Saturday, 19 November 2016

சிறந்த பக்தன் - சிறுகதை



‘இன்றும் ஒன்றுகூட தேறாது போலிருக்கிறதே’ என்றான் முத்தண்ணன் ஏக்கத்துடன்.

‘கடலம்மாவிற்கு நம் பரதவர்குலம் மீது ஏனிந்த கோபமோ தெரியவில்லை’ என்று பதில் சொல்லி தன் மைத்துனனைத் தேற்ற முயன்றான் களமன்.

அந்த பெரிய மரக்கலம் ஆர்ப்பரிக்கும் வங்கக்கடலில் இரண்டு நாட்களாக ஊசலாடிக்கொண்டிருந்தது. இருப்பினும் இன்னும் ஒரு மீனைக்கூட  பிடிக்கமுடியவில்லை.

‘என்ன சிந்தனை முத்தண்ணா?’

‘எல்லாம் உன் தமக்கையை எண்ணித்தான்.’

‘அவளுக்கென்ன? பரதவர்களில் வலிமையான உமக்கல்லவா மணம்புரிந்து கொடுத்துள்ளோம். பின் என்ன கவலை?’

‘நீ அறியாததா? இக்கடல்மாதா தொடர்ந்து நம்மை ஏமாற்றிக் கொண்டிருக்கிறாள். பாவம் என்னவள்; பசிப்பிணி எனும் பாவியால் சூழப்பட்டிருப்பாள். ’

‘இது இறைவனின் திருவிளையாடலேயன்றி வேறெண்ண சொல்ல?’

‘நம் தலைவர் ஏதோ குற்றம் புரிந்திருப்பாரென்று நினைக்கிறேன்’

‘என்ன மூடத்தனமிது? நம் பரதவக்குலத்தலைவர் மீது பழிசுமத்தினால் உண்ண ஒருபருக்கை நெல்லும் கிடைக்காது முத்தண்ணா’

‘இப்போது மட்டும் இங்கே என்ன வாழ்கிறது?’

‘சரி வா. வீசிய வலையை எடுக்கலாம். ’ என்றவாறே இருவரும் அங்கிருந்து கலத்தின் ஓரத்தினை அடைந்தனர் அவர்களிருவரும் சோழமண்டலத்தின் ஆளுகைக்குட்பட்ட நாகை மாவட்டத்தின் தென்கோடி முனையிலிருக்கும் சிற்றூரான முளைப்பாடியில் வசித்துவரும் பரதவ குலத்தோர். சில நாட்களுக்கு முன் வரை கடல்தாயின் அருளால் அளவிடற்கரிய மீன்கள் பிடித்து பசியெனும் சொல்லின் பொருளறியாது சிறப்பாக வாழ்ந்துவந்த குடியினர். ஆனால் இப்போதோ ஒருவேளை உணவிற்கு வழியில்லாமல் பழங்கருவாடுகளையும் வீட்டிலுள்ள பெண்டுகள், குழந்தைகளின் நகைகளையும் விற்று வயிற்றை நிரப்பிவந்தனர். ஏறத்தாழ அச்செல்வமும் தீர்ந்து போய் அடுத்தவேளை உணவிற்கு என்ன செய்வதென்று அச்சத்துடன் வாழ்ந்துவருகிறார்கள். தம் வாணிகம் சார்ந்த மருதநிலத்தில் வாழும் உற்றார், உறவினரிடம் கடன் வாங்கவும் அவர்களுக்கு மனம் வரவில்லை. இயற்கையின் அதிசயம் அவ்வப்போது கெடுதலாகவும் முடியும் என்பதை அவர்களுக்கு உணர்த்தும்படியாக கடந்த ஒருமாத காலம் இருந்தது.


கடல் தாய் இவ்வளவிற்கும் எதுவும் தராமல் விடவில்லை. ஆரம்பத்தில் பல மீன்களிலிருந்து சிலவாக்கி தற்போது தினமும் ஒரே ஒரு பெரியமீன் மட்டும் எண்ணித் தருகிறாள். அவ்வொரு மீனையும் அதிதீவிர சிவபக்தனாகிய முளைப்பாடி பரதவர்களின் தலைவன் கடலில் விட்டுவிடுகிறான். ஏதோ அம்மீனை வைத்து தாணுன்னா விட்டாலும் தன் குழந்தைகளாவது உண்டு பசியாறும் என்றெண்ணிய அங்கிருந்த குடும்பங்களுக்கு இது பேரடியாக இருந்தது.

வலையில் ஏதோ சிக்கியது போலுணர்ந்தான் முத்தண்ணா.

‘மைத்துனனே! ஏதோ பெரும் திமிங்கலம் சிக்கியுள்ளது என எண்ணுகிறேன்’ என்று கூறிய முத்தண்ணாவும் அவன் மைத்துனனும் சிரமப்பட்டு வலையை இழுத்தார்கள். இருவரும் வலையில் துடித்துக்கொண்டிருந்த அந்த மீனைப் பார்த்து அதிசயித்து நின்றனர். தங்கள் வாழ்நாளில் அப்படியொரு மீனை அவர்கள் பார்த்திருப்பார்களா என்பது சந்தேகம். தங்கத்தால் ஆன உடலில் ரத்தினங்களால் ஆன செதில்களும், மாணிக்கத்தால் ஆகிய கண்ணும், வைர, வைடூரியத்தால் ஆன வாலுமென அது ஒரு புதையலாய்க் காட்சியளித்தது.

‘முத்தண்ணா! இவ்வதிசயத்தைப் பார்த்தாயா? யாருக்கும் கிடைக்காத பெரும்பேறு நமக்கு கிட்டியுள்ளது.’

‘ஆம் மைத்துனனே! இதைக் கொண்டு சென்று புகாரில் விற்றால் பெரும்பொருள் கிடைக்கும். அதைக்கொண்டு நம் குலத்தோர் இன்னல்களைத் தீர்த்துவிடலாம்’

‘ஏன் இப்படி உன் சிந்தனை மாறிப்போகிறது? கடலில் கிடைக்கும் பொருளை நம் தலைவனிடம் சமர்பிக்கவேண்டுமென்று தெரியாதா உனக்கு?’

‘சொல்வதைக் கேள் களமா. நம் தலைவரிடம் இதைக்கொண்டு சென்றால் இதையும் கடலில் விட்டுவிட்டு, சிவபெருமானே உனையும் உணர்வேன் நன்காய் எனப்பாடத்துவங்கி விடுவார். என் பேச்சைக் கேள். பொருளீட்டினால் ஒழிய உன் தமக்கையையும் அவளின் மகனையும் இன்றிரவு பசியினில் இருந்து காக்க முடியாது.’

‘உடல் வாடினாலும் பசிமீறினாலும் வழிமாறாமலே வாழ்ந்திடுவோம் முத்தண்ணா.’

அதற்குமேல் முத்தண்ணாவினால் பேச முடியாமல் போய்விட அக்கலம் கரையை நோக்கித் திரும்பியது. அந்த நவரத்தின மீனைப் பார்த்தவாறே திக்கில் ஆழ்ந்திருந்த முத்தண்ணன், தன் மைத்துனன் களபனிடம் கேட்டான்.

‘ஒருவேளை இதையும் நம் தலைவன் கடலில் விட்டுவிட்டால்?’

‘அவரை வெட்டி கடல்மீன்களுக்கு உணவாய்ப்போடவும் அஞ்சேன்’ என்றான் களபன்.

கரை வந்தடைந்த இருவரையும் எதிர்பார்த்து அவர்களின் குடும்பம் காத்திருந்தது. அவர்கள் இருவரும் ஒருசேரத் தூக்கிவந்த நவரத்தின மீனைப் பார்த்ததும் அங்கிருந்த நெய்தல்நில பரதவர்கள் அதிசயத்து நின்றனர். ஊரே ஒன்று கூடியது.

‘எம்மக்களே! இம்மீனைப் புகார்ப்பட்டிணத்திலோ மதுரை அறுவை வீதியிலேயோ விற்றால் பெரும்பொருள் கிடைக்கும். அப்பொருள்கொண்டு நம் துயர் தீர்த்துவிடலாம். ஆனால்,’ என்றவாறே இழுத்தான். அவன் இழுத்த ஆனாலின் அர்த்தம் அங்கிருப்பவர்களுக்கும் தெரியும்.

