுவதைப்போல் பொறுமையாக ரசித்துப்பார்த்தால் படம் உங்களுக்கு மிகமிகப்பிடிக்கும். அழகியல் ஒளிப்பதிவு மட்டுமின்றி, காட்சியிலும் திரைக்கதையிலும் அந்த உத்தியைக்கையாண்டிருக்கிறார் நலன்.


கதிர் எனும் கேரக்டர் விஜய் சேதுபதியை மனதில் வைத்தே உருவாக்கப்பட்டிருக்கவேண்டும். படம் முழுக்க கதிர் எனும் பாத்திரம் தெரியாமல் நமக்கு விஜய் சேதுபதி என்பவரே தெரிகிறார். பாரில் 4 பேருடன் சண்டை போடச்சென்று அவர்களிடம் செம அடிவாங்கி கீழே விழுந்தவுடன் படக்கென்று எழுந்து வேகவேகமாக பாரைவிட்டு கெத்தாக வெளியேறும் காட்சியில் தியேட்டரில் விசில் சவுண்ட் ஸ்க்ரீனையே கிழித்துவிடும்போலிருக்கிறது. அதே நான்கு பேரை மீண்டும் ஸ்கெட்ச்(!) போட்டு அடிக்கும்போது கைத்தட்டாமல் இருக்கமுடியவில்லை. ஹீரோவும் ஹீரோயினும் சரக்கடிக்கும் காட்சி தமிழ்சினிமாவில் பழசு என்றாலும் ஹீரோயினின் க்யூட்-காக அந்த காட்சி எத்தனைமுறை பார்த்தாலும் சலிக்காது. ஹீரோயினை அழகென்றும் சொல்லமுடியாது; மொக்கை என்றும் சொல்லிவிடமுடியாது. இரண்டுக்கும் இடைப்பட்ட ஒருவிதமான அழகு. நடிப்பிலும் விஜய் சேதுபதிக்கு இணையாக நடித்துள்ளார். ஹேர்ஸ்டைல்  இருவருக்குமே அருமை.

படத்தின் சில காட்சிகள் செல்வராகவன் ஸ்டைல் மேக்கிங் என்றும் சொல்லலாம். ஆனால் ஓவராலாக பார்க்கும்போது கொஞ்சம் புதுமையாக இருக்கும். சந்தோஷ் நாராயணனின் இசையைப் பற்றி தனிக்கட்டுரை எழுதவேண்டும். என்னைப்பொறுத்தவரை சந்தோஷ்நாராயணனின் பிண்ணனி இசை அமைக்கும் திறமைக்கு கண்டிப்பாக ஹாலிவுட் திரைப்படங்களுக்கே செல்லலாம். ஒரு வேர்ல்ட் கிளாஸ் பிண்ணனி இசையை அசால்டாக தமிழில் கொடுத்துள்ளார். ஒரு இடத்தில்கூட படத்தைத்தாண்டிய இசையைக்கொடுத்து நான் பெரிய இசைமேதை என்று காட்டிக்கொள்ளாமல் , படத்திற்கு என்ன தேவையோ அதை சரிவரக்கொடுத்துள்ளார்.  படத்தைப்பார்க்கும்போது ஒரு கூலிங்கான ஃபீலிங் உங்களுக்குத்தோன்றும்; அதற்கு முக்கியமான இரு விசயங்கள் ஒளிப்பதிவும் பிண்ணனி இசையுமே ஆகும். தினேஷ்குமாரின் ஒளிப்பதிவு படத்திற்கு பெரும்பலம். படத்தின் வசனங்கள் படத்தின் ப்ளஸ்களில் மற்றொன்று. டார்க் ஹுயூமரை ஆங்காங்கே தூவிவிட்டது அட்டகாசம். எடுத்துக்காட்டாக இன்டர்வயூ காட்சியில் விஜய் சேதுபதி செய்யும் அட்டகாசங்களைக் கூறலாம்.



சரி படத்தில் மைனஸே இல்லையா என்று கேட்பவர்களுக்கென்று ஒரு விசயத்தை விட்டுவைத்துவிட்டார் நலன். அது கிளைமேக்ஸ் ; வலிந்து திணிக்கப்பட்டது போன்றதொரு கிளைமேக்ஸ். நான் ரீசன்டாக பார்த்த திரைப்படங்களிலே இது தான் எனக்கு அன்சாட்டிஸ்பைட் கிளைமேக்ஸ் என்றும் சொல்லலாம். அட்டகாசமாக நெகட்டிவ்வாகவோ, பாஸிட்டிவாகவோ முடிய வேண்டிய திரைப்படத்தை, எதற்கும் சம்பந்தமில்லாத ஒரு கிளைமேக்ஸை வைத்து பத்தில் ஒன்றாக கடந்துபோகவைக்கும் திரைப்படமாக்கிவிட்டார் என்றே சொல்லவேண்டும். கிளைமேக்ஸ் தவிர்த்துப் பார்த்தால் கண்டிப்பாக கொண்டாடக்கூடிய திரைப்படம்தான் இது; ஆனால் பொறுமை மிக முக்கியம் அமைச்சரே!!!

Friday, 11 March 2016

RATATOUILLE – சினிமா விமர்சனம்



அது 2005 என்று நினைக்கிறேன்; பத்தாம் வகுப்பு படித்துக்கொண்டிருக்கும்போது நான் படித்துக்கொண்டிருந்த  பள்ளிக்கு, அருகிலுள்ள கல்லூரியில் இருந்து எம்.பி.ஏ மாணவர்கள் தங்களின் ப்ராஜெக்ட்காக புத்தகங்களை விற்க வந்தார்கள். “Whitakers world of facts” எனும் அப்புத்தகத்தின் வண்ணப்படங்களைப் பார்த்ததுமே வாங்கிவிடவேண்டும் என்ற ஆவல் எனக்குள் மலர்ந்தது. மேலும் அக்காலக்கட்டத்தில் பொது அறிவிலும் புத்தகங்கள் படிப்பதிலும் எனக்கு அதீத ஆர்வம். எட்டாம் வகுப்பு படிக்கும்போதே கல்லூரியில் பி.ஏ. ஹிஸ்டரி படித்துக்கொண்டிருந்த என் சித்தப்பாவின் வரலாற்றுப் புத்தகங்களையெல்லாம் படித்து முடித்துவிட்டேன் என்றால் பார்த்துக்கொள்ளுங்களேன். காமிக்ஸ், அரசியல் வரலாற்றுக்கட்டுரைகள், ஆச்சரியங்கள், அதிசயங்கள், விண்வெளி என எதைப்பற்றிய செய்தி கிடைத்தாலும் படித்துவிட்டுத்தான் மறுவேலை. அப்படியொரு அறிவுப்பசியில் (இப்போ இல்ல; அப்போ) திளைத்துக்கொண்டிருந்த எனக்கு அப்புத்தகம் பெரும் பொக்கிசமாகவே பட்டது. ஆனால் விலை கொஞ்சம் அதிகம்; எப்படி வாங்குவது?


அன்று வீட்டிற்கு வந்ததுமே என் நாடகத்தை அரங்கேற்ற ஆரம்பித்தேன்; முகத்தை சோகமாக வைத்துக்கொண்டு சாப்பிடுவதைக்கூட விரும்பாதவனாக வீட்டில் உலாவினேன். என் முகத்தைப் பார்த்ததுமே அகத்தில் ஏதோ பிரச்சனை என்றுணர்ந்த என் அன்னையார் தனியே அழைத்து என்னவென்று கேட்க ‘விடும்மா’ என்று மீண்டும் சோகமாய் பிகு பண்ணினேன். அப்படி சொன்னால்தான் மீண்டும் துருவித்துருவி கேட்பார்கள் என்று எனக்குத் தெரியும். மீண்டும் கேட்கும்போது கண்ணில் ஆவலுடன் புத்தகத்தைப் பற்றி கூறினேன். எங்கள் வீட்டில் அவ்வளவு எளிமையாக பணம் தந்துவிடமாட்டார்கள். தினமும் பள்ளிக்குச் செல்ல டிப்ஸ் 1 ரூபாயிலிருந்து 2 ரூபாயைத் தாண்டிவிடாது. ஆனால் இரண்டே இரண்டு விசயங்களுக்கு மட்டும் எவ்வளவு ஆனாலும் தந்துவிடுவார்கள். ஒன்று உணவு; மற்றொன்று படிப்பு.


புத்தகம் என்றதும் பணத்தைத் தந்துவிட்டார்கள். அன்றைய நாள் பள்ளிக்கு போகும்போது பெருமகிழ்ச்சி மற்றும் மிடுக்குடன் சென்றேன். என்னவோ அந்த புத்தகத்தின்மீதான ஈர்ப்பு என்னை ஒருவழி ஆக்கிவிட்டிருந்தது. புத்தகத்தை அன்று வாங்கியபின் உடனே திறந்து பார்க்கவில்லை. தம்பிகளுடன் சேர்ந்து திறந்துபார்க்கவேண்டும் என்ற எண்ணம். ஒரு அவஸ்தையான சந்தோசத்துடன் அன்றைய நாளைக்கடத்திவிட்டு மாலையில் வீட்டுக்கு வந்ததும் தம்பிகளுடன் சேர்ந்து கண்ணை மூடிக்கொண்டு ஒரு பக்கத்தைத் திருப்பினோம். சரி,  இந்த ப்ளாஷ்பேக்கை இங்கேயே நிறுத்திவிட்டு திரைப்படத்திற்கு செல்லலாம்.


