TANGLED – சினிமா விமர்சனம்

இம்மாதம் ஏதோ நம் தளத்தில் சூனியம் வைத்துவிட்டார்கள் . அனிமேசன் மற்றும் காமெடித்திரைப்படமாகவே எழுதிக்கொண்டிருக்கிறேன் . இதுவும் ஒரு அனிமேசன் திரைப்படம் தான் . டிஸ்னி நிறுவனத்தாரின் மோசன் கேப்சர் திரைப்படங்களைப்பற்றி சொல்லித்தான் தெரியவேண்டும் என்ற அவசியமில்லை . அதிலும் டிஸ்னி நிறுவனத்தாரின் 50வது அனிமேசன் மோசன் கேப்சர் திரைப்படமாக வந்திருக்கும் இத்திரைப்படத்தை உங்களில் பலர் பார்த்திருக்கலாம் . உண்மையில் நான் பார்த்த முதல் மோசன் கேப்சர் திரைப்படம் இதுதான் . முதன்முறை பார்க்கும்போதே மனதைக்கொள்ளையடித்த இப்படத்தைப்பார்க்கும் போது எனக்கு ஆங்கிலம் கொஞ்சம் அரைவேக்காட்டுத் தனமாகத்தான் இருந்தது . அதன்பின் FACEBOOK –ன் துணைகொண்டு , நிறைய பெண்களுடன் HI WHATS UO ? என்று மொக்கை போட்டு மொக்கை போட்டு ஆங்கிலத்தை அறைகுறையாக கற்றுக்கொண்டேன் . தொடர்ந்தாற்போல என் ஹாஸ்டலில் இருக்கும் வடநாட்டு நண்பர்களுக்கு எக்ஸ்சேஞ்ச் மேளாவில் தமிழ் கற்றுக்கொடுத்த அவர்களிடம் ஓரளவு ப்ராப்பரான ஆங்கிலத்தை கற்றுக்கொண்டதும் என் திரையுலகப்பயணம் ஓரளவு புரியும்படி தொடர ஆரம்பித்தது . அதன்பின் எத்தனையோ திரைப்படங்கள் பார்த்திருந்தாலும் கலேவலாவில் வரும் வைனாமொயினன் போல மனதில் சிறு துக்கம் கவ்வியே இருந்தது . அது வேறொன்றுமில்லை , இந்த படத்தைப்பார்க்க வேண்டுமென்பதுதான் . கிராமத்திற்கு வந்தபின் பி.எஸ்.என்.எல்லின் இந்தியா முழுதும் பரவியிருக்கும் பிராட்பேன்ட் இணைப்பு எங்கள் ஊரில் மட்டும் தன் அலைவரிசையைக்காட்டாமல் கைவரிசைக்காட்டியதால் டவுன்லோட் என்பது மகா கொடுமையான விஷயமாகிவிட்டது . எப்படியோ அடித்துப்பிடித்து நெட்சென்டரில் டவுன்லோட் செய்யலாம் என்று சென்றால் USP PORT யே புடுங்கி எறிந்திருந்தார்கள் நெட் சென்டர்காரர்கள் . அதன்பின் தெரிந்த நண்பரைப்பிடித்து ஒருவழியாக டவுன்லோடி படத்தைப்பார்த்தாகிவிட்டது . எழுதாமல் விட்டால் என்னையே நம்பியிருக்கும் ரசிகக்கண்மணிகள் (?) கோவித்துக்கொள்வார்கள் என்பதால் , இதோ பதிவு உங்கள் கண்ணுக்கு விருந்தாக .