‘அப்படியாகாது முத்தண்ணா. நம் தலைவரிடம் பேசிப்பார்க்கலாம். ஏற்றுக்கொள்ளவில்லையெனில் நாம் ஒருசேர அவரின் நடவடிக்கைக்கு எதிர்ப்புத் தெரிவிக்கலாம். வாயினால் அல்ல; கையினால்’ என்றான் கூட்டத்திலிருந்த ஒரு இளைஞன்.

அக்கூட்டத்திலுள்ளோர் அம்முடிவை ஏகமனதாக ஏற்றுக்கொண்டு பரதவக்குடித் தலைவனின் தாழைமடல் குடிலை அடைந்தனர்.

‘பரதவக்குடி காக்கும் பெருமானே! வெளியே வரவும்.’

உள்ளேயிருந்து அமைதியே உருவெடுத்த சிவபக்தனும் பெரும் வீரனுமான தலைவன் வெளியே வந்தான். கடந்த சில நாட்களாக உண்ணாமல் இருந்ததால் அவனின் முகம் வாடியிருந்தாலும் அம்முகத்தின்வழி ஒழுகும் கருணை ஒளி, அன்பைப் போதிப்பதாய் இருந்தது. வெளியே நின்றவர்கள் அவனிடம் நடந்ததைக் கூறி மீனை ஒப்படைத்து அதைவைத்து தங்கள் துன்பத்தை நீக்கவேண்டும் என்றும் வேண்டினர். அம்மீனைப் பார்த்த தலைவன் ,

‘சிறந்வையெல்லாம் தென்னாடுடைய எம்பெருமானுக்கே அர்ப்பணம்’ என்று கூறிவிட்டு நேராய் கடலில் சென்று அதை விட்டான். சிறையிலிருந்து விடுபட்ட கைதிபோல் மிகவேகமாக கடலில் சென்று அம்மீன் மறைந்தது. குழுமியிருந்த கூட்டத்தினரின் முகத்தில் கோபம் கொப்பளிக்க, மக்கள் அனைவரும் ஒருசேர அத்தலைவனை நோக்கி வந்தனர். அப்போது வானில் பிரகாசமான ஒளி அத்தலைவன் மீது பரவ, அசரீரி ‘அதிபத்தா’ என்றது. கூடியிருந்தவர்களின் வயிறும், மனமும் நிறைந்தது.
  


நன்றி – அதிபத்தர் வரலாறு, பெரியபுராணம்.

Thursday, 17 November 2016

MALENA (18+) – சினிமா விமர்சனம்



பொறாமை – தன் சகமனிதன் தன்னைவிட எதாவது ஒருவகையில் உயர்ந்தவராய் இருந்தால் நமக்குள் அரிப்பெடுத்து அலையும் உணர்ச்சி. ஆண்களைக் காட்டிலும் பெண்களுக்கு அதிகம். அதேநேரம் நம்மைவிட எதாவது ஒருவகையில் உயர்ந்தவராய் இருந்தால் ஆண்களின் எண்ணம் அதை அடைந்தே ஆகவேண்டும் என்ற கோரவெறி. அடைய முடியாவிட்டால் உயர்ந்தவரை தாழ்மைப்படுத்த வேண்டும் என்ற சிறுமைத்தனம்.  இது எல்லா மனிதர்களுக்குள்ளும் புதைந்துகொண்டிருக்கும் மிருகத்தனத்தின் எச்சம். அது வெளிப்பட்டால்? அதனால் பாதிக்கப்பட்டால்? அப்படி பாதிக்கப்பட்டவள் தான் மலெனா.

அதற்குமுன் உலகசினிமாக்களில் ஈரானியத் திரைப்படங்களைத் தவிர வேறு எந்த மொழிப்படங்களைப் பார்ப்பதாய் இருந்தாலும் தனியாகவே பாருங்கள். அற்புதமான படம் என்பதால் குடும்பத்துடன் அமர்ந்து பார்க்கலாம் (!) என்று நினைத்தால் ஜிகிர்தண்டாவில் வரும் வேட்டையாடு விளையாடு கிளைமேக்ஸ் தான் உங்கள் வீட்டிலும் நடக்கும். அதிலும் இத்தாலிய, ப்ரெஞ்ச் திரைப்படங்கள் என்றால் ஹெட்போனை மாட்டிக்கொண்டே பாருங்கள். எந்த இடத்தில் இருந்து காம மொனகல்கள் வரும் என்று எதிர்பார்க்கவே முடியாது. பேசிக்கொண்டே இருப்பார்கள்; பட்டென்று உடையைக் கழட்டிவிட்டு ஆரம்பித்துவிடுவார்கள். அதிலும் இத்தாலிய சினிமாக்களில் பெரும்பான்மையான கலைப்படைப்புகள் (லா பெட்டா ஈ பெல்லா, த லீபேர்ட், இல் ஜியார்டினோ டை ஃபின்சி கான்டினி மாதிரியான கமர்சியல் படங்கள் இல்லை) செக்ஸ் என்ற வட்டத்தைச் சுற்றியே நிகழும். ஈரானியர்களுக்கு பேமஸ் குழந்தைகள் என்றால் இத்தாலியர்களின் பேமஸ் பெண்கள். பெண்களின் அழகை அவர்களிடம் சிக்கும் கேமரா வெளிப்படுத்தும் அளவிற்கு வேறு யாராலும் வெளிப்படுத்திவிட முடியாது. இத்தாலியின் டாப் 10 படைப்புகளை எடுத்துப் பார்த்தால் அதில் பாதிக்கும் மேல் செக்சை முக்கியமானதொரு புள்ளியாக வைத்தே நகரும்.
இப்போது மலேனாவை பார்க்கும்முன் இவ்வளவு விசயங்களைக் கூறுவதற்கு காரணம், அழகுக்கும் அருவெறுப்புக்கும் இடையே இருக்கும் நூலிழைக் கோட்டில் இத்திரைப்படம் பயணிக்கும். அருவெறுப்பு என்று கூறுவது பதின்ம வயது சிறுவனின் காமத்தினூடே இத்திரைப்படம் பயணிக்கும். சரியானபடி புரிந்துகொள்ளாமல் இது ஒரு பிட்டு படம் எண்ணும்படியாகவும் நேர்ந்துவிடலாம். அதனால் பார்க்கும்முன் சில விசயங்களை உணர்ந்துகொள்ள வேண்டும். படம் தீவிர அடல்ட்ரீ கன்டென்டை உடையது. உலகமெங்கும் பிட்டு படங்களுக்கு கூட 18 வயது ஆகாத நடிகர்களை நடிக்கவைப்பது தடை செய்யப்பட்டுள்ளது. ப்ரேசர்ஸ், பார்ன்ஹப், நாட்டி அமெரிக்கா  முதலான பிட்டுப்பட தளங்களில் சைல்ட் செக்ஸ் வீடியோக்கள் முழுமையாக தடை செய்யப்பட்டுள்ளது. அப்படி இருக்கும்போது 14 வயது சிறுவனின் காதல் கலந்த காமப்போராட்டம் திரைப்படத்தில் இடம்பெறுகிறது என்பதால் ஒரு சிலருக்கு தவறான புரிதலுக்கு வித்திட வாய்ப்பு உண்டு (படம் வெளியான நேரத்தில் இது பெரும் பிரச்சனையாக கிளம்பியது என்பதும் குறிப்பிடத்தக்கது). அதனால் இத்திரைப்படத்தின் கருவை விளக்கிக்கொள்ள இத்தாலியத் திரைப்படங்களை இதற்குமுன் பார்க்கவிட்டாலும் சரி; குறைந்தபட்சம் ஸ்டான்லி குப்ரிக்கின் EYES WIDE SHUT, A CLOACKWORK ORANGE, THE SHINING போன்ற திரைப்படங்களையாவது பார்த்திருக்க வேண்டும்.