ரெமி எனும் எலியின் கதை இது. இயற்கையாகவே முகர்ந்து மணத்தை வைத்தே உணவு எப்படியானது என்பதைக் கண்டறியும் திறமை வாய்ந்த ரெமி, தன் குடும்பம் மற்றும் குழுவுடன் ப்ரான்சின் ஒரு கிராமப்பகுதியில் ஒரு வீட்டில் வசித்துவருகிறது. ரெமியைப்பொறுத்தவரை தான் எலியாக பிறந்ததைவிட தங்கள் குழுவினருக்கு உணவைப்பற்றிய விழிப்புணர்வே இல்லாமல் கண்டதைச்சாப்பிடுகிறார்களே என்ற வருத்தம் அதிகம். மனிதர்களைப்போல் நாமும் உணவைச்சமைத்து ரசித்து, ருசித்து சாப்பிடவேண்டும் என்று நினைக்கிறது ரெமி. ரெமியிடம் இருக்கும் திறமையைச் சரிவரபுரிந்துகொள்ளாமல் ரெமியின் தந்தை ரெமியை பாய்சன் செக்கராக பயன்படுத்துகிறார். இவர்கள் வசிக்கும்வீட்டின் சமையலறையில் அவ்வப்போது சென்று உணவைத் திருடும் ரெமி டி.வியில் குஸ்டோ எனும் சமையல்கலைஞரின் சமையல்நிகழ்ச்சியைப் பார்க்கிறது.  அவரின் ஹோட்டல் 5 ஸ்டார்களைப் பெற்று பாரிசின் சிறந்த ரெஸ்டாரன்டாக இருக்கிறது. குஸ்டோவின் தாரக மந்திரம் “ANYONE CAN COOK”. அதே பெயரில் ஒரு புத்தகத்தை எழுதியிருக்கிறார் குஸ்டோ. அதிர்ஷ்டவசமாக அந்த புத்தகம் ரெமி வசிக்கும் வீட்டிலேயே இருக்கிறது. அதைப்பார்த்து சமையலின் அனைத்துக்கலைகளையும் தியரிட்டிக்கலாக கற்றுக்கொள்கிறது ரெமி. குஸ்டோவை  துரோணராக நினைத்து சமையல்கலையில ஒரு ஏகலைவனாக மாறுகிறது ரெமி.  சிலநாட்களில் குஸ்டோவின் ரெஸ்டாரன்டிற்கு கொடுக்கப்பட்ட ஐந்து ஸ்டார்களில் ஒன்று குறைக்கப்படுகிறது; அதேநேரம் குஸ்டோவும் இறந்துவிடுகிறார். இச்சமயத்தில் எதேச்சையாக வீட்டு ஓனரிடம் எலிகள் மாட்டிக்கொள்ள தப்பிக்கும் முயற்சியில் ரெமி தன் குடும்பத்தையும் குழுவையும் பிரிந்து விடுகிறது. அப்போது அதன் இமாஜினரி தோழராக குஸ்டோ தோன்றி ரெமியை வழிநடத்துகிறார்.     


குஸ்டோவின் வழிகாட்டுதலின்பேரில் ரெமி குஸ்டோவின் ரெஸ்டாரன்டை அடைகிறது. அங்கு ஸ்கின்னர் எனும் தலைமை குக்கின் மேற்பார்வையில் குஸ்டோவின் ரெஸ்டாரன்ட் நடைபெற்று வருகிறது. குஸ்டோவின் இறந்தபின் அவரது ரெஸ்டாரன்ட் மேலும் ஒரு ஸ்டாரை இழந்து 3 ஸ்டார் ஹோட்டலாக மாறிவிடுகிறது. ரெமி அங்கு சென்ற நேரம் லுங்குய்னி எனும் வாலிபனைக் காண்கிறது. ரெஸ்டாரன்டின் கழிவுகளை அகற்றும் நபராக பணியமர்த்தப்படும் லுங்குய்னி, யாருக்கும் தெரியாமல் அங்கு தயாராகிக்கொண்டிருந்த சூப்பில் ஏதேதோ போட்டு நாஸ்தியாக்கிவிடுகிறான். சூப்பின் வாசத்தை வைத்து அது நாசகதியிலிருப்பதை உணரும் ரெமி, தன் திறமையைப் பயன்படுத்தி யாருக்கும் தெரியாமல் அந்த சூப்பை சரிசெய்யமுயலுகிறது. அது சரிசெய்வதை லுங்குய்னி பார்த்துவிடுகிறான். அதேநேரத்தில் லுங்குய்னி சூப்பை கிளறியபோது பார்த்துவிடும் ஸ்கின்னர், லுங்குய்னியை வாங்கு வாங்கென வாங்கிக்கொண்டிருக்கும்போது தவறுதலாக அந்த சூப் ரெஸ்டாரன்டில் ஒருவருக்கு பரிமாறப்படுகிறது. அந்த நபர் ஒரு உணவு விமர்சகர். அவர் சூப் பிரமாதம் என சொல்ல, லுங்குய்னியை பரிசோதிக்க முடிவெடுக்கிறார் ஸ்கின்னர். அதேநேரத்தில் எலியைப் பார்த்துவிடும் ஸ்கின்னர், அதை கொன்றுவிடும்படி லுங்குய்னியிடம் கட்டளையிட, அவன் அதைக்கொல்லாமல் அதனிடம் டீல் பேசுகிறான். டீலின்படி ரெமி லுங்குய்னிக்கு உதவ ஆரம்பிக்கிறது. ஆனால் எப்படி?


ஏதேதோ முயற்சிகளுக்குப்பின் ரெமியும்  லுங்குய்னியும் ஒரு ஐடியாவைக் கண்டறிகிறார்கள். லுங்குய்னியின் தலைமுடியை ஸ்டியரிங்காக பயன்படுத்தி ரெமி அவனை இயக்க ஆரம்பிக்கிறது. அதன்மூலம் கிச்சனில் அவன் தொப்பிக்குள் ஒளிந்துகொண்டு அவனை இயக்கி சமைக்க ஆரம்பிக்கிறது. குஸ்டோ ரெஸ்டாரன்டின் புகழ் பரவுகிறது; லுங்குய்னியின் புகழும் தான்.

ஒருகட்டத்தில் குஸ்டோவின் வாரிசுதான் லுங்குய்னி எனும் உண்மையைக் கண்டறியும் ஸ்கின்னர், குறுக்கு வழியில் அவனை ரெஸ்டாரன்டை விட்டுத் துரத்த முயற்சிக்கிறார். இதை அறியும் ரெமி குஸ்டோவின் வாரிசு லுங்குய்னி என்பதற்கான டி.என்.ஏ ரிப்போர்டை ஸ்கின்னரிடம் இருந்து பறித்து லுங்குய்னியிடம் தந்து அவனை ஓனராக மாற்றுகிறது. அதன்பின் பேரும்புகழும் அடையும் லுங்குய்னிக்கும் ரெமிக்கும் ஒரு கட்டத்தில் பிரச்சனை வருகிறது. லுங்குய்னியின் மீதான கடுப்பில் இருக்கும் ரெமி ஏதேச்சையாக தன் குடும்பத்தையும் குழுவையும் கண்டறிகிறது.


குஸ்டோ ரெஸ்டாரன்டின் புகழ் மீண்டும் பரவ, அது ஆன்டன் ஈகோ எனும் உணவு விமர்சகரின் காதை எட்டுகிறது. இவர்தான் குஸ்டோவின் 5 ஸ்டார் ரெஸ்டாரன்ட் 4 ஸ்டாராக மாற காரணமானவர். இவரை திருப்தி படுத்துவது மிகக்கடினம். அவர் லுங்குய்னியைச் சந்தித்து உன் உணவுத்திறமையை நாளை என்னிடம் வெளிப்படுத்து என்கிறார். ஆனால் அன்றிரவு ரெமிக்கும் லுங்குய்னிக்கும் பிரச்சனை பெரிதாக , கோவமான ரெமி தன் குடும்பத்தையே கிச்சனுக்கு அனுப்பி கிடைத்ததைத் திங்க சொல்கிறது. என்னதான் இருந்தாலும் ரெமியிடம் தான் நடந்துகொண்டது தவறு என உணரும் லுங்குய்னி அதனிடம் மன்னிப்பு கேட்க வருகிறான். ஆனால் ரெமி தன் குடும்பத்தையே அழைத்துவந்து திருடுவதைப் பார்க்கும் லுங்குய்னி கோபத்தில் ரெமியைத் திட்டி அனுப்பிவிடுகிறான். இன்னொருபுறம் சோகமாக வெளியேறிய ரெமியை ஸ்கின்னர் கடத்திவிடுகிறான். அடுத்தநாள் ஆன்டன் ஈகோ வர, என்ன நடந்தது என்பது கிளைமேக்ஸ்.


நல்ல உணவு, நல்ல புத்தகம், நல்ல சினிமா இவை மூன்றும் நம்மை கடந்தகாலத்துக்கு உடனே அழைத்துச்சென்றுவிடும். எடுத்துக்காட்டாக நீங்கள் திரையரங்கில் பார்த்த நல்ல சினிமாவை எப்போதாவது நினைவுக்குக்  கொண்டுவந்தால் அந்த சினிமா மட்டும் நினைவுக்கு வராது. அதனுடன் அன்றைய நாளில் அந்த சினிமாவை நீங்கள் பார்க்கும்முன் நடந்த நிகழ்வுகளும் நினைவுக்கு வரும். நான் சின்ன வயசில் தீவிர கேப்டன் ரசிகன். அவருடைய வல்லரசு திரைப்படம் வந்தபோது அதைப்பார்க்க எங்கள் குடும்பத்துடன் (ஒரே டி.வி.எஸ் 50-ல் 5 பேர்) சென்ற காட்சிகள் அப்படியே நினைவுக்கு வருகின்றது. முன்னே இருக்கும் கேப்பில் நானும் என் நடுத்தம்பியும் அமர, அப்பா ஓட்ட, அம்மாவின் மடியில் கடைசித்தம்பியுடன் வண்டியில் செல்லும்போது ஏதோ நான் ப்ளைட் ஓட்டும் விமானிபோல் வண்டியைப் பிடித்துக்கொண்டு ‘த்ர்ர்ர்ர்ர்ர்ரு’ என்று சவுண்டு விட்டுக்கொண்டே போனது இப்போது நினைவுக்கு வருகிறது. திரையரங்கில் இடைவேளையில் 1 ரூபாய்க்கு 5 முறுக்கு என வாங்கி தம்பியிடம் இருந்து கடலை உருண்டைக்கு எக்ஸ்சேஞ்ச் செய்தது; கேப்டன் சுவரில் கால்வைத்து விடும் பேக் கிக்கைப் பார்த்து அதே போல முன்னால் இருப்பவர் மண்டையில் உதைத்தது என அந்நினைவுகள் என்றும் மறக்கமுடியாதவை. இத்தனைக்கும் அப்போது எனக்கு என்ன வயதிருக்கும் என்பதைக்கூட என்னால் யோசிக்கமுடியவில்லை.