அழகான , எளிமையான , அர்த்தமுள்ள காதல் கவிதையை வாசிக்கும்போது நமக்கு என்னவெல்லாம் தோன்றுமோ , அத்தனையும் இப்படத்தைப்பார்க்கும் போது எனக்குத் தோன்றியது . ஆங்காங்கே தமிழிலக்கணத்தில் பயின்று வரும் அணிகளைப்போல அழகழான பாடல்கள் ஒருசேர , மனதில் ஒருவித மென்னமையான உணர்வு எழும் வகையில் படம் அமைந்திருக்கிறது என்றால் மிகையாகாது . அப்படி ஒன்றும் படத்தில் பெரிய கதையெல்லாம் இல்லை . இருந்தாலும் படம் ரசிக்கும் வகையில் இருக்கும் . இன்னும் சொல்லப்போனால் சப்பைக்கதை . ஆனால் அருமையான திரைக்கதையால் படம் அழகாக நகரும் .  அனிமேசன் திரைப்படங்களைப் பொறுத்தவரை அத்தனைக்கதைகளும் ஒரேமாதிரியாகத்தான் இருக்கும் . கதை மட்டுமல்லாது திரைக்கதையும் கிட்டத்தட்ட ஒரேமாதிரி தான் இருக்கும் . HOW TO TRAIN YOUR DRAGON யும் BIG HERO 6 – யும் ஒன்றாகப் பார்த்து 7 பெரிய வித்தியாசங்கள் கண்டுபிடிக்கச்சொன்னால்  எப்படி நமக்குத்தடுமாற்றம் வருமோ , அதே போல் தான் மற்ற அனிமேசன் திரைப்படங்களும் . இன்னும் சிம்பிளாக சொல்லவேண்டுமெனில் இவ்வகை கருத்துருத்திரைப்படங்கள் ( மோஷன் கேப்சர் படங்களைத்தமிழில் கருத்துரு படங்கள் என்று அழைப்பார்களாம் ) அனைத்தும் ஆதிகாலத்தமிழ்ப்படங்களின் கான்செப்டையே தன்னுள் கொண்டிருக்கும் . அடச்சீ , அனிமேசன் திரைப்படங்கள் கட்டுரையில் எழுதவேண்டிய கதையையெல்லாம் இதில் எழுதுகிறேன் . சரிவாருங்கள் படத்தைப்பார்ப்போம் .

ஒரு ஊர்ல ஒரு ராஜா இருந்தாராம் . அந்த ராஜாவின் மனைவிக்கு தட் மீன்ஸ் ராணிக்கு கர்ப்பம் ஏற்படுகிறது . ஆனால் ராணியின் உடல்நிலை மிகமோசமாக இருக்கிறது . அதேநேரம் அவ்வூரை ஒட்டிய காட்டில் ஒரு சூனியக்காரி இருக்கிறாள் . சூரியனின் கதிர்களினால் உண்டான ஒரு அரிய மலரை அவள் பார்க்கிறாள் . அந்த மலரின் சக்தி மூலம் , தன் இளமையை நாளுக்கு நாள் இலவசாக டாப்அப் செய்துவருகிறாள் . ராணியின் உடல்நிலை மிகமோசமாக இருப்பதால் ராஜா அந்த மலரைப்பறித்துவந்து ராணியின் உயிரைக்காப்பாற்றுகிறார் . ராணிக்கு ஒரு அழகான பெண்குழந்தை பிறக்கிறது .  தன் இளமையைக்காக்கும் மலர் போய்விட்டதே என்ற கோவத்தில் இருக்கும் சூனியக்காரி , யாருக்கும் தெரியாமல் அரண்மனைக்கு வந்து , அக்குழந்தையைப்பார்க்கிறாள் . அக்குழந்தையின் தலைமுடியில் அந்த மலரின் சக்தி இருப்பதை உணர்ந்த அவள் , சக்திக்காக குழந்தையைக்கடத்திக்கொண்டு சென்று வனத்தில் யாருக்கும் தெரியாத ஒரு டவரில் குடிவைக்கிறாள் . அக்குழந்தைக்கு தான்தான் தாய் என்று அக்குழந்தையை நம்பவைக்கிறாள் . மேலும் , டவரை விட்டு வெளியே சென்றால் இவ்வுலகில் வாழும் மனிதர்கள் உன் சக்திக்காக உன்னை நாசம் செய்துவிடுவார்கள் என்று ஏதேதோ கூறி அக்குழந்தையை சிறுவயதில் இருந்தே வெளியுலகம் காட்டாமல் வளர்க்கிறாள் . குழந்தைக்காணாமல் போன துக்கத்தில் இருக்கும் ராஜா , ஒவ்வொரு ஆண்டும் அக்குழந்தையின் பிறந்தநாளன்று மெழுகுவர்த்தி ஏந்திய பட்டங்களை (அதை எப்படி தமிழில் சொல்வதென்று தெரியவில்லை . அதாவது சதுரமாக ஒரு பெட்டியினுள் விளக்கை ஏற்றி வானில் பறக்கவிடுகிறார்கள் ) பறக்கவிடுகிறார்கள் . தன் பிறந்தநாளன்று வருடாவருடம் அந்த பட்டங்களின் அணிவகுப்பைப்பார்த்து ஆச்சர்யப்படும் ரேபன்சல் (அந்தக்குழந்தையின் பெயர்தான்)  தன் தாயாக நினைக்கும் சூனியக்காரியிடம் தன்னுடைய பதினெட்டாவது பிறந்தநாளில் அதைநேரில் பார்க்கவேண்டும் என்று வேண்டுகோள் விடுக்கிறாள் . ஆனால் அதை நைசாக மறுத்துவிட்டு சூனியக்காரி கிளம்பிவிடுகிறாள் . அந்நேரத்தில் யூஜின் எனும் இயற்பெயர் கொண்ட ரைடர்  என்றழைக்கபடும் திருடன் , அரண்மனையில் தன் இரு சகாக்களுடன் சேர்ந்து காணாமல் போன இளவரசியின் மகுடத்தை லவட்டிவிட்டு தப்பிக்கிறான் . அந்நேரத்தில் காவலர்கள் சேசிங் செய்ய , தன் இரு சகாக்களுக்கும் டாடா காட்டிவிட்டு ஓடுகிறான் . மேக்ஸிமஸ் எனும் முரட்டுக்குதிரை அவனை துரத்த , வழிதவறி ரேபன்சல் இருக்கம் டவருக்கு வருகிறான் . அவளோ அவனை அடித்து உட்காரவைத்து டீல் பேசுகிறாள் . அதாவது அந்த நிகழ்ச்சியை நேரில் பார்க்க ரைடர் உதவினால் , ரைடர் திருடிய மகுடத்தை அவள் தருவதாக கூறுகிறாள் . வேறுவழியின்றி ரைடரும் அவளிடம் ஒப்புக்கொள்கிறான் .