1940-களில் இத்தாலியின் சிசிலி பகுதியில் வந்திறங்குகிறாள் மலேனா. கணவன் இத்தாலிக்காக போரிடும் மேஜர். இரண்டாம் உலக யுத்தத்தில் கலந்துகொள்ள சென்றிருக்கிறான். அவளின் தந்தை ஒரு காது கேட்காத பள்ளி ஆசிரியர். மலேனா – பெயருக்கேற்றார்போல் பேரழகி. அழகு என்பதன் முழு அடையாளமாய் விளங்குகிறாள். இது அந்நகரில் வசிக்கும் பெண்களுக்கு பொறாமையையும் ஆண்களுக்கு அவளை அடையவேண்டும் என்ற வெறியையும் தூண்டிவிடுகிறது. அதேநேரத்தில் ரொனட்டோ எனும் 14 வயது நடுத்தர குடும்பத்து சிறுவன் அவளைப் பார்க்கின்றான். பார்த்ததும் காதல். அவளை மனமார விரும்புகிறான். அவளை எண்ணியே தினமும் இரவு தூங்காமல் காமக்கனவுகளில் கழிகிறது. மலேனாவைப் பற்றிய வதந்திகள் கூடிய சீக்கிரம் உலாவர ஆரம்பிக்கிறது. அவளுக்கு கள்ளக்காதலன் இருக்கின்றான் என்று ஊரெல்லாம் வதந்திகளைக் கிளப்புகிறார்கள். ரெனோட்டாவால் தாங்க முடியவில்லை; அவளை பின்தொடருகிறான். ஆனால் அவள் தினமும் சந்திப்பது அவளின் தந்தையை. இப்படியாக இருக்க, அவளின் கணவன் போரில் இறந்துவிட்டான் என்ற செய்தி தெரியவருகிறது. இதுவரை அமைதிகாத்தவர்கள் இஷ்டத்திற்கு வதந்திகளைக் கிளப்ப ஆரம்பிக்கிறார்கள். ஆண்துணை என்று எங்கோ இருந்த ஒருவனும் இறந்துவிட்டதால் அவள் வீட்டை பிற ஆண்களும் நோட்டமிடுகிறார்கள். ஒவ்வொருத்தனாய் வந்து உதவுவதாக கூறிக் கூறி அவளை நெருங்க முயற்சிக்கிறார்கள். இப்படியாக இருக்க, அவளின்மேல் கள்ளக்காதல் கேஸ் பதிவு செய்யப்பட்டு கோர்ட்டுக்கு அழைத்துவரப்படுகிறாள்.  கோர்ட்டில் ஒரு வக்கில் அவளுக்கு ஆதரவாய் பணம் வாங்காமல் வாதாடி விடுதலையாக்குகிறான். பணத்திற்கு பதில் அவளைக் கேட்க, அவளோ மறுக்க, அவளை வன்புணர்ச்சிக்குள்ளாக்குகிறான். அதன்பின் அவளை மணந்துகொள்வதாக அவன் கூற, அவனைப் பிடிக்காவிட்டாலும் அவளும் வேறுவழியின்றி அவனை நம்புகிறாள்.

வக்கிலின் தாயார் திருமணத்திற்கு சம்மதிக்காததால் அவளுடைய உறவையும் முறித்துக்கொள்கிறான் வக்கில். இன்னொருபுறம் தந்தையும் இறந்துவிட முழுக்க அநாதையாகிறாள் மலேனா.  வறுமையும் சேர்ந்துவிடுகிறது. ரொட்டி கொடுப்பவன்கூட அவளை மேய நினைக்கிறான். பசிக்காக வேறுவழியில்லாமல் அவனுடன் படுக்கிறாள். ஒருகட்டத்தில் சிசிலி நகரை ஜெர்மானியர்கள் கைப்பற்றுகிறார்கள். இதன்பின் வேறுவழி தெரியாமல் அவள் விபச்சாரி ஆகிறாள். ஏற்கனவே வயித்தெரிச்சலில் இருக்கும் கூட்டம் வயித்தெரிச்சலுக்கு ஏற்றமாதிரியான விசயம் கிடைத்ததும் ஊரிலேயே மட்டமானவளாக அவளை நினைக்கின்றனர். சிலநாட்களுக்குப்பிறகு ஜெர்மானியர்கள் போரில் தோற்க, அமெரிக்கப்படை நாட்டினூடே நுழைகிறது. வெற்றிக்களிப்பில் நகரே ஆராவரமடைகிறது. அந்நேரத்தில் ஜெர்மானியர்களின் கைக்கூலி இவள் என்று கூறி அதுவரை ஆள்மனதில் பொதிந்து வைத்திருந்த அத்தனை வன்மத்தையும் அந்நகர பெண்கள் மலேனாவின் மீது பிரயோகப்படுத்துகிறார்கள். அவளை அடித்து, உடையைக் கிழித்து, மொட்டைஅடித்து ஊரைவிட்டே துரத்துகிறார்கள். அவளும் ரயிலில் ஏறி கிளம்பிச்செல்கிறாள். அவளின் அழகுக்காக  என்னவேனாலும் கொடுப்பதாய் கூறிய அத்தனை ஆண்களும் அவளை இழிபிறவியாய் பாவித்து, நமக்கும் இதற்கும் சம்பந்தம் இல்லை என்பதைபோல் ஒதுங்கிக்கொள்கிறார்கள். இத்தனையையும் நாம் பார்ப்பது ரெனோட்டாவின் வழியே. அவனாக நாம் மலேனாவைப் பார்க்கிறோம். அவளை அடித்துத்தொரத்திய சிலநாட்களில் இறந்ததாக கூறப்படும் மலேனாவின் கணவன் ஊருக்குள் வருகிறான்.  அவன் யார் யாரிடமோ அவளைப் பற்றி விசாரிக்கிறான். அவனைக் கண்டாலே உச்சா போகுபவர்கள் கூட, போரில் கையிழந்த அவனைப் பார்த்து அந்த வேசியைப் பற்றி யாரிடம் கேட்கிறாய் எனக்கூறி அவமானப்படுத்தி தொரத்துகிறார்கள். இதன்பின் என்ன ஆனாது என்பது கிளைமேக்ஸ்.

இந்த மையக்கதை ஒருபுறம்; அடுத்தது இதன் மேலோட்டமான கதை – அதாவது ரெனோட்டாவின் கதை. டீனேஜ் ஆரம்பத்தில் ஒவ்வொருவருக்கும் பிறக்கும் காமம் கலந்த காதல். மலேனாவைப் பார்த்த நொடியிலிருந்து. அவளின் வாழ்க்கையை எப்படியாவது மீட்டெடுத்து அவளுக்கு நல்லவாழ்க்கையை அவன் அமைத்துத்தர ஆசைபட்டான். அவளை அவ்வூரிலிருக்கும் ஆண்களிடமிருந்து எப்படியாவது காப்பாற்றிவிட ஆசைப்பட்டான். தான் பார்த்த நாடகங்களில் வரும் காட்சிகளைப்போல் பறந்துசென்று அவளை காப்பாற்றவேண்டும் இந்த சதிகாரர்களிடமிருந்து என தினமும் எண்ணினான். அவனுக்குத் தெரிந்தது எல்லாம் மலேனா. அவளின் ஒவ்வொரு அசைவுகளையும் மனதினுள் படம்பிடித்தான். அவளை அடைய நினைத்தான். ஆனால் அவளை வற்புறுத்தி அடையும் வழியைக் காட்டிலும் தன் ஹீரோயிசத்தால் அவளைக் காதலில் வீழ்த்தவேண்டும் என்று எண்ணினான். அவளைப் பற்றி யாராவது தவறாக பேசினால் கோபம் பொத்துக்கொண்டு வர ஆரம்பித்தது அவனுக்கு. இத்தனைக்கும் ஒருமுறை கூட அவன் மலேனாவிடம் பேசியது கூட இல்லை. அவளுக்கு தெரியாமல் அவள் வீட்டில் நடப்பதை ஒளிந்துகொண்டு கவனித்தான். அவளைப் பற்றிய உண்மை அறிந்த மூன்றாவது ஆள். சூழ்நிலையையும் நிலைகெட்ட மாந்தாராலும் அவள் அடையும் கஷ்டங்களை அவளுக்கு தெரியாமலே அவளுடன் இருந்து புரிந்துகொண்டு வந்தவன். ஒருகட்டத்தில் அவளது கணவனைப் பார்த்ததும் அவளுக்கான வாழ்க்கையை அவளிடம் கொடுத்துவிட ஆசைப்பட்டான். ஒருகாதலனாய் தான் காதலித்த பெண்ணிற்கு நல்ல வாழ்க்கையை அமைத்தும் கொடுத்தான்.