இதேபோல் பார்த்திபன் கனவு புத்தகம்; நான் பனிரென்டாம் வகுப்பு படிக்கும்வரை விடுமுறை என்றாலே எனது பெரியம்மாவின் வீட்டுக்கு சென்றுவிடுவது வழக்கம். அங்கு தறிக்கு பாவு போடும் தொழில் செய்வார்கள். நான் பாவுக்கான நூல்கட்டை சுற்றிக்கொண்டிருப்பேன். பத்தாம் வகுப்பு விடுமுறையில் செல்லும்போது என் சின்ன அண்ணன் பார்த்திபன் கனவு புத்தகத்தை கொண்டுவந்தார். காலை 7 மணிக்கு நூல்கட்டை சுற்றிக்கொண்டே அதைப்படிக்க ஆரம்பித்த நான் 11 மணிக்கு தான் சாப்பிடவே போனேன் முடித்துவிட்டு. எப்போது 8.30 மணிக்கே சாப்பிட்டுவிடும் நான் சாப்பாட்டைக்கூட மறந்துவிட்டு படித்துக்கொண்டிருந்தேன். அதன்பின் வாங்கிய திட்டுகள் மறந்தாலும் ‘இவனுக்கு என்ன ஆச்சு?’ என்று மனதினுள் நினைத்தவாறே கிட்டத்தட்ட ஐந்தாறுமுறை சாப்பிட அழைத்த பெரியம்மாவின் பரிதாபமான முகம் இன்றும் மறக்காது. இதேபோல் அங்கு நான் தங்கியிருந்த காலங்களில் என் கேர்ள் பிரண்ட்  தந்தையின் பழைய புத்தகக்கடையும் என்றும் மறக்கவே மறக்காது; அங்குதான் இரும்புக்கை மாயாவியிலிருந்து கிட்டத்தட்ட 500-க்கும் மேற்பட்ட காமிக்ஸ்களைப் படித்திருப்பேன். இதேபோல் நல்ல உணவுக்கான எடுத்துக்காட்டாக இட்லியைக்கூறுவேன். இப்போது கூட என் பேவரைட் இட்லி தான் . இட்லியைப் பார்த்ததும் ஒருகாலத்தில் தனியொருவனாக இருந்து 46 இட்லிகளை ஒரேவேளையில் சாப்பிட்ட நினைவு கண்டிப்பாக வந்துவிடும்.


எதற்கு இப்படி என் சரிதத்தைக்கூறி உங்கள் நேரத்தை வீணாக்கிக்கொண்டிருக்கிறேன் என்றால் படத்தின் கிளைமேக்ஸ் பற்றி கூறவே. ஆன்டன் ஈகோ, ரெமியின் உணவைச்சாப்பிடும்போது தன் சிறுவயது நினைவுக்குப்போவார் அல்லவா? அந்த நேரத்தில் நானும் மெய்மறந்தேன். அந்த நேரத்தில் நான் முதல் மூன்றுபேராவில் சொன்னேன் அல்லவா ? அந்த நினைவுக்குள் சென்றேன். நான் என் தம்பிகளோடு சேர்ந்து திறந்தபோது நான் பார்த்த முதல் புகைப்படம் இத்திரைப்படத்தைப் பற்றியது. அதில் ரெமியும் லுங்குய்னியும் சமைத்துக்கொண்டிருக்கும் காட்சி. இந்த படத்த எப்படியாச்சும் பாக்கனும்டா என்று என் தம்பியிடம் நான் கூறியது நினைவுக்கு வந்தது. ஆம்; என்றோ நான் பார்க்கவேண்டும் என்று நினைத்து மறந்த ஒரு திரைப்படம் என் வாழ்க்கையின் அதிஅற்புதமான ஒரு நிகழ்வை நினைவுக்குக்கொண்டுவந்தது. என்னை அறியாமலே ஐந்து நிமிடம் ஒரு சிறுபையனைப்போல் உணர்ந்தேன். சாரி, விமர்சனத்துக்குப் போகலாம்.

படத்தின் கதையைப் பற்றி பார்த்தாயிற்று; டெக்னிசீயன்களைப் பற்றியும் இசையைப்பற்றியும் பார்க்கலாம் என்றால் இந்த பதிவு இன்னும் பத்து மடங்கு அதிகமாகும். பிக்சார் நிறுவனத்தின் படைப்பு என்பதனால் தரத்து ஒருதுளிகூட குறைவில்லை. ரெமி தன் குடும்பத்தைப் பிரிந்தபின் குஸ்டோவின் வழிகாட்டுதலைத்தொடர்ந்து பாரிஸின் அன்டர்க்ரவுண்டில் ஓடி மேலே வரும் காட்சியில் வரும் அனிமேசன் ஒன்று போதும் தரத்தை விளக்க; அதி அற்புதமான அனிமேசன் . அதேபோல் படத்தின் திரைக்கதையும் எந்த இடத்திலும் தொய்வில்லாமல் வேகவேகமாக முன்னேறிப்போய்க்கொண்டே இருக்கிறது. படத்தின் மையக்கரு யார்வேண்டுமானாலும் வெற்றிபெறலாம் என்பதே; இன்னும் சிம்பிளாக சொல்லவேண்டுமெனில் 3 இடியட்ஸ் ,சாரி நண்பன் திரைப்படத்தில் வரும் ‘உனக்கு பிடிச்ச துறைய தேர்ந்தெடுத்துக்க; அதுல உன் திறமைய வளத்துக; வெற்றியத்தேடி நீ ஓடாத; வெற்றி உன்னத்தேடி தானா வரும்’ என்பது தான். அனிமேசன் ரசிகர்கள் மட்டுமின்றி மற்றவர்கள் உட்பட அனைவரும் கண்டிப்பாக தவறவிடக்கூடாத படம். இந்த திரைப்படத்தை ஏற்கனவே பார்த்து, இதை மிக விரும்பியவர்களுக்கு நான் பரிந்துரைக்கும் மற்றொரு திரைப்படம் The Hundred Foot Journey (2014). இதுவும் உணவு சம்பந்தமான அருமையான திரைப்படம்.



பின்குறிப்பு – பிக்சார் பற்றி ஹாலிவுட் பாலா அண்ணனின் மின்புத்தகம் யாரிடமாவது இருந்தால் அதை எனக்கு அனுப்பிவைக்கும்படி தாழ்மையுடன் கேட்டுக்கொள்கிறேன். Mail ID – Joinmegu@gmail.com

Thursday, 3 March 2016

NTR’s 25- NANNAKKU PREMATHO – சினிமா விமர்சனம்


(முன்குறிப்பு – இக்கட்டுரை திரைப்படம் வந்தபோது எழுதியது.  வேலைப்பளுவின் காரணமாக போஸ்ட் செய்ய இயலவில்லை. இது கொஞ்சம் பெரிய கட்டுரை. ஆனால் போர் அடிக்காமல் செல்லும் என நினைக்கிறேன். எனக்கு கட்டுரையெல்லாம் வேண்டாம், திரைப்படத்தைப்பற்றி மட்டும் பார்த்தால் போதும் என்பவர்கள் கடைசி 6 பாராவை மட்டும் படியுங்கள்.)



தெலுகு சினிமா என்றாலே நம் ஊர் ஆட்களுக்கு சிறிது இளக்காரம் என்றே சொல்லலாம். ‘என்னய்யா  படமெடுக்கறாய்ங்க? கிளிப்பச்ச கலர் சட்ட, கடல்நீல கலர் ஃபேண்டுல அவிய்ங்கள பாத்தாலே சிரிப்பு தாங்கல. இது போதாதுனு பண்ணுவானுங்க பாரு ராவடி, குதிரைய படுக்கப்போட்டு வீலிங் அடிக்கறது, தொடய தட்டி முன்னாடி போற ரயில்ல ரிவர்ஸ்ல போக வைக்கறதுனு யப்பா! ஆளவிடுங்கடா சாமி’ என்பதே பெரும்பாலோனோர் தெலுகு சினிமாக்களைப் பற்றிய பொது அபிப்ராயமாக இருக்கும். காரணம் நம் ஆட்கள் தெலுகு திரைப்படங்களில் இதுமாதிரி வரும் அட்டுக் காட்சிகளை மட்டும் காட்டிவிட்டு இதுதான் தெலுங்கு படம் என்ற முடிவுக்கு உடனுக்குடன் வந்துவிடுவதே. என்னிடம் யாராவது வந்து பக்காவான கமர்ஷியல் படம் ஏதாவது இருந்தால் சொல்லுங்கள் பார்க்கவேண்டும் என்று கேட்டால் , அவர்களுக்கு நான் பரிந்துரைப்பது தெலுங்கு சினிமாக்களாகத்தான் இருக்கும்.


தெலுகு சினிமாக்களுக்கென்று ஒரு எழுதப்படாத விதி உள்ளது;  படம் முடியும்முன்பு கடைசியில் தேவையே இல்லையெனினும் கண்டிப்பாக ஒரு குத்து சாங்  இருந்தே ஆகவேண்டும்; பெரிய ஹீரோ என்றால் படுபயங்கரமான பில்டப்புடன் ஓப்பனிங் காட்சி இருக்கவேண்டும்; சிரஞ்சீவி குடும்பத்து ஆட்கள் எனில் கண்டிப்பாக ஒரு இன்ட்ரோ சாங் போட்டே ஆகவேண்டும். அதன்பின் ஹீரோவின் குடும்ப அறிமுகம், நண்பர்களுடன் சேர்ந்து காமெடி, ஹீரோயின் இன்ட்ரோ, ஹீரோயினுடன் லவ்; இதற்கிடையில் பிட்டுபிட்டாக நாலைந்து  ஆட்கள் ‘ரேய்! எக்கட உண்ணார்ரா’னு அடித்தொண்டையில் இருந்து கத்திக்கொண்டு யாரையோ (!) தேடுவதும் நடக்கும். அவர்களெல்லாம் வில்லனின் ஆட்கள் என்று நான் சொல்லவேண்டியதில்லை. ஹீரோவும் வில்லனின் ஆட்களும்  சந்திக்கும்போது ஒரு ஃபைட். அதில் ஹீரோ , வில்லனின் ஆட்களை டி-20-யில் கிறிஸ் கெய்ல், சிக்ஸ் விலாசுவது போல் பறக்கவிட்டதும் இடைவேளை. இடைவேளை முடிந்தபின் ஒரு ப்ளாஷ்பேக்; ப்ளாஷ்பேக்கை தொடர்ந்து வில்லனுக்கும் ஹீரோவுக்குமான மறைமுக மோதல். ப்ளாஷ்பேக் காட்சிகளிலோ அல்லது ப்ளாஷ்பேக் முடிந்த பின்னோ கண்டிப்பாக பிரம்மானந்தம் வந்துவிடுவார். கடைசியில் வில்லனை அழித்து சுபம். இதிலும் ஒரு ட்விஸ்ட் என்னவென்றால் ஹீரோ, நேராக வில்லனைக்கொன்று விட்டால், அவர் ஒரு அன்டர்கவர் காப் என்பதனை ஊகித்துக்கொள வேண்டும்.