இவ்விடத்தில் ஞாபகம் வைத்துக்கொள்ளவேண்டியது என்னவென்றால் ரேபன்சலின் முடியை வெட்டிவிட்டால் அவளுடைய சக்தி போய்விடும் என்பதை அறிந்த சூனியக்காரி , அவளின் முடியை வெட்டாமலே வளர்த்துவருவாள் . அதன்பின் ரைடரும் , ரேபன்சலும் தங்களின் பயணத்தைத்தொடங்குகிறார்கள் . இதை எப்படியோ சூனியக்காரி கண்டுபிடித்துவிடுகிறாள் . இன்னொருபுறம்  ஏமாற்றப்பட்ட சகாக்கள் ஒருபுறம் ரைடரைத்தேட , மேக்ஸிமசும் ரைடரைத்தேடுகிறது . இவ்வாறான பயணத்தில் ரைடருக்கும் ரேபன்சலுக்கும் காதல்வர , சூனியக்காரியோ அதை அறிந்து நயவஞ்சகமாக இருவரையும் பிரித்து ரைடரை அரண்மனையில் மாட்டவைத்துவிடுகிறாள் . தூக்குத்தண்டனை பெற்ற  ரைடர் அதன்பின் எப்படி பிழைத்து   , ரேபன்சலை அந்த சூனியக்காரியிடமிருந்து காப்பாற்றுகிறான் என்பதே கிளைமேக்ஸ் .

படத்தில் அந்த ஹீரோயின் கேரக்டரை எப்படித்தான் உரவாக்கினார்களோ தெரியவில்லை . கொள்ளை அழகு . அனிமேசன் என்பதை மறந்து நாமே அவளைக்காதலிக்கத் துவங்குகிறோம் . மேக்ஸிமஸ் எனும் குதிரைக்கும் ரைடருக்கும் இடையே நடக்கும் சண்டைக்காட்சிகள் மற்றும் இருவரும் பழகும் காட்சிகள் எல்லாம் சிரிப்பை வரவழைப்பதில் வெற்றிபெறுகின்றன . கிளைமேக்ஸ் நெருங்கும் வேளையில் அந்த பரபரப்பு நமக்கும் தொற்றிக்கொள்கிறது . அதேபோல் படத்தில் வரும் வசனநடையிலான பாடல்களும் நம் மனதைக்கவரும் . I see the light எனும் பாடல் சிறந்த பாடலுக்கான ஆஸ்கார் நாமிநேட் ஆகியதும் கவனிக்கத்தக்கது . மொத்தத்தில் வெறும் டைம்பாசுக்கு மட்டுமின்றி , நம்மையும் மறந்து ரேபன்சல்லை நேசிக்க ஆரம்பிக்கிறோம் .