THE GOOD THE BAD THE UGLY உள்ளிட்ட பல படங்களில் இணைக்கதாசிரியராக பணியாற்றிய லுசியானா வின்சென்சோனி எழுதிய சிறுகதையைப் படித்து அந்த பாதிப்பில் இருந்த இயக்குநர் ஜ்யோசபே தர்னேத்தோர் ஒரு ஷூட்டிங்கில் மோனிக்கா பெலுசுசியைப் பார்த்ததும் அந்த சிறுகதையைத் திரைப்படமாக்க முடிவு செய்தார். அதன்படி உருவானதுதான் மலேனா. பொதுப்படையாக பார்க்கும்போது காமச்சுவை வெளிப்பட்டாலும் இது முழுக்க முழுக்க அவலச்சுவையை உள்ளடக்கிய ஒரு அற்புதப்படைப்பு. மலேனாவை மார்க்கெட்டில் வைத்து பிற பெண்கள் அடிக்கும் காட்சியில் அவள்  பரிதாபமாக அங்கு நிற்கும் ஆண்களைப் பார்க்கும் பார்வை, நம் ஒவ்வொருவரையும் ஒருநிமிடமாவது யோசிக்கவைத்துவிடும். அற்புதமான ஒளிப்பதிவும் அழகியல் இசையும் படத்தை, படைப்பாக மாற்றிவிடுகிறது. ஒரு சாதாரண சிறுகதையை வைத்து அதை எப்படியெல்லாம் மெருகேற்ற முடியுமோ அவ்வளவு வித்தையும் திறம்பட செய்து சிறுகதை ஏற்படுத்திய தாக்கத்தினைக் காட்டிலும் பலமடங்கு தாக்கத்தை நம்முள்ளே ஏற்படுத்திவிடுகிறார் இயக்குநர் தர்னேத்தோர்.  மலேனா பார்த்தபின் அழகான பெண்ணைப் பார்த்தும் புணர்ந்துவிடவேண்டும் என்று எண்ணும் மனோபாவம் குறைந்தபட்சம் நம்மிடமிருந்து ஒருமாதமாவது ஓடிஒளிந்துகொள்ளும். நமக்குக்கிடைக்காத ஒரு அழகான பெண்ணை, நம் நண்பர்களின் மத்தியில் ஐட்டம் என்று கூறும் கேவலமான சேடிச எண்ணம் ஓரளவாவது ஓடி ஒளிந்து கொள்ளும்.


பின்குறிப்பு – படத்தில் ரெனோட்டாவின் அப்பாவாக வருபவர் செய்திருக்கும் அட்டகாசங்கள் கண்டிப்பாக சிரிக்கவைத்துவிடும். மலேனாவின் அழகிற்காக இரண்டு முறை எனில் அவருக்காக மூன்றாவது முறை பார்க்கவைத்துவிடும் இத்திரைப்படம்.

Tuesday, 15 November 2016

JAFFER PANAHI-யின் THE WHITE BALLOON – சினிமா விமர்சனம்




சினிமா என்பது பொழுதுபோக்கிற்கு மட்டுமல்ல; அது ஒரு கலை. காவியத்திற்கு சரிசமமான மற்றொரு உறுதியான, எளிமையான வடிவம். அது நாம் சார்ந்த இனம், மொழி, மதம், நாடு என எல்லாவகையான பரிமாணங்களையும் கலாசாரத்தோடும் பாரம்பரியத்தோடும் பிண்ணப்பட்டிருக்க வேண்டும். இதை ஈரானியர்கள் உணர கிட்டத்தட்ட 60 வருடங்கள் பிடித்தது. ஒரு குறிப்பிட்ட அழுத்ததிற்கு மேல் வெடித்துச் சிதறும் எரிமலையாய் 90-களில் வெடித்து சிதறியது ஈரானிய சினிமா அலை. உலகின் மிகக் கட்டுபாடுகளுக்குட்பட்டு திரைப்படங்கள் எடுக்கப்படும் இடமாக தாரளமாக ஈரானை சொல்லலாம். ராணுவ ஆட்சி, மதக்கட்டுப்பாடு, பழமைவாதிகள், போர், அரசியல் காரணங்கள் என வெளிப்படையான பல பிரச்சனைகளுக்கிடையே கதை எழுதுவதிலிருந்து சென்சார் வரை என ஏகப்பட்ட மறைமுக பிரச்சனைகளைத் தாண்டியே ஒவ்வொரு ஈரானியத் திரைப்படமும் இன்றுவரை வெளியாகிறது.

உதாரணமாக நீங்கள் ஒரு கதை எழுதியிருக்கிறீர்கள் எனில் நேரடியாக தயாரிப்பாளரை அணுகி படத்தை எடுத்துவிட முடியாது. கதையை அரசிடம் காட்டி அவர்கள் ஏற்றுக்கொள்ளும்படியாக செய்யவேண்டும். எனக்குத் தெரிந்து எழுதும் கதைக்கே தணிக்கை குழு இருந்த ஒரே சினிமா ஈரானிய சினிமா தான். கதையை அப்ரூவ் செய்துவிட்டால் போதுமா? திரைக்கதைக்கும் இதே நிலமை தான். அப்படியே  நீங்கள் நினைத்தமாதிரி கதை, திரைக்கதை எழுதி படத்தை எடுத்துவிட்டாலும் ரிலிசில் ஒரு பிரச்சனை இருக்கிறது. நம்மூரில் யு, ஏ என சான்றிதழ் வழங்குவது போல் அரசு அங்கு A,B, C என மூவகையாக ஒரு திரைப்படத்தை வகைப்படுத்தும். ஏ, என்றால் நிறைய திரையரங்குகளில் ரிலிஸ் செய்யலாம் என்று அர்த்தம்.  பி என்றால் சுமாரான திரையரங்குகளிலும் சி என்றால் மட்டமான ஒருசில திரையங்குகளில் லிமிடேட் எடிசனாகவும் ரிலிசாகும். நீங்கள் 1000 கோடியில் எடுத்தாலும் சி சான்றிதழ் வழங்கிவிட்டால் தெருக்கோடி தான்.
ஈரானிய சினிமாவில் இருக்கும் அரசியலைப் பற்றியும் சினிமாவின் பின்புலத்தைப் பற்றியும் பேசினால் பொங்கிக்கொண்டே போகலாம் 1500 பக்கங்களுக்கு. அவ்வளவு பிரச்சனைகளை சமாளித்துக்கொண்டிருக்கிறார்கள் அங்குள்ள இயக்குநர்கள்.

ஈரானிய சினிமா என்றவுடன் நமக்கு நினைவுக்கு வரவேண்டிய ஆள் அப்பாஸ் கியராஸ்டமி. சத்யஜித்ரேயின் இறப்பைக் கண்டு மனம் வெதும்பிய அகிரா குரசோவா இவ்வாறு கூறினார்.

‘சத்யஜித்ரேயின் இறப்பைக் கண்டு என் மனம் சொல்லமுடியாத வேதனையில் இருக்கிறது. ஆனால் சத்யஜித்ரேயின் இழப்பை ஈடுகட்ட, அவருக்கு சரிசமமான திறமையுடன் ஒருவரை இவ்வுலகிற்கு தந்த கடவுளுக்கு நான் நன்றி கூறுகிறேன்.’