இது டைப்-1 எனில் இன்னொன்று உள்ளது. அது ஒரு பெரிய வீடு, ஊரே மதிக்கும் பெரிய மனிதர். அவருக்கு மனதில் ஏதாவது பிரச்சனை இருக்கும். அதனால் வீடே பொலிவிழந்து காஷ்மீர் பார்டரில் காவல்காக்கும் எல்லைப்படையினரைப் போல் ஆளாளுக்கு  இயந்திரத்தனமாக இருப்பார்கள். கண்டிப்பாக அந்த வீட்டில்தான் ஹீரோயின் இருப்பார். ஹீரோயினுக்கு உதவ ஹீரோ வருவார். அந்த வீட்டில் உள்ள அனைவரையும் திருத்தி நல்வழிப்படுத்தி ‘ஆசைஆசையாய் இருக்கிறதே! இது போல் வாழ்ந்திடவே’ என்பது போன்று ஒரு பாட்டைப் போட்டு முடித்துவிடுவார்கள். இந்த டைப்பில் உள்ள முக்கிய விசயம், ஹீரோ உலகளவில் பெரும்பணக்காரராக இருக்கும் ஒருவரின் மகனாகத்தான் வரவேண்டும்.


தெலுகில் வரும் 80% கமர்ஷியல் திரைப்படங்களை மேற்கூறிய இரண்டு டைப்களில் அடக்கிவிடலாம். ஆனால் திரைக்கதை? ஒரே கதையைப் பலமுறை திருப்பிப்போட்டு எடுத்தாலும் அதன் ப்ரெஷ் மாத்திரம் குறையாமல் பார்த்துக்கொள்வது தான் தெலுகின் ஆகச்சிறந்த செயல் என்றே கூறுவேன். உங்களுக்கு டவுட்டாக இருக்கும்பட்சத்தில் அத்தாரின்டிக்கு தாரேடி, சன் ஆஃப் சத்யமூர்த்தி, ஸ்ரிமந்துடு, கோவிந்துடு அந்தரிவாடலே, ப்ருந்தாவனம் போன்ற படங்களையும் விக்ரமார்க்குடு, தூக்குடு, பாஷா,  போக்கிரி, ராமய்யா வஸ்தாவய்யா போன்ற படங்களையும் பாருங்கள்.


என்னதான் தெலுகு திரைப்படங்களில் ஒரே கதையாயிருந்தாலும் அது எடுக்கப்படும் விதங்கள் ஹீரோக்களுக்கு ஏற்றவாறு மாறுபட்டுக்கொண்டே இருக்கும். எவ்வளவு மொக்கையாக எடுக்கப்பட்டிருந்தாலும் மினிமம் ஒருமுறையாவது பார்க்கும் அளவிற்காவது எடுத்து விடுவார்கள். அதேபோல் தெலுங்கில் ஹீரோக்களும் ஓரளவு பார்க்கும் வண்ணமும், தாருமாறான நடனத்திறமைகளும் , உடலளவில் பிட்னெஸ்ஸுடனும் இருப்பார்கள். தெலுகில் இருக்கும் ஒரே தலையாய பிரச்சனை என்னவெனில் வாரிசு சினிமா. இப்போதைய காலகட்டத்தில் தெலுங்கில் சினிமா அறிமுகம் இல்லாத ஒரு குடும்பத்தில் இருந்து ஒருவர் ஹீரோ ஆவதென்பது, சூரியனில் ஆழ்துளை கிணறு போட்டு நீர் எடுத்து, அதில் பருப்புசாம்பார் செய்வது போன்றதொரு இயலா காரியம். ஆனால் ஒருவிஷயம்; ஒரு ஹீரோவை ஆந்திரவாலாக்களுக்கு பிடித்துவிட்டால் அவருக்காக உயிர்விடவும் துணியுமளவிற்கு டைஹார்ட் ரசிகர்கள் சூழ்ந்திருக்கும் மாநிலம் ஆந்திராவும், தெலுங்கானாவும் தான். இந்தியாவில் அதிக எண்ணிக்கையில் தியேட்டர்கள் இருப்பதும் அங்குதான்.


சரி இப்போது மேட்டருக்கு வருவோம். என்.டி.ஆர் -  இவர் பெயரைக் கேள்விப்படாதவர்கள் தென்னிந்திய அளவில் யாரும் இருக்கமாட்டார்கள். நம் எம்.ஜி.ஆரைப் போல் ஆந்திர மக்களின் திலகமாக இருந்து அரசியலில் தனக்கென்று ஒரு இடம்பிடித்து, அழிந்துகொண்டிருந்த டோலிவுட்டிற்கு உயிரூட்டி , ஆந்திர மக்களின் நெஞ்சங்களில் இன்றும் ‘பெத்தத் தேவுடு’ வாக வாழ்ந்து கொண்டிருக்கும் பெயர் இது. அவருக்கு 8 மகன்கள், 4 பெண்கள். இதில் 4-வது மகனான ஹரிகிருஷ்ணா திரைத்துறையில் நடிக்க ஆரம்பித்த காலம் தெலுங்கு சினிமா வரலாற்றின் கருப்புப்பக்கங்கள் என்றே சொல்லலாம். ‘அவன விடாதீக, கொல்லுக’ என்று வருத்தப்படாத வாலிபர் சங்கத்தில் சொல்லும் காதல் தண்டபாணி, அவருடைய இளமைக்காலத்தில் ஹீரோவாக நடித்திருந்தால் எப்படியிருக்குமோ அப்படியிருக்கும் ஹரிகிருஷ்ணாவின் படங்கள். கன்னட ஹீரோக்களையோ அடித்துண்ணும் அளவிற்கு பர்சனாலிட்டியுடன் ஹரிகிருஷ்ணா களமிறங்கிய படங்களைப் பார்த்து சீதபேதியில் ஆந்திரமக்கள் தவித்த காலமும் உண்டு. ஆந்திரமக்களை அவதிக்குள்ளாக்குவதை விரும்பாத பெரியவர் மகனை ராஜ்யசபை எம்.பி ஆக்கி அனுப்பிவிட்டார். ஹரிகிருஷ்ணாவின் தொல்லைகளுக்கு பாலகிருஷ்ணாவே தேவலை என்றெண்ணிய மக்களுக்கு அப்போதைய நிலையில் சீரஞ்சீவி அருமையாகத்தெரிய மெகாஸ்டார் ஆனார் சீரஞ்சீவி. பாலகிருஷ்ணாவோ ‘நேன் புட்டிண்தி’ என்று தொடர்ந்தாற்போல் டயலாக் பேசிப்பேசி தொடையைத் தட்டித்தட்டி புண்ணாக்கிக்கொண்டே போனார். இருந்தாலும் பெரியவரின் மானம் காத்த பிள்ளையாய் அவர் திரையுலகில் விளங்கினார்.


ஹரிகிருஷ்ணாவுக்கு இரண்டு மனைவிகள். முதல் மனைவியை ஊரறியத்திருமணம் செய்திருந்த ஹரிகிருஷ்ணா , இரண்டாம் மனைவியைத் தனிமைப்படுத்தியே வைத்திருந்தார். இரண்டாம் மனைவிக்குப் பிறந்தவர்தான் தரக் ராம். பின் என்ன பிரச்சனையாலோ இரண்டாம் மனைவியை முழுவதுமாக ஒதுக்கிவைக்க ஆரம்பித்தார். அப்போதைய காலகட்டத்தில் ஜூனியர் என்.டி.ஆர் குடும்பத்தைக் கவனிக்க யாருமில்லை. ஜூனியரின் தாய், தனியே வேலைக்குச் சென்று தன் மகனை வளர்த்து வர, இதைக்கேள்விப்பட்ட பெரியவர் ஜூனியரைத் தன்னுடனே அழைத்துச்சென்றார். ஆனால் சின்னவரை பெரியவரின் குடும்பத்தில் யாரும் ஆதரிக்கவில்லை. இருந்தாலும் பெரியவருக்கு ஜூனியரைப் பார்த்ததும் ஒரு நம்பிக்கை வந்தது. தனக்குப் பின் தன் பெயரைக் காப்பாற்றப்போவது இவன் என்றெண்ணி தரக் ராம் எனும் பெயரை நந்தமுரி தரக் ராமாராவ் எனமாற்றி உண்மையான ஜூனியராக்கினார். தாத்தா இருக்கும் வரை ஓரளவு அவப்பெயரிலிருந்து தப்பித்துக்கொண்டிருந்த ஜூனியரும் அவர் தாயாரும், தாத்தாவின் இழப்பிற்குபின் நிராதரவானார்கள்.


அக்காலக்கடத்தில் ஜூனியரின் தாயார் ஒரு சூளுரை எடுத்ததாகக்கூறப்படுகிறது. எந்த குடும்பத்தில் தன்னையும் தன் மகனையும் ஏற்கவில்லையோ, அதே குடும்பமே வந்து தங்களை மீண்டும் அழைத்துப்போகச் செய்வேன் என்பதே அது. அதற்காக ஜூனியரைத் தயார் படுத்தினார் அந்த அம்மையார். சிறுவயதிலிருந்தே நடனத்தின் மீது தீராக்காதல் கொண்டிருந்த ஜூனியரை குச்சிப்புடி நடனவல்லுநராக மாற்றினார். பிறப்பினாலேயே இருந்த நடிப்புத் தாகமும் மிதமிஞ்சி இருக்க நடிப்புதான் தன்னுடைய இலக்கு என்பதை ஜூனியரின் ஆழ்மனதில் விதைத்தார். இடையிடையே தாத்தா இருக்கும்போது சிறுவன் கேரக்டரில் நடித்துக்கொண்டிருந்த ஜூனியர், தாத்தாவின் டைரக்சனில் வெளியான ராமாயணம் திரைப்படத்திற்காக சிறந்த குழந்தைநட்சத்திரத்திற்கான தேசியவிருது வாங்கினார். அப்போதைய காலகட்டத்தில் இயக்குநர் குணசேகர்(ருத்ரமாதேவி இயக்குநர்) பரிந்துரையின் பேரில் ராஜமௌலியைச் சந்தித்தார் ஜூனியர். இருவரும் இணைந்து படம் செய்வதாக முடிவெடுத்த ஆண்டு 1999. ஆனால் ஜூனியருக்கு முதலில் வந்த திரைப்படம் நின்னு சூடாளனி (2001). முதல் படம் வெளியாகும்போது ஜூனியரின் வயது 18.  படம் அட்டு ப்ளாப். யாருடா பால் குடிக்கிற அமுல்பேபிய ஹீரோவா போட்டு படமெடுத்தது என்றளவிற்கு விமர்சனம். ஹீரோயினைப் போல் மூன்று மடங்கு சைசில் இருக்கும் ஹீரோவைப் பார்த்ததும் இவர் ஹரிகிருஷ்ணா பார்ட்-2 என்று மக்கள் தெறித்தோட ஆரம்பித்தார்கள்.


ஆனால் அதை மாற்றினார் ராஜமௌலி. ப்ளான் செய்த மாதிரி என்.டி.ஆரின் நடிப்பில் ராஜமௌலி தன் முதல் திரைப்படமான ஸ்டூடன்ட் நம்பர்.1ஐ இயக்கினார். ஓரளவு ஃபேமஸாக இருந்த எம்.எம்.கீரவாணி இசையில் பாடல்கள் வெளியாகி அனைத்தும் செம ஹிட் அடிக்க, பாடல்களுக்காகவே படம் தாருமாறாக ஓடியது. அதே ஆண்டில் வெளிவந்த சுப்பு எனும் திரைப்படமும் பேரைக் கெடுக்காமல் ஓரளவு காப்பாற்றிக் கொடுத்தது. அதன்பின் 2002-ல் வெளிவந்து என்.டி.ஆரின் முதல் ஆக்சன் ப்ளாக்பஸ்டர் ஆதி. விவிவி-யின் இயக்கத்தில் வெளிவந்து அந்த ஆண்டின் பாக்ஸ் ஆபிசை அடித்துத் துவைத்துப் போட்டது. அதே ஆண்டில் வெளியான அல்லரி ராமுடு ஒரு ஆவரேஜாக அமைந்தது. ஜூனியர் என்.டி.ஆர் வளரும் நடிகர்களில் அதிவேகமாக வளர்ந்து வருபவராக மாறினார்.


மீண்டும் ராஜமௌலியுடன் இணைந்த சிம்மாத்ரி 2003-ல் வெளிவந்து ஆந்திராவைத் தாக்கியது. ‘நூ விசிலேஸ்தே ஆந்த்ரா சோடாபுட்டி’ பாடலில் என்.டி.ஆரின் ஆட்டத்தைப் பார்த்து அதிர்ந்தது ஆந்திரா மட்டுமல்ல; முழுக்க முழுக்க ஆக்சனை மட்டும் முன்னிலைப்படுத்தி எடுக்கப்பட்ட இத்திரைப்படம் என்.டி.ஆரின் மிக முக்கியமான மூன்று படங்களில் ஒன்று எனலாம். இதன்பின் பூரி ஜெகந்நாத் இயக்கத்தில் வெளியான ஆந்த்ராவாலா பெரும் எதிர்பார்ப்புகளுக்கிடையே பெரிய பட்ஜெட்டில் வெளியாகி மரண ப்ளாப் ஆகியது (இதற்கு காரணம் பூரி ஜெகந்நாத்தின் ராசி எனலாம். பூரி படம் எடுத்தால் ஒன்று மெகா ப்ளாக்பஸ்டர் ஹிட் அல்லது படுபயங்கர ப்ளாப் எனும் இருவகையிலே அடங்கும்). அதன்பின் தொடர்ந்தாற்போல் மூன்று ப்ளாப்களைத் தெவிட்டத் தெவிட்டக் கொடுத்தார் என்.டி.ஆர்.  அதன்பின் அசோக் எனும் திரைப்படம் வந்து ஓரளவு என்.டி.ஆரின் பெயரைக் காப்பாற்றியது.  அதைத்தொடர்ந்து வந்த ராக்கி பெயர் சம்பாதித்தாலும் பாக்ஸ் ஆபிசில் அவுட்.


இம்முறை மீண்டும் ராஜமௌலி வந்தார். இருவரும் யமதொங்கா-வில் இணைந்தனர்.  ஜூனியர் என்.டி.ஆரின் சினிமா வாழ்க்கையை அவர் உருவத்தை வைத்து இரு காலக்கட்டங்களாக பிரிக்கலாம். யமதொங்காவிற்கு முன், யமதொங்காவிற்கு பின். முன் அவர் உருவத்தைப் பார்த்தால் செந்திலைப் பார்த்தது போல் இருக்கும். உருட்டுக்கட்டையைப் போல் பார்க்க தந்தையின் ஜெராக்ஸாக இருந்தவர் 30 கிலோ எடையைக் குறைத்து எலும்பும்தோலுமாய் வந்தார். யமதொங்காவில் நடித்ததும் சிம்மாத்ரியில் நடித்ததும் ஒருவரே என்று கூறினால் நம்புவதற்கே கடினமாய் இருக்கும்படியான உருவமாற்றம். அதுமட்டுமா? என்.டி.ஆரின் நடனத் திறமையை உலகறியச்செய்த படமென்றால் அது யமதொங்கா தான். ரம்பாவுடன் வரும் டிஸ்கோ பாடலில் என்.டி.ஆர் போட்டிருக்கும் ஸ்டெப்களில் பத்து சதவீதம்தான் எல்லாபுகழும் பாடலில் விஜய் போட்டிருப்பார் எனில் என்.டி.ஆரின் டான்ஸ் எப்படி இருந்திருக்கும் என்று நினைத்துப்பாருங்கள். டான்ஸ் மட்டுமில்லாமல் நடிப்பிலும் தன்னை மேன்மேலும் இம்ப்ரூவ் செய்த என்.டி.ஆர் , ஒரு முழுப்படத்தையும் தான் ஒருவன் மட்டுமே தாங்க முடியும் என்பதை ஸ்க்ரீன் ப்ரசென்ஸில் காண்பித்த திரைப்படம் எமதொங்கா.


அதைத்தொடர்ந்து 2008-ல் வெளிவந்த கான்ட்ரி ஊத்திக்கொள்ள திடுதிப்பென்று ஓராண்டு நடிப்புக்குத் தடைவிதித்து விட்டு தாத்தாவின் கட்சியான தெலுங்கு தேசத்தில் இணைந்து கட்சிக்காக பிரச்சாரம் செய்யக்கிளம்பினார். பிரச்சாரம் முடிந்துவிட்டு வரும் வழியில் ஒரு பெரிய விபத்து நடந்து பலத்த காயங்களுடன் ஆஸ்பத்திரியில் அனுமதிக்கப்பட்டார் (பின்குறிப்பு – கட்சியில் ஏற்றுக்கொள்ள காரணம் சந்திரபாபு நாயுடுவுக்கு என்.டி.ஆரின் மீது மிகுந்த மரியாதை இருந்தது. மேலும் நாயுடுவின் உறவினர் மகளை என்.டி.ஆர் மணமுடித்திருந்தார் என்பதும் குறிப்பிடத்தக்கது. ஆனால் நந்தமுரி குடும்பத்தில் ஏற்றுக்கொள்ளவில்லை). அந்த விபத்திலிருந்து என்.டி.ஆரின் பொதுவாழ்க்கை மாறியது எனலாம். அன்றிலிருந்து இன்றுவரை தன் திரைப்படங்களில் ‘குடி, குடியைக்கெடுக்கும்’ என்று சொல்வதற்குமுன் ‘சாலைகளில் பார்த்து பயணியுங்கள்; உங்களுக்காக உங்கள் குடும்பம் காத்துக்கொண்டிருக்கும்’ என்று அட்வைஸ் சொல்லாமல் படத்தை ஆரம்பிக்கமாட்டார்.


இரண்டாண்டு இடைவெளிக்குப் பின் 2010-ல் வெளிவந்த ப்ருந்தாவனம், அதுர்ஸ் இரண்டும் தாருமாரு ஹிட் அடித்து என்.டி.ஆரை மீண்டும் உச்சத்திற்கு கொண்டுவந்தது. டாப் 3 நடிகர்களில் ஒருவரான என்.டி.ஆர் அதே காலகட்டத்தில் பொது வாழ்விலும் மிக முக்கியமான இடத்தைத் தக்கவைத்துக்கொள்ள ஆரம்பித்தார். சித்தப்பா பாலகிருஷ்ணா எம்.எல்.ஏ ஆகி மக்களுக்கு தொண்டு செய்தார் என்றால், இவரோ தன் ஆதரவாளர்களை எம்.எல்.ஏ ஆக்கி தொண்டு செய்தார். கட்சியில் தனக்கென்று தனியிடம் பிடித்துக்கொண்ட என்.டி.ஆர் , பெரியவரைத் தெய்வமாக நினைக்கும் மக்கள் மனதிலும் ‘சின்னத் தேவுடு’ என்றழைக்கும் வண்ணம் பெயர் பெற்றார்.


அதன்பின் தென்னிந்திய அளவில் பெரிய பட்ஜெட்டில் படம் செய்யலாம் என்று இயக்குநர் மெஹர் ரமேஷை அனுகினார் ஜூனியர். இவர் ஒரு கர்நாடக்ககாரர். என்.டி.ஆரின் ஆந்த்ராவாலா திரைப்படத்தைக் கன்னடத்தில் இயக்கியவர். எதுக்கு சம்பந்தமே இல்லாம கன்னடத்துக்காரரிடம் ஜூனியர் என்.டி.ஆர் படம் கொடுத்தார் என்று யோசிக்கத்தோன்றுகிறதா? ஜூனியர் என்.டி.ஆரின் தாயார் கர்நாடகத்தைச்  சார்ந்தவர். 2011-ல் வெளிவந்தது சக்தி. தமிழ், தெலுங்கு, கன்னடம், மலையாளம், இந்தி என 5 மொழிகளில் வெளியாக முதல் வாரம் தாருமாறாக ஓடி இரண்டாவது வாரம் தியேட்டரை விட்டு ஓடியது. அதே ஆண்டு ஊசரவெள்ளி ரிலிசாகி ஆவரேஜாக ஓடியது (இதைத்தான் வேதாளமாக்கி ப்ளாக்பஸ்டராக்கினார் சிவா).