இப்படி அகிரா கூறியது அப்பாஸ் கியராஸ்டமியைத் தான். யோசித்துப் பாருங்கள். உலகசினிமா பிதாமகர்களில் ஒருவரான அகிரா, மற்றொரு ஜாம்பவனான ரே-க்கு சரிசமமானதொருவராக அப்பாஸ் கியராஸ்டமியைக் கூறுகிறார் எனில் அவரின் திறமை எப்படியிருந்திருக்க வேண்டும். இம்மனிதர் மாத்திரம் சினிமா எடுக்காமல் ஓவியத்திலயே இருந்துவிடலாம் என்று தன் சிறுவயதில் எண்ணியிருந்தால் ஈரானிய சினிமா ஒட்டுமொத்தமாக அழிந்திருக்கும் என்றே கூறுவேன். ஈரானிய சினிமாவின் புரட்சிக்காரன் ஜாபர் பனாஹி,  கலகக்காரன் மொஹ்சன் மக்மல்பப் மட்டுமின்றி இன்னும் எத்தனையெத்தனையோ கலைப்படைப்பாளிகள் தடம் மாறி எங்கோ ஒரு மூலையில் இருந்திருப்பார்கள். ஆனால் நல்லவேளையாக கியராஸ்டமி அம்முடிவை எடுக்கவில்லை.

ஜாபர் பனாஹியின் திரைப்படம் இது எனக்கூறிவிட்டு அப்பாஸ் கியாராஸ்டமியை புகழ்ந்து கொண்டிருக்கிறானே என்ற எண்ணம் தோன்றலாம். நியாயமாக பார்த்தால் அப்பாஸ் கியாராஸ்டமியின் திரைப்படங்களைப் பற்றி தான் முதலில் எழுதியிருக்க வேண்டும். ஆனால் கியாராஸ்டமியின் திரைப்படங்களைப் பற்றி எழுத போதுமான அறிவு என்னிடத்தில் இல்லை. அதுமட்டுமின்றி இப்படத்தைப் பொருத்தவரை அப்பாஸ் கியாராஸ்டமி இல்லையெனில் இத்திரைப்படம் எடுக்கப்பட்டிருக்காது என்பதே உண்மை.

நான்கு தொலைக்காட்சி குறும்படங்களை IRIP (ஈரானிய தொலைக்காட்சி குழுமம்) உதவியின்றி தன் சொந்த பணத்தில் தயாரித்த பனாஹி, தன் நண்பர் பர்விஷ் கூறிய ஒரு குட்டிக்கதைப் பிடித்துப் போக, அதையே குறும்படமாக எடுக்க முடிவெடுத்து எட்டு பக்கங்களில் எழுதிய கதையே THE WHITE BALLOON. அதை அப்ரூவலுக்காக IRIB-கு அனுப்ப, வழக்கம்போலவே அவரது கதை நிராகரிக்கப்பட்டது (இதுவரை ஜாபர் பனாஹியின் ஒரு கதை கூட ஈரானிய அரசால் ஏற்றுக்கொள்ளப்படவில்லை; அதுமட்டுமின்றி ஈரானில் திரையிட அனுமதி வழங்கப்பட்ட ஒரே திரைப்படம் THE WHITE BALLOON மட்டும்தான்). பனாஹியின் இம்முயற்சியைக் கேள்விபட்ட அப்பாஸ் கியாராஸ்டமி, பனாஹியின் கதையை வாங்கிப் படித்து, தானே திரைக்கதை எழுதித் தருவதாக ஒப்புக்கொண்டார்.

அதற்குமுன் ஒரு குட்டி ப்ளாஷ்பேக். கியாராஸ்டமியின் ட்ரையாலஜி என்றழைக்கப்படும் முப்படைப்புகளில் பெரும்புகழடைந்த UNDER THE OLIVE TREES திரைப்படத்தில் உதவி இயக்குநராக பணிபுரிந்தவர் பனாஹி. அப்போதே கியாரஸ்டமி கூறிய ஒரு வாக்கியம் ‘நம் திரைப்படத் துறையின் எதிர்காலத்தை நிர்ணயிக்கும் நம்பிக்கை நட்சத்திரம் பனாஹி.’ ‘பனாஹி எந்தவொரு சூழ்நிலையிலும் தவறான திரைப்படத்தை எடுக்கமாட்டார்’ என்று ஓப்பன் டாக் கொடுக்குமளவுக்கு கியராஸ்டமிக்கு பனாஹியின் மேல் நம்பிக்கை இருந்தது. அதை இன்றுவரை காப்பாற்றியும் வருகிறார். 2015-ல் வெளிவந்த TAXI திரைப்படம்கூட அந்த நம்பிக்கையை காப்பாற்றியது.

இப்போது நிகழ்காலத்திற்கு வருவோம். கியராஸ்டமி இப்படத்தின் திரைக்கதையை எழுதிக்கொடுக்க முன்வந்த இருகாரணங்களில் முக்கியமானதொன்று பனாஹியின் திறமையின் மீது இருந்த நம்பிக்கை; மற்றொன்று இத்திரைப்படம் குழந்தைகள் பற்றியது. (கியராஸ்டமியின் முதலிரு தொலைக்காட்சி திரைப்படங்களும் குழந்தைகளைப் பற்றியதே. ஸ்பில்பெர்க்கை விட குழந்தைகளை அதிகமாக நேசக்கும் கலைஞன் கியராஸ்டமி.) தான் கூறியது போலவே அற்புதமான திரைக்கதையை அசால்டாக எழுதிக்கொடுத்தது மட்டுமின்றி, அதை IRIB-யிடம் கொடுத்து அப்ரூவலும் வாங்கி தந்தார் கியராஸ்டமி.

அப்ரூவல் கிடைத்தாயிற்று; ஆரம்பித்து விடலாம் ஷூட்டிங்கை என்று உடனுக்குடனே முடிவு செய்யாமல், தன் கதைக்குத் தேவையான பாத்திரங்களைத் தேடி அலைந்தார் பனாஹி. படத்தில் பெண்குழந்தையின் அண்ணனாக நடிக்க ஒரு சிறுவனுக்காக 6000 சிறுவர்களைக் கண்டெடுத்து அவர்களில் இருந்து மொஹ்சன் எனும் சிறுவனைப் பிடித்தார். படத்தில் வரும் ஒரு ராணுவ வீரன் வேடத்திற்காக டெஹ்ரானிலிருந்து 300 கிமி பயணம் செய்து தேடியலைந்து ஒருவரைக் கொண்டுவந்தார். மீன் விற்கும் கடைக்காரராக நடிக்க ஒரு நிஜ கடைக்காரரையே நடிக்கவைத்தார். ஷூட்டிங் நடந்துகொண்டிருந்தபோது நாயகியான குட்டிப்பெண் ஐதாவிற்கு தவறுதலாக கொதிநீர் காலில் விழுந்து அதற்காக 20 நாட்கள் தள்ளிவைத்தது போக ஒரே ஷெட்யூலில் படத்தை முடித்தார் பனாஹி. புதிய டெஹ்ரானின் லுக் படத்திற்கு இடஞ்சலாக இருக்கும் என கியராஸ்டமி நம்பியதால் பழைய டெஹ்ரானின் எச்சமாக இருந்த பஷன் நகரில் படத்தை எடுத்து முடித்தார்.

படத்தின் கதையை ஒரே பத்தியில் சொல்லிவிடலாம்; புத்தாண்டு அன்று தங்கமீன் வைத்திருக்கவேண்டும் என்பது ஒவ்வொரு பாரசீக குடும்பத்திலும் பின்பற்றும் வழக்கம். வீட்டில் ஏற்கனவே மீன்கள் இருந்தாலும் கடையில் பார்க்கும் அழகான ஒரு தங்கமீனை வாங்க நினைக்கிறாள் ரசியா எனும் ஏழு வயது பெண்குழந்தை. செல்லும் இடத்தில் தவறுதலாக  அம்மாவிடம் அடம்பிடித்து வாங்கிய பணத்தை தொலைத்துவிடுகிறாள். அது ஒரு அன்டர்க்ரவுண்டில் மாட்டிக்கொள்கிறது. மீன் வாங்க சென்ற தன் தங்கையைத் தேடி வரும் அண்ணன் . இவர்களிருவரும் சந்திக்கும் பல்வேறு மனிதர்கள் மற்றும் அவர்களின் வாழ்க்கைச் சூழ்நிலை இவற்றையெல்லாம் 80 நிமிடத்தில் சொல்லும் திரைப்படமே THE WHITE BALLOON.