என்ன செய்யலாம் என்று யோசித்துக்கொண்டிருந்த என்.டி.ஆரிடம் வந்தார் போயபட்டி சீனு. இவர் ஆந்திராவின் ஹரி+பேரரசு இணைந்த கலவை. பாலகிருஷ்ணாவுக்கு சிம்மா எனும் அல்டிமேட் ஹிட்டைக் கொடுத்து டோலிவுட்டைக் கதிகலக்கியவர். அவ்வெற்றியின் சூடு தணிவதற்குள்ளே என்.டி.ஆரிடம் ஓ.கே செய்துவிட்டார். கீரவாணியின் பாடல்கள் அனைத்தும் செம குத்து குத்தியிருக்க, அதை டவுன்லோட் செய்து கேட்ட எனக்கு வீடியோ சாங் பார்க்கும் ஆவல் வர, வீடியோ சாங் எங்கும் கிடைக்காமல் போக, படத்தையே டவுன்லோட் செய்து பார்த்தேன். நான் பார்த்த முதல் என்.டி.ஆர் திரைப்படம் தம்மு. படத்தை சும்மா ஓட்டி ஓட்டி பார்க்க, ஒரு பேரதிர்ச்சியைக் கண்டு தொண்டை விக்கித்து நின்றேன். ஹீரோவுக்கும் வில்லனுக்குமான சண்டையில் என்டிஆர் 4 அடி நீள அருவாளை வைத்து பறந்தவாறே ஒரு சுழற்று சுற்றி வில்லனை நோக்கி வீச, வில்லனோடு சேர்ந்து தென்னைமரம் துண்டாக சரியும். அடப்பாவிகளா என்று விழுந்து விழுந்து சிரித்தேன். முதல் பாராவில் சொன்ன லைன் நியாபகம் வருகிறதா? அதே மனநிலையில்தான் நானும் அப்போது இருந்தேன். ஆனால் யதேச்சையாக தம்மு திரைப்படத்தை முழுவதுமாக பார்க்கும்போது அந்த பனைமரம் வெட்டும் காட்சி எனக்கு சிரிப்பை மூட்டவில்லை; மாறாக சரியான மசாலா காட்சியாகவே தெரிந்தது. அதன்பின் ஊசரவெள்ளி பார்த்து என்.டி.ஆர் ரசிகனாக மாறியது பெருங்கதை.


ஆந்திர உணவு சாப்பிட்டால் ஒன்று புரியும்; அவர்கள் இனிப்பு செய்தால் அதீத இனிப்பாக இருக்கும்; காரமென்றால் அதீத காரமாக இருக்கும். எதிலும் அதிகமாக விரும்புவார்கள் திரைப்படத்திலும் அந்த வழக்கத்திற்கு மாறான அதீதத்தை வெளிப்படுத்துகிறார்கள். அவ்வளவே! இதை உலகமகாக்காரணமாக கொண்டு நாம் அவர்களை மட்டம் தட்டுகிறோம். ஆனால் இந்தித் திரையுலகமே ஆந்திரப்படங்களை ரசித்து, ருசித்துப் பார்த்துக்கொண்டிருக்கிறது. அதுமட்டுமல்லாமல் எந்த படத்தை சுட்டு நடிக்கலாம் என்று பல கான்கள் பரிதவித்துக்கொண்டிருக்கார்கள்.


சரி மீண்டும் நடப்புக்கு வருவோம். போயபட்டி சீனுவுடன் இணைந்த தம்முவும் ஆவரேஜ் சக்ஸஸையே கொடுக்க உடனடியாக ஒரு சூப்பர்ஹிட் தேவைப்பட்டுக்கொண்டிருந்த என்.டி.ஆர் இம்முறை அனுகியது சீனு வைட்லா. சீனு வைட்லா எப்படி என்றால் கதை என்னவென்று இவரிடம் கேட்கவே தேவையில்லை. ஏனென்றால் எல்லா படமும் ஒரேமாதிரியாக எடுக்கும் படுபயங்கர இயக்குநர் இவர். டான் சீனுவானாலும் சரி, தூக்குடுவானாலும் சரி; ஒரே கதை. ஆனால் ப்ளாக்பஸ்டர் ஹிட்டுக்கு இவர் கேரண்டி. தூக்குடுவை பாலிஷ் செய்து இவர் பாஷாவை இயக்கினார். தமன் இசையில் பாடல்கள் ஒருபக்கம் தாருமாறாக ஹிட் அடிக்க, இன்னொருபுறம் என்.டி.ஆரின் ஸ்டைலிஷ் ஆக்சன் மற்றும் ப்ரம்மானந்தம்+நாசர்&கோ உடனான என்.டி.ஆரின் காமெடியால் படம் பெரிய வசூல் சாதனை செய்தது. இப்படத்திற்குப்பின் ஜப்பானில் சூப்பர்ஸ்டாரைத் தொடர்ந்து ரசிகர்மன்றம் என்.டி.ஆருக்கு அமைத்தார்கள். பாஷாவின் ஹிட்டைத் தொடர்ந்து இந்துவில் ஒரு ப்ரத்யோகமான கட்டுரையில் சூப்பர்ஸ்டாரின் அடுத்த போட்டி ஜுனியர் என்.டி.ஆர் என்ற தலைப்பில் வெளிவந்த கட்டுரை என்.டி.ஆரை உயரத்திற்கு தூக்கிச்சென்றது. அதேநேரத்தில் இந்த காலகட்டத்தில் நந்தமுரி குடும்பத்திற்கு போதாத காலம் எனலாம். பாலகிருஷ்ணாவிற்கு வழக்கம்போல லயன், சிம்மா கைக்கொடுத்தாலும் குடும்ப உறுப்பினர்களான கல்யான்ராம் போன்றோர் சினிமாவில் பலத்த அடி வாங்கியிருந்தார்கள். மற்றொருபுறமோ அல்லு குடும்பத்தினர்களான (அல்லது சிரஞ்சீவி குடும்பத்தவர்)  அல்லு அர்ஜூன், ராம் சரண், பவன் கல்யாண் போன்றோர் அடுத்தடுத்து ஹிட்டடித்து நந்தமுரி குடும்பத்தையே ஒதுங்கவைத்துவிட்டார்கள். இப்படியொரு நிலையில் நந்தமுரி குடும்பத்தினரின் பெயரைக் காக்கும் ஒரே ஆளாக என்.டி.ஆர் மாத்திரமே விளங்கினார். அதனாலோ என்னவோ பாலகிருஷ்ணாவுக்கு எப்போதும் இல்லாத கரிசனம் என்.டி.ஆரின் மீது விழுந்து ‘வாடு நா வம்சத்து மகாடு’னு ஓப்பன் பேட்டி கொடுத்து அணைத்துக்கொள்ள ஆரம்பித்தார். எந்த குடும்பம் ஒதுக்கியதோ அதே குடும்பம் மீண்டும் ரெட்கார்பெட் போட்டு அணைத்துக்கொண்டது. அதே நேரத்தில் தன்னை ஒதுக்கியவர்கள் என்று அவர்கள்மீது என்றும் வஞ்சத்தோடு என்.டி.ஆர் இருந்ததில்லை. இதற்கு சான்றாக இப்போது திரைக்கு வரவிருக்கும் தோழா திரைப்படத்தை கூறலாம். நாகார்ஜூனா, கார்த்தி இணைந்து நடிக்கும் இத்திரைப்படத்தில் முதலில் கமிட்டான என்.டி.ஆர் , பாலகிருஷ்ணாவுக்கும் நாகார்ஜூனாவுக்கும் இருக்கும் பழையபகையை நினைவில் கொண்டு திரைப்படத்திலிருந்து விலகிவிட்டார்.


ஆனால் மீண்டும் பழைய குருடி கதவத்தொரடி என்பதுபோல் ஹைடெக் படத்திலிருந்து விலகி ஒரு பழிவாங்கும் கதையைத் தேர்ந்தெடுத்தார் என்.டி.ஆர். கப்பர்சிங் (தபாங் தெலுங்கு ரீமேக்) புகழ் ஹரிஷ் இயக்கிய இந்த படத்தை பார்க்கவிரும்புபவர்கள் நேரே பிரபாஸ் நடித்த மிர்ச்சி படத்தை சிடியில் வாங்கி பார்த்துவிடுவது நலம்; அந்த படத்திற்கும் இந்த படத்திற்கும் ஏழே ஏழு வேற்றுமைகள் தான். மத்தபடி அதே படத்தை, அதே மெத்தேடில், அதே கதையை வைத்து என்.டி.ஆருக்கு வேட்டு வைத்தார் ஹரிஷ். சரி, போய்த்தொலையுது அடுத்ததாவது ஒழுங்கான படமாக பிடிக்கலாம் என்றெண்ணி ரபாஷாவில் சைன் செய்தார் என்.டி.ஆர். ரபாஷா ஏதோ தப்பித்து ஓடியது போன ஜென்மத்தில் என்.டி.ஆர் செய்த புண்ணியம் எனலாம்.


உடனடி ப்ளாக்பஸ்டர் மீண்டும் தேவைப்பட, அதேநேரத்தில் பூரி கையில் ஒரு கருத்தாழமிக்க கதையுடன் வந்து சேர்ந்தார். பூரி ஜெகந்நாத்துடன் இணைவது ஒருசக்கர சைக்கிளில் இங்கிருந்து காஷ்மீருக்கு போவது போன்றது. போய் சேர்ந்தால் பெரும்புகழ்; பாதியிலே விழுந்தால் பலத்த அடி. ரிஸ்க்கை எடுத்தார் என்.டி.ஆர். அதுவரை ஸ்லிம்மாக இருந்தவர் திடுதிப்பென்று சிக்ஸ்பேக்குடன் வந்து நிற்க ஒருங்கிணைந்த ஆந்திரா ஸ்தம்பித்தது. குங்க் ஃபூ பாண்டா திடுதிப்பென்று சிக்ஸ் பேக் உடலுடன் வந்து நின்றால் ஆச்சரியப்படாமல் இருக்கமுடியுமா? டெம்பர் வெளியாகி மீண்டும் என்.டி.ஆரின் வெற்றிக்கணக்கைத் துவக்கிவைத்தது. டெம்பர் முடிந்ததும் யோசித்தபோது தான் தன்னுடைய 25-வது படம் அடுத்தது என்ற நினைவுக்கு அவருக்கு வந்தது. ஒரு மாஸ் ஹீரோவாக உலாவரும் என்.டி.ஆர் இம்முறை தேர்ந்தெடுத்தது த்ரில்லர்+குடும்பக்கதை. அதுதான் நானாக்கு ப்ரேமதோ. 


ஒரு சின்ன கேப். இதுவரை என்.டி.ஆர் நடித்த திரைப்படங்களை ஓரளவு வரிசைக்கிரமமாக பார்த்துவிட்டோம். ஆனால் அவர் எப்படி திரைப்படங்களை சூஸ் செய்கிறார் என்பதையும் ஒரு பத்தியில் பார்த்துவிடலாம். தெலுங்கில் ஹீரோக்கள் தங்களின் படங்களை தேர்ந்தெடுப்பது செம காமெடியாக இருக்கும். தான் ஒரு படத்தை ஹிட் கொடுக்கவேண்டுமெனில் இப்போது பேமஸாக இருக்கும் ட்ரென்ட் எதுவோ அதை அப்படியே மாற்றம் செய்யாமல் எடுத்து ஹிட்டாக்கிவிடுவது. இம்மாதிரிக்கு எடுத்துக்காட்டு ப்ருந்தாவனத்தை முதன்மையாக கொண்டு அத்தாரின்டிக்கி தாரேடி, கோவிந்துடு அந்தவாரில்லே போன்ற படங்களும், மகதீராவை முதன்மையாக கொண்டு பத்ரிநாத், ஓம் சக்தி, பத்ரா போன்ற படங்களையும் குறிப்பிடலாம். மிர்ச்சியை வைத்து ராமய்யா வஸ்தாவய்யா , தூக்குடுவை வைத்து பாஷா போன்ற படங்களும் அடக்கம். இரண்டாவது தனக்கு எந்த மாதிரி செட் ஆகுமோ அதையே பாலோ செய்வது. இதற்கு எடுத்துக்காட்டாக மகேஷ்பாபுவை சொல்லலாம். மகேஷ்பாபு தன்னுடைய ட்ரென்டிலிருந்து எப்போது மாறி நடிக்கவே மாட்டார்; நடித்தாலும் அது ஊத்திக்கொள்ளும். ஆனால் இவ்விரண்டு தாண்டி மற்றொன்று சுயமாக யோசிப்பவர்களுக்கு முன்னுரிமை அளிப்பது. இந்த விஷயத்தை தெலுங்கில் செய்யும் இரண்டே இரண்டு ஹீரோக்கள் என்.டி.ஆரும் பவன்கல்யாணும் மட்டுமே. தொடர்ச்சியாக இவர்கள் இருவரின்  5 படங்களை எடுத்தப்பார்த்தால் இது விளங்கும். இரண்டு படங்கள் ட்ரென்டை பாலோ செய்தும், இரண்டு படங்கள் தங்களின் இமேஜை வெளிப்படுத்துவதாகவும் ஒரு படம் தங்களின் பரிட்சார்ந்த முயற்சியாகவும் இருக்கும். என்.டி.ஆரின் பரிட்சார்ந்த முயற்சிகளை நோக்கினால் ஸ்டூடன்ட் நம்பர்-1, அசோக், நா அல்லுடு, ப்ருந்தாவனம், கான்ட்ரி, டெம்பர்,  ஊசரவெள்ளி. அதூர்ஸ், ஆந்த்ராவாலா போன்ற படங்களைச் சொல்லலாம். அந்த வரிசையில் நானக்கு ப்ரேமதோ என்.டி.ஆரின் மற்றொரு பரிட்சார்ந்த முயற்சி எனலாம்.


சரி, படத்தை ஆரம்பிப்பதற்குமுன் இயக்குனர் சுகுமாரைப் பற்றியும் ஒரு பத்தியில் பார்த்துவிடலாம். டென்சனாக வேண்டாம்; எனக்கு ராஜமௌலிக்கு அடுத்து தெலுங்கில் மிகமிக பிடித்த இயக்குநர் சுகுமார். தெலுகு சினிமாக்களை ஓரளவு தரமாக்க முயற்சியில் ஈடுபடும் ஓரிரு இயக்குனர்களில் ஒருவர் சுகுமார். ஆர்யா எனும் தனது முதல் திரைப்படத்தின்மூலம் தெலுங்கு மாத்திரமில்லாமல் தென்னிந்திய திரையுலகையே திரும்பிப்பார்க்கவைத்த சுகுமார் உடனே ராமை வைத்து ஜகடம் எடுத்து வெற்றியாக்கினார். அதனைத் தொடர்ந்தாற்போல் ஆர்யா-2 வையும் இயக்கி, தன் பெயரை என்றும் தெலுங்கு சினிமாவில் நிலைத்திருக்கும்படி செய்த சுகுமார் 100% லவ் திரைப்படத்தை இயக்கி அதிலும் வெற்றி கண்டார். அடுத்து அவருக்கு அடித்தது ஜாக்பட். மகேஷ்பாபுவை வைத்து நேநொக்கடைனே எனும் தெலுங்கின் முதல் இன்டர்நேசனல் லெவல் சைக்கலாஜிக்கல் த்ரில்லரை இயக்கினார். ஆனால் படம் எதிர்பார்த்தபடி போகவில்லை. காரணம் படம் தரத்திலும் திரைக்கதையிலும் ஹாலிவுட் ஆட்களையே மூக்கின்மேல் விரல்வைக்கும் வண்ணம் எடுக்கப்பட்டிருக்கும். ஊத்திக்கொண்டதற்கு முக்கியமான காரணம் படத்தின் கிளைமாக்ஸில் நல்ல குத்து சாங் இல்லாமல் போனது தான். இப்படியொரு திரைப்படத்தை ப்ளாப்பாக்கி விட்டார்களே ஆந்த்ராவாலாக்கள் என்று கடுப்பாக்கும் வண்ணம் மிகச்சிறந்த திரைக்கதை வாய்ந்த திரைப்படம். படம் ஆவரேஜ் என்றதும் சிறிது கேப் விட்டு குமாரி 21F-ஐ தயாரித்தார் சுகுமார். இந்த திரைப்படம்தான் தெலுகில் பூத்த அற்பூதம் என்று கொஞ்ச நாட்களுக்குமுன் விமர்சகர்களால் கொண்டாடப்பட்டது. என்.டி.ஆருடன் நானக்கு ப்ரேமதோ கமிட் ஆனதும் முதல்வேலையாய் சுகுமார் செய்தது கிறிஸ்டோபர் நோலன் செய்த விஷயத்தையே. இன்செப்சன் திரைப்படத்தை தன் திரைக்கதை டேலன்ட் வெளிப்படுத்தும் வண்ணமும் அதேசமயம் பாக்ஸ் ஆபிசில் கலக்கும்படியாகவும் அமைய நோலன் என்னென்ன முயற்சிகளைக் கையாண்டாரோ அதையே சுகுமாரும் பின்பற்றினார். எளிமையான, அதேநேரத்தில் வலிமையான திரைக்கதை.


கேயாஸ் தியரி பற்றி தசாவதாரத்தில் கமல் சொல்லியிருப்பது உங்கள் நினைவிற்கு வரலாம். அந்த தியரியின்படி பட்டர்ப்ளை எஃபெக்ட் என்ற ஒரு சம்பவத்தை அறிமுகப்படுத்தினார் எட்வர்ட் லோரன்ஸ். கேயாஸ் தியரி (ஒழுங்கின்மை விதி) என்பது என்னவெனில் குத்துமதிப்பான நிகழ்காலம், குத்துமதிப்பான எதிர்காலத்தை உண்டாக்காது. இப்படிச்சொன்னால் நமக்குப்புரியாது என்பதானல் தான் பட்டர்ஃப்ளை எபெக்டைக் கூறி எளிமையாக்கினார் வில்லியம் ஜேம்ஸ். பிரபஞ்சத்தைப் பொருத்தவரை எந்தவொரு சிறுவிளைவுகளும் மாபெரும் விளைவுகளுக்கு அடிப்படையாக அமையும் என்பதே மையக்கருத்து. இது கணிதத்தில் பயன்படுத்தும் தியரி எனினும் டைனமிக்ஸின் மிகமுக்கிய கோட்பாடுகளில் இதுவும் ஒன்று. சரி குழப்பாமல் படத்தில் சொல்வதையே உங்களிடமும் சொல்லிவிடுகிறேன்.


காற்று வெப்பத்தினால் ஆவியாகும்போது அவ்விடத்தை நிரப்ப வேறொரு இடத்திலிருந்து காற்று வரும். இதன் அடிப்படையில்தான் பருவக்காற்றுகள், சூறாவளிக்காற்றுகள் போன்றவை இயங்குகின்றன. இப்போது ஒரு பட்டாம்பூச்சியானது தானாக பறந்துகொண்டிருக்கும்போது சாதாரண அழுத்தத்தை நிறைவு செய்யும்பொருட்டு வேறொரு இடத்திலிருந்து காற்று பெயர்ந்து அவ்விடத்திற்கு வரும். இது இயல்பானாது;ஆனால் அதே பட்டாம்பூச்சியை யாராவது பிடிக்க முயன்றால் வேகமாக சிறகை அடிக்கும். அப்போது காற்றின் தேவை அவ்விடத்தில் அதிகரிக்கிறது. அதை நிறைவு செய்யும் பொருட்டு தொடர் இனைப்பில் காற்றானது இடம்பெயருகிறது. இவ்வாறு தொடர்  இணைவானது எங்கோ ஒரு மூலையில் முடிவடையும். அவ்விடமானது அதிக காற்றுத்தேவையை உள்ளடக்கியிருக்கும். அதைநிறைவு செய்யும் பொருட்டு பேரதிகமான காற்றுச்சுழல் உண்டாகி பெரிய புயலையே உண்டாக்கக்கூடும். இதுதான் அந்த தியரி. இதை அடிப்படையாகக்கொண்டு எழுதப்பட்டதே இத்திரைப்படத்தின் திரைக்கதை.


படத்தின் கதை தந்தையிடமிருந்த சொத்துகளைப் பறித்து அவரின் அடையாளத்தை அழித்த வில்லனின் அடையாளத்தை அழிக்கப்போகும் மகன். இதைத்தான் கேயாஸ் தியரியைக்கொண்டு அருமையாக எடுத்து இருக்கிறார் சுகுமார்.  இதுவரை இருந்த என்.டி.ஆருக்கும் இந்த படத்தில் அபியாக வரும் என்.டி.ஆருக்கும் குறைந்தபட்சம் 100 வித்தியாசங்களையாவது காணலாம். அவ்வளவு சேஞ்ச். கெட்டப் முதல் பாடி லாங்குவேஜ், டயலாக் டெலிவரி, ஸ்டைல் என அனைத்திலும் ஹைடெக்கான என்.டி.ஆர். தெலுங்கைப் பொறுத்தவரை என்.டி.ஆர் போன்று சிறந்த நடிகரைக் காண்பதறிது. எந்தவொரு சிச்சுவேஷனையும் சமாளிக்ககூடிய திறமை என்.டி.ஆருக்கு இருப்பதால் தான் படம் முழுமைக்கும் தன் ஸக்ரீன் ப்ரசென்சால் நகர்த்தி ஜெயித்திருக்கிறார். படத்தில் மற்ற நடிகர்களுக்கும் நடிக்கும்படியான வாய்ப்பிருந்தும் , அவர்களை எல்லாம் ஓவர்டேக் செய்துள்ளார்.