இவ்விடத்தில் பாராட்டப்பட வேண்டியது கியரஸ்டமியின் திரைக்கதையைத் தான். படத்தின் மேலோட்டமான கதை, மையக்கதை என இருவகையாக பிரித்து எழுதப்பட்ட திரைக்கதை. அதாவது மேலோட்டமான கதை என்னவென்றால் ரசியா மீன் வாங்குவது; மையக்கதை என்பது அவள் சந்திக்கும் மனிதர்கள். மேலோட்டமான கதையை நாம் மையக்கதையாக நம்பும் சூழ்நிலையில் படம் துவங்கியிருக்கும். முடியும்போது மேலோட்டமான கதை எது , மையக்கதை எது என நம்முள் உணரவைத்திருப்பார் பனாஹி. மையக்கதையை நாம் உணரும் நேரத்தில் இதுவரை நாம் எதை உண்மையென நம்பினோமோ அத்தனையையும் மறந்து சிலாகித்துக் கொண்டிருப்போம். ரசியாவின் அண்ணன் பணத்தை மீட்டெடுக்கும் முயற்சியில் ஈடுபடுவதை மறந்து ராணுவ வீரனின் ஏக்கத்தை நினைத்து நாம் மனம் கசிவோம்.  ரசியா மீன் வாங்கியது நம் மனதுள் நிற்காது. பலூனை விற்கும் அந்த ஆப்கானிய அகதி சிறுவனின் தனிமையே நம்மை வாட்டியெடுக்கும்.

பனாஹியின் மிகச்சிறந்த துவக்கம் என இத்திரைப்படத்தைத் தாரளமாக சொல்லலாம். ஈரானிய அரசின் மெத்தனத்தால் ஆஸ்கார் அனுப்பப்பட்ட இத்திரைப்படம் திரும்ப பின்வாங்கப்பட்டது. டைம்ஸ் இதழ் பட்டியலிட்ட உலகின் சிறந்த 50 படங்களுல் ஒன்றாக தேர்வானது இத்திரைப்படம். அது மட்டுமின்றி கேன்ஸ் உட்பட பல உலகத்திரைப்பட விழாக்களில் பங்கேற்ற திரைப்படம். மிஸ் செய்யாமல் பார்த்துவிடுங்கள். யூட்யூப்பிலேயே கிடைக்கிறது.

பின்குறிப்பு – அப்பாஸ் கியரோஸ்டமி, மக்மல்பப், ஜாபர் பனாஹி ஆகியோரின் பிற திரைப்படங்களைப் பற்றி வரிசையாக எழுத இருப்பதால் இப்பதிவில் சொல்லமறந்த, சொல்லவேண்டிய பல விசயங்கள் பின்வரும் பதிவுகளில் தொடரும்.



Monday, 14 November 2016

அச்சம் என்பது மடமையடா – சினிமா விமர்சனம்




ஒரு நாவலின் சாராம்சம் கெட்டுவிடாமல், அது கொடுக்கும் தாக்கத்தை அப்படியே திரையில் காட்டும் வல்லமை வெகுசிலருக்கே அமையும். ஆங்கிலத்தில் மார்ட்டின் ஸ்கார்சேசே இதில் வல்லவர். ஒரு நாவலின் முழுமையான திரைவடிவத்தை அவர் திரைப்படங்களில் காணலாம். அந்த திறமை வாய்த்த தமிழின் ஒரே இயக்குநர் கௌதம் வாசுதேவ் மேனன் மட்டுமே. அவரின் திரைப்படங்களுல் வேட்டையாடு விளையாடு, மின்னலே, நடுநிசி நாய்கள் தவிர்த்து மற்ற அனைத்தும் ஒரு நாவல் வாசிக்கும் அனுபவத்தைத் தரக்கூடியது. படத்தில் வரும் மெயின் கேரக்டர்களின் மனதையும் நம்மிடம் உணர்ச்சியுடன் வெளிப்படுத்துவார். அதுதான் கௌதம்.

ஆனால் எது ஒருவரின் திறமையோ, அது அவரின் மிகப்பெரிய மைனஸ் பாயின்டாகவும் இருக்கும். கௌதம் வெளிப்படுத்தும் இலக்கியத் தன்மையை, அவருடைய கதாபாத்திரங்கள் நொடிக்கு ஒரு முறை கூறிக்கொண்டே இருக்கும். ஒருநிமிடம் கூட நமது காதுக்கு ரெஸ்ட் கிடைக்காது. எதாவது பேசிக்கொண்டே இருப்பார்கள். அந்த கொஞ்சநஞ்ச ரெஸ்ட் மட்டும் நமக்கு விட்டால் போதும்; கௌதமால் ஆகச்சிறந்த இலக்கிய படைப்பை உருவாக்கிவிட முடியும்.

படத்தின் ட்ரைலரை வைத்தே கதையை எல்லோரும் புரிந்துகொண்டிருக்க முடியும். வேலை வெட்டி இல்லாத சிம்பு; சிம்புவின் தங்கையின் தோழியாக வழக்கம்போல் ஒரு கசங்கல் கூட இல்லாத உடையில் ஹீரோயின்; ரோட் ட்ரிப்; திடீர் ஆக்சன். படம் முழுக்க நம்மை ரெஸ்ட்டே எடுக்கவிடாத வசனங்கள். ஆனாலும் சலிக்கவில்லை. எவ்வளவு நேரம் வசனங்கள் வந்தாலும் நமக்குப் பிடித்திருக்கிறது. ஆங்காங்கே ப்ரில்லியன்டான வசனங்கள் நம்மை கிறங்கடிக்கிறது. காதல் எனும் அழகிய உணர்வை வழக்கம்போல் அழகாய் கடத்திக்கொண்டு செல்கிறார். ஆனால் அவர் செய்த ஒரு காரியம் முதல்பாதி முழுமையும் 5 பாடல்களைப் போட்டது தான். ஒருவேளை இரண்டாம்பாதி த்ரில்லர் கம் ஆக்சன் என்பதால் பாடல் போட்டு அந்த வேகத்தைக் குறைக்க வேண்டாம் என்று எண்ணியிருக்கலாம். அது ஓரளவு வொர்க்கவுட்டும் ஆகியுள்ளது. ஏனெனில் தள்ளிப்போகாத, ராசாளி ஆகிய இரு பாடல்களைத் தவிர்த்து மற்ற அனைத்துப் பாடல்களும் ஏதோ விசுவலால் நன்றாயிக்கிருக்கிறதே ஒழிய, தனியாய் கேட்கும்போது சுத்தம். அதிலும் சோக்காளி பாடல் ரஹ்மான் கேரியரில் எரிச்சலூட்டிய முதல் பாடல் என்றே சொல்லலாம். RAB போடுவதாய் கூறி நம் காதை RABE செய்துள்ளார் ரஹ்மான்.

டேன் மெக்கார்த்தர் ஒளிப்பதிவு பெரிதாய் தெரியவில்லை. ஆனால் ஆக்சன் காட்சிகளில் உதவியிருக்கிறது. எடிட்டிங் மற்றும் நான் லீனியர் எடிட்டிங் இரண்டும் அட்டகாசம். சிறிது தடம்பிறழ்ந்தால் கூட குழப்பியிருக்கும் படியான திரைக்கதையை, மிகச்சரியாக கத்தரித்து பார்வையாளனுக்குள் கடத்தியிருக்கிறார் ஆன்டனி.

சிம்புவின் எனர்ஜி இரண்டாம் பாதியில் மட்டுமே பிரதிபலிக்கிறது. தள்ளிப்போகாதே பாடலில் அவரிடம் எனர்ஜியே இல்லை. அவர் நினைத்திருந்தால் இன்னும் அற்புதமாக அந்த உணர்ச்சியைக் காட்டியிருக்கலாம். சாமியார் ஆனதிலிருந்து சாந்த சொருபியாகிவிட்டார் என நினைக்கிறேன். ஆனால் இரண்டாம் பாதியில் அவரின் நடிப்பு வழக்கம்போல அருமை. என்ன! எதற்கெடுத்தாலும் அடி தொண்டையிலிருந்து ‘கூட வரலாம்ல, ஒவ்வொருத்தனா போடனும்’ என்று பல்லைக் கடித்துக் கொண்டு டயலாக் டெலிவரி செய்திருப்பது தான் உதைக்கிறது. மஞ்சிமா மோகனை கௌதம் தவிர வேறு யார் கையாண்டிருந்தாலும் அழகாய் காட்டியிருக்கமுடியாது. சுமாரான அழகியை அருமையாகக் காட்ட முயற்சித்திருக்கிறார்; அது ஓரளவு வொர்க்கவுட்டும் ஆகியுள்ளது. நண்பன் மகேஷ் கேரக்டர் அட்டகாசம்.



பாடல்களை படமாக்கிய விதம், எப்போதும் போலில்லாமல் கொஞ்சம் விறுவிறுப்பான திரைக்கதை, ஏ.ஆர்.ரஹ்மானின் பிண்ணனி இசை, சிம்புவின் நடிப்பு ஆகியவை படத்தின் பலம். ஒரு பயணமானது எப்படி வேண்டுமானாலும் இருக்கலாம்; அதுதான் இரண்டாம் பாதி. அதன் போக்கை நாம் உணர்வதற்குள் பல அசம்பாவிதங்கள் நடந்துவிடுகின்றன. அதை அப்படியே தத்ரூபமாக நம் பார்வைக்கு கடத்தியுள்ளார் கௌதம். முதல் பாதி தட்டுத் தடுமாறி சென்றாலும் இரண்டாம்பாதியில் எழுந்து நின்று விறுவிறுவென நகர்த்திக் கொண்டு செல்கிறது திரைக்கதை. கண்டிப்பாக மிஸ் செய்யாமல் பார்க்கலாம்.

Sunday, 13 November 2016

SOURCE CODE - சினிமா விமர்சனம்




இந்த ஹாலிவுட்காரர்கள் இருக்கிறார்களே! நான் பிடித்த முயலுக்கு மூன்றுகால் என்று சொன்னால் யாரும் நம்பமாட்டார்கள். ஆனால் நான் எடுத்த படத்தில் முயலுக்கு இரண்டே இரண்டுகால் தான் என்று நம்மை நம்பவைத்துவிடுவார்கள். இவர்களிடம் சிக்கிய சயின்ஸ் பிக்சன் ஜானரானது நமக்குள்ளே இவ்வளவு விஷயங்கள் இருக்கிறதா என்று அதுவே தன்னை நினைத்து ஆச்சரியம் கொள்ளவைக்கும் அளவு ஏகப்பட்ட பிக்சன்காளால் திணறடித்துக் கொண்டிருக்கிறார்கள். அதுவும் குறிப்பாக இந்த ‘நேரம்’ என்ற வஸ்துவை வைத்துக்கொண்டு இவர்கள் ஆடும் ஆட்டம் இருக்கிறதே! இன்னும் நேரம் என்றால் என்னவென்று தெளிவான அறிவியலைக் கண்டறிவதற்குள்ளே தங்களின் மூளையை உபயோகித்து  இவர்கள் திரைப்படத்தில் காட்டும் விசயங்களைப் பார்க்கும்போது அறிவியலறிஞர்களே வாயைப் பிளந்துவிடுகிறார்கள். சும்மா பேச்சுக்காக இதைச்சொல்லவில்லை. இன்டர்ஸ்டெல்லர் திரைப்படத்தின் பணியாற்றிய விஞ்ஞானி கிப் தோர்ன் , திரைப்படத்தில் வெளியான விசுவல் எஃபெக்ட்களை வைத்து வார்ம்ஹோல் பற்றிய தனது ஆய்வினை விரிவுபடுத்தியுள்ளார் என்றால் பார்த்துக்கொள்ளுங்களேன்.

ஏற்கனவே டைம் லூப் பற்றிய பல திரைப்படங்களைப் பார்த்திருப்பீர்கள் அல்லது கேள்விப்பட்டிருப்பீர்கள். EDGE OF TOMMORROW, TRIANGLE, ABOUT TIME, HAUNTER, MINE GAMES, PREMATURE, TIMECRIMES என ஏகப்பட்ட லிஸ்ட்டை அடுக்கிக்கொண்டே போகலாம். இந்த டைம் லூப்போடு இந்த திரைப்படத்தில் வேறொரு விசயத்தைப் பயன்படுத்தியிருக்கிறார்கள். அதுதான் யுக்ரோனியா எனப்படும் ஆல்டர்நேட்டிவ் டைம்லைன் (அ) பாரல்லல் டைம்லைன். இந்த ஆல்டர்நேட்டிவ் டைம்லைனை பார்க்கும்முன் இந்த வகையில் வெளியான திரைப்படங்களைப் பற்றி கூறிவிடுகிறேன். அதைவைத்துக்கொண்டு இதைப்பார்த்தால் உங்களுக்கு ஓரளவு விளங்கலாம்.
INGLORIOUS BASTARDS, THE GOOD DINOSAUR, BACK TO THE FUTURE போன்ற திரைப்படங்கள் இதற்கு உதாரணமாக கொள்ளலாம். முதல் திரைப்படமான இன்க்ளோரியஸ் பாஸ்டார்ட்ஸ் திரைப்படத்தின் கதைக்களமானது ஹிட்லரை கொல்வது. வரலாற்றின்படி ஹிட்லர் தானாக தற்கொலை செய்துகொள்வார். ஆனால் அவரை தன் திரைப்படத்தில் வரும் தன் கதாபாத்திரங்கள் கொலை செய்யமுயன்று அதில் வெற்றியடைந்ததாக க்வென்டின் காட்டியிருப்பார். இப்போது டைனோசருக்கு வருவோம். பூமியின் மீசோசோயிக் காலத்தில் (ஏறத்தாழ 6 கோடியே 60 லட்சம் ஆண்டுகளுக்கு ) முன்பே டைனோசர் இனம் பூமியில் மோதிய பெரும் விண்கற்களால் அழிந்தது எனப் படித்துள்ளோம். ஆனால் THE GOOD DINOSAURS திரைப்படத்தில், பூமியைத் தாக்கவந்த விண்கல்லானது திசைமாறி வேறிடத்திற்கு சென்றுவிடும். அதனால் டைனோசர் இனம் தொடர்ந்து பூமியில் வாழும். வாழ்வது மட்டுமின்றி தாவரஉண்ணிவகை டினோசர்களான அபடோசர்ஸ் விவசாயம் செய்து வாழ்வதுபோல் காட்டியிருப்பார்கள். அதன்பின் பிறக்கும் மனிதர்களை அந்த டைனோசர்கள் எலிகளாக கருதுவதும் , ஒரு மனிதக்குழந்தைக்கும் ஒரு டைனோசர்குட்டிக்கும் இடையே நடக்கும் நிகழ்வுகளென திரைப்படம் தொடர்ந்து பயணிக்கும்.

இப்போது மேட்டர் என்னவென்றால் இதுதான். வரலாற்றில் நடந்த விசயங்கள், ஒருவேளை நடக்காமல் போனாலோ, மாற்றி நடந்திருந்தாலோ என்ன ஆகும் என்பதுதான் இந்த ஆல்டெர்நேட்டிவ் டைம்லைன். ஒருவேளை வரலாறு மாற்றமடைந்திருப்பின் எல்லாமே மாறியிருக்கவேண்டுமே என்று நீங்கள் கூறுவது புரிகிறது. அங்கேதான் இந்த தியரி ஒரு ட்விஸ்டை வைக்கிறது. இப்போது THE GOOD DINOSAURS திரைப்படத்தை எடுத்துக்கொள்வோம். விண்கற்கள் பூமியைத் தாக்காததால் இந்த பூமியில் இருக்கும் டைனோசர்கள் நன்கு வாழ ஆரம்பிக்கிறது. ஒருகட்டத்தில் தாவரவகை உண்ணிகள் நாகரிகமடைந்து, விவசாயம் செய்ய ஆரம்பிக்கிறது. அதன்பின் தோன்றும் மனிதன் அதனுடன் இணைந்து வாழ்கிறான். பூமியில் இப்போது மனிதனைவிட புத்திசாலித்தனமான டைனோசர்கள் ஆதிக்கம் செலுத்திக்கொண்டிருக்கும். மனிதன் அவைகளின் பணியாட்களாக கூட இருக்கலாம். ஆனால் இது நடைபெறவில்லை. அப்படி நடந்திருந்தாலும் அது வேறொரு காலக்கோட்டின்கீழ் நடக்கும். அதாவது ஒருவேளை டைனோசர் இனங்கள் தப்பித்திருந்தாலும், அவை வேறொரு காலத்தில் வாழ்ந்துகொண்டிருக்கும். அந்த காலக்கோட்டைப் பொறுத்தவரை மேலே சொன்ன கதைகள் நடைபெறலாம். ஆனால் அது நடந்திருந்தாலும் நாம் வாழும் இக்காலக்கோடானது மாறாது. நாம் வாழும் காலமானது தொடர்ந்தாற்போல் இயங்கிக்கொண்டிருக்கும். அதேபோல் அந்த காலக்கோட்டில் டைனோசர்களும் வாழ்ந்துகொண்டிருக்கும்.