படத்தின் பெரும்பலங்களில் ஒன்று ப்ரில்லியன்டான ரசிக்கும்படியான வசனங்கள். படத்தின் கதையைப் பொறுத்தவரை வில்லன் புத்திசாலி; ஹீரோ வில்லனைவிட புத்திசாலி. இவர்களிருவரும் சந்திக்கும் காட்சியானது எப்படி இருக்கும்? இந்த படத்தைப் பார்த்தால் உங்களுக்கு புரியும். தெலுகு சினிமாக்களில் இவ்வளவு ஸ்மார்ட்டான அதிபுத்திசாலித்தனமான வசனங்களை நான் இப்போது தான் பார்க்கிறேன். வில்லன் ஹீரோவிடம் கேம் விளையாடலாமா என்று கேட்டுவிட்டு ‘இதுவரை இந்த கேமில் நான்  தோற்றதேயில்லை’ என்று கூறும்பொது, ஹீரோ ‘நான் இதுவரை தோற்றுப்போன கேம் விளையாடியதே இல்லை’ என்பார். வில்லனும் ஹீரோவின் தந்தையும் சந்திக்கும் காட்சியில் ஒரு கேள்வியை வில்லன் கேட்பார்; அந்த கேள்விக்கான விடையை கண்டுபிடிக்க கிட்டத்தட்ட எனக்கு இரண்டு மணி நேரம் ஆயிற்று.


இதேபோல் இப்படத்தின் இசையைப் பற்றி கண்டிப்பாக சொல்லவேண்டும்; இசையென்றால் பாடல்கள் இல்லை; பிண்ணனி இசை. பாடல்கள் வழக்கம்போல நம் டி.எஸ்.பி எல்லா ட்யூனையும் மிக்ஸ் செய்து போட்டுவிட்டார். ஆனால் பி.ஜி.எம் பின்னி எடுத்துள்ளார். இதுவரை டி.எஸ்.பி பி.ஜி.எம் போட்ட திரைப்படங்களையும் இந்த படத்திற்கு அவர் போட்டிருக்கும் இசைக்கும் ஏகப்பட்ட வித்தியாசங்கள். ஸ்லோவாக செல்லும் காட்சிகளைக் கூட தன் இசைத்திறமையால் அடுத்து என்ன என்று எதிர்பார்க்கவைக்கும் இசை. வில்லனின் பர்த்டே பார்ட்டிக்கு என்.டி.ஆர் என்டர் ஆகும்போது வயலின் வைத்து ஒரு சிம்பனி ஆர்க்கெஸ்ட்ராவே வாசித்திருப்பார் டி.எஸ்.பி. பாடல்கள் படத்துடன் பார்க்கும்போது கேட்கலாம்; படத்தைத் தாண்டி வெளிவந்தாலும் மனதில் நிற்கும்படியாக இறந்த தன் தந்தைக்கு சமர்ப்பித்த ‘நானாக்கு ப்ரேமத்தோ’ பாடல் உண்மையில் அருமை. அப்பாடலின் வரிகள் அப்படியே டி.எஸ்.பியின் உள்ளத்திலிருந்து கொட்டிருக்கவேண்டும். அவரின் இழப்பை அப்பாடலின்வழி நமக்குக் காட்டியிருப்பார். இது தவிர இரண்டு பாடல்கள் ‘லவ் தெப்பா’ மற்றும் ‘ஐ வான்ன பாலோவ்’ ஆகிய பாடல்களும் சுமார் ரகத்திற்கு மேல்.


நான் என்.டி.ஆரைப் பார்த்து வியந்த ஒரு விஷயம் நடனம். தென்னிந்திய அளவில், ஏன் இந்திய அளவில் பிரபுதேவாவிற்கு அடுத்தபடியாக எவ்வளவு கடினமான ஸ்டெப் என்றாலும் அதை முகத்தில் எள்ளளவும் காட்டாமல் அசால்டாக போடும் திறமை வாய்ந்தவர். யமதொங்கா (டிஸ்கோ பாடல்), ப்ருந்தாவனம் (சின்னதோ வைப்பு), பாஷா (அனைத்துப் பாடல்களும்), டெம்பர் (டெம்பர் சாங்) போன்ற பாடல்களில் அவர் ஆடியிருக்கும் ஸ்டெப் சான்ஸ்லெஸ் எனலாம். ஆனால் அவரின் நடனத்திறமையை ராஜமௌலிக்குப்பின் சரியாக பயன்படுத்தியவர் சீனுவைட்லா. மற்ற இயக்குநர்கள் படத்தின் ஒரே குத்துபாடலில் மட்டும் அவருக்கு கடினமான ஸ்டெப் கொடுத்து ரசிகர்களை ஏமாற்றிவிடுவார்கள். சுகுமாரும் அப்படியே செய்துவிட்டார். 5-ல் 4 பாடல்களில் மிகச்சுமாரான நடனத்தைக்கொடுத்து ஏமாற்றிய சுகுமார், லவ் தெப்பா பாடலில் போட்டு பிழிந்து எடுத்துள்ளார். இன்னும் யூட்யூப்பில் அந்த பாடல் வரவில்லை. வந்தால் பாருங்கள்; அட்டகாசமான நடனஅசைவுகள்; தமிழில் அப்படியொரு நடனத்தைக் கண்டிப்பாக காணமுடியாது.


எனக்கு என்.டி.ஆரை பர்சனலாக மிகவும் பிடிக்க காரணம் தெலுங்கில் எந்தவொரு வேடத்தையும் ஏற்று நடிக்கும் திறமை வாய்ந்த ஒரே நடிகர் என்.டி.ஆர். மேலும் தெலுங்கை அழுத்தம் திருத்தமாக எவரும் எளிமையாக உணரும்படியான உச்சரிப்பு அவர் படத்தில் மட்டுமே வரும். அதேபோல் தன் படங்களில் முடிந்தவரை மது அருந்தும் காட்சிகள், சிகரெட் பிடிக்கும் காட்சிகளை அவாய்ட் செய்து நல்ல கமர்ஷியலைக் கொடுக்கும் ஒரே தென்னிந்திய நடிகர். சினிமாவைத் தாண்டி மனிதநேயமிக்க நடிகர்களில் ஒருவர். பாஷா திரைப்படத்தின் இசை வெளியிட்டு விழாவில் , கூட்டநெரிசலில் சிக்கி உயிரிழந்த தன் ரசிகனின் குடும்பத்தை அதே மேடையில் தத்து எடுத்துக்கொண்டு, இன்றளவும் அக்குடும்பத்தை பராமரித்து வரும் தன்மையானவர். இதெல்லாம் புகழுக்காக செய்கிறார் என்று ஒரேவார்த்தையில் அவரின் மனிதாபிமானத்தைக் கொச்சைப்படுத்திவிட முடியாது. சென்னை வெள்ளத்திற்கு முதன்முதலில் நிவாரண நிதி வழங்கி அதை வெளியில் சொல்லவிரும்பாமல் அமைதிகாத்தவர். இன்றளவும்  அவருடன் பழகியவர்கள் அவரை விட்டு பிரிந்ததில்லை. இம்மாதிரியான குணம் இயற்கையிலேயே ஒருசிலருக்கு அமையும். அம்மாதிரியான மனிதர் தான் என்.டி.ஆர். இன்னும் 15 வருடங்களுல் ஆந்திர முதல்வராகும் வாய்ப்பு அவருக்கிருந்தாலும் தன் சொந்தவிஷயங்களுக்காக கட்சியைப் பயன்படுத்தியதில்லை. வெளியில் மட்டுமல்லாமல் சினிமாவிற்குள்ளேயும் கனிவுடன் இருப்பவர். அவரை வைத்து படம் எடுக்கும் இயக்குநர்களில் ஒருவர்கூட அவரைப் பற்றி குறை சொல்லியதில்லை. சினிமாவிற்குள்ளேயும் தன்னால் இயன்ற அளவு கமர்சியல் படங்களின் தன்மையை மாற்ற முயற்சி எடுத்து வருபவர். ‘ராஜமௌலியின் பேமஸிற்கு காரணம் நாங்கள் தான்’ என்று தெலுங்கின் முண்ணனி ஹீரோக்கள் ராஜமௌலியை மட்டம் தட்ட முயன்றபோது ஈகா (நான் ஈ) எடுத்து எல்லாருடைய வாயையும் அடைத்தார். ஈகா திரைப்படத்திற்கு முதல் ஆளாய் வந்து வாழ்த்து தெரிவித்தவர் என்.டி.ஆர். தனக்கு சரியெனத் தோனும் விஷயங்களைத் தாமதிக்காமல் செய்துவிடுவார். படத்தின் வெற்றிக்கு யார் காரணம் என்று கேட்டால் தன் படத்தில் பணியாற்றிய அனைவருமே என்று யாரையும் விட்டுக்கொடுக்காமல் பேசும் தன்மையானவர். இம்மாதிரியான பண்புகளைக்கொண்டிருக்கும் ஒரு சிறந்த நடிகரை யாருக்குத்தான் பிடிக்காது?


என்னைப்பொறுத்தவரை என்.டி.ஆரின் 25 பெரும் வெற்றியடையும் என்பதில் சந்தேகமில்லை. தமிழிலும் படம் ரிலிசாகப்போகிறது என்கின்றனர். தமிழில் வந்தால் மிஸ் பண்ணாமல் பார்த்துவிடுங்கள். வெறும் கேம் மாதிரியாக மட்டும் நகராமல் காதல், குடும்ப பாசம், சின்ன சின்ன காமெடி வசனங்கள் என்று ஸ்மூத்தாக செல்கிறது. ப்ரில்லியன்டான கமர்ஷியல் திரைப்படத்திற்கு ஒரு ஆகச்சிறந்த உதாரணம் இந்த நானாக்கு ப்ரேமதோ.