நன்கு குழப்பி எடுக்கிறேன் என நினைக்கிறேன். காலத்தை அதன் நிகழ்வுகளின் அடிப்படையில் பல்வேறு காலக்கோடுகளாக பிரித்துக் கொள்ளுங்கள். 12 B திரைப்படத்தை கணக்கில் எடுத்துக்கொள்ளுங்கள்.  ஒருவிசயம் நடந்தால், நடக்காமல் இருந்தால் என இருவேறு விசயங்களின் அடிப்படையில் இந்த காலக்கோட்டை வைத்துக்கொள்ளுங்கள். நீங்கள் காதலித்த பெண்ணையே திருமணம் செய்தால் நடப்பவை ஒரு காலக்கோடாகவும், அவளே நம்மை கழட்டிவிட்டு வேறொருவருடன் திருமணம் செய்துகொண்டால் நடப்பதை ஒரு காலக்கோடாகவும் பிரித்துக் கொள்ளுங்கள். இப்போது ரியாலிட்டியில் நீங்கள் திருமணம் செய்யவில்லை. ஒருவேளை உங்களால் இறந்தகாலத்திற்கு சென்று அவளின் திருமணத்தை நிறுத்தி, உங்களையே திருமணம் செய்துகொள்ளும்படி  செய்கிறீர்கள். இப்போது மீண்டும் உங்களின் காலத்திற்கு, அதாவது ரியாலிட்டிக்கு வருகிறீர்கள். இப்போது உங்கள் வாழ்க்கையில் அவள் இருப்பாள் என நினைத்தால் அதுதான் இல்லை. உங்களின் தற்போதைய வாழ்க்கை அதேபோல்தான் இருக்கும். ஆனால் கடந்த காலத்தில் நீங்கள் மாற்றீனீர்கள் அல்லவா? அந்த வாழ்க்கை தனியாக வேறொரு டைம்லைனில் இயங்கும். இந்த கருமத்திற்கு பெயர்தான் ஆல்டர்நேட்டிவ் டைம்லைன். இது ஒன்னும் தெளிவான அறிவியல் இல்லை என்பதை நினைவில் கொள்க. இது ஒரு புனைவு. இதற்கும் ஐன்ஸ்டைனின் ரியாலிட்டி தியரிக்கும் பற்பல மடங்கு எதிர்வினை இருப்பதால் நாம் ரொம்ப போட்டு குழப்பிக் கொள்ள வேண்டாம்.
அது எப்படி ? இறந்தகாலம் மாறினால் எதிர்காலமும் மாறவேண்டுமே என்று உங்களுக்கு சந்தேகம் வந்தால் நீங்கள் ரியாலிட்டி தியரியையும், ஆல்டர்நேட்டிவ் டைம்லைனையும் ஒருமுறை ரெபர் செய்துவிட்டு தொடர்ந்து படியுங்கள். இல்லையெனில் இந்த பத்தியைப் படியுங்கள். ‘உன் பதிவைப் படித்தால் கீழ்பாக்கத்திற்கு தான் செல்லவேண்டும்’ என நினைப்பவர்கள் இப்பத்தியைத் தாண்டிவிட்டு செல்லுங்கள். ஒவ்வொரு வினைக்கும் எதிர்வினை உண்டு என ஆப்பிள் மரத்தடியில் அடிவாங்கிய நியூட்டன் கூறியிருக்கிறார். அதே கான்சப்ட் தான் இங்கும். இறந்தகாலம் மாறினால் எதிர்காலமும் மாறும் எனக் கோட்பாட்டின் எதிர்வினை தான் இது. இறந்தகாலம் மாறினால் அது வேறொரு ட்ராக்கிலும், எதிர்காலமானது மாறாமல் அப்படியே தான் இருக்கும் என்பதும்தான் இந்த தியரியின் சுருக்கம். இந்த கணிதத்தில் நேர்மாறல், எதிர்மாறல், ப்ரபோசனல் டு, ஆப்போசனல் டூ என்றெல்லாம் சொல்லுவார்களே! அதே தான்.   ஸ்ஸ்ஸ்ப்பபா!!!! ஒருவழியாக சொல்லவந்ததை ஓரளவு தெளிவாக சொல்லிவிட்டேன் என நினைக்கிறேன். இவைகளெல்லாம் மனிதனின் புனைவே தவிர நிருபிக்கப்பட்ட ஒன்றல்ல என்பதையும் கவனத்தில் கொள்ளவேண்டும்.

ஏறத்தாழ நான்கு பக்கத்திற்கு அறிவியலை ஜூஸ் போட்டு கொடுத்துவிட்டேன். எனவே இப்போது திரைப்படத்திற்கு வந்துவிடுவோம். இல்லையெனில் நான் என்னிடம் இல்லாதவொன்றான அதிமேதாவித்தனத்தைக் காண்பிப்பதற்காக எனக்கே புரியாத பல தியரிகளைச் சொல்லி, உங்களை உளவியல் ரீதியாக பித்தனாக்கிவிடுவேன். காலை 7.40 மணிக்கு சி்காகோவை நோக்கி ஒரு ரயில் சென்றுகொண்டிருக்கிறது. ரயிலில் உள்ளே தூங்கிக்கொண்டிருந்த ஒரு ஆள் திடுக்கிட்டு எழுகிறான். அவன் எதிரே இருக்கும் பெண் சாதாரணமாக அவனுடன் பேசிக்கொண்டிருக்கிறாள். அவன் முகத்தில் பற்பல குழப்பங்கள். அவனுக்கு எதிரில் இருப்பவள் யார் என்று தெரியவில்லை. தன்னுடைய பெயர் கேப்டன் ஸ்டீவ் கோலின்ஸ் எனவும் தான் ஆப்கானிஸ்தானில் போரிட்டுக்கொண்டிருக்கும் ஒரு அமெரிக்க கேப்டன் என்றும் அவளிடம் தெரிவிக்கிறான் ; மேலும் நான் எப்படி இங்கு வந்தேன் என அவளிடம் கேட்கிறான். அவளோ சிரித்துவிட்டு ‘நீ சான் ஃபென்ட்ரஸ் (SEAN FENTRESS). நீ ஒரு பள்ளி ஆசிரியர். நான் கிறிஸ்டீனா’ எனக்கூறுகிறாள்.  ஷாக் ஆகும் ஸ்டீவ் பாத்ரூம் நோக்கி செல்கிறான். அங்குள்ள கண்ணாடியில் பார்க்கும்போது அவனுடைய முகம் மாறியிருக்கிறது. ‘இன்னாடா இது வம்பாக்கீதே’ என்று அவன் குழப்பத்தில் ட்ரைனில் அலைய, அந்நேரம் கிறிஸ்டீனா அவனிடம் வந்து ‘நாம் அடுத்த ஸ்டாப்பில் இறங்கிவிடலாம். உனக்கு என்ன ஆயிற்று எனக் கண்டறிந்துவிடலாம். எல்லாம் சரியாகிவிடும்’ என்று கூறி முடிப்பதற்குள் ரயில் வெடித்து சிதறுகிறது.

மீண்டும் ஸ்டீவ் கண்விழிக்கிறான். அவன் ஒரு அறையில் அடைக்கப்பட்டிருக்கிறான். ஒரு பெண்குரல் அவனை எழுப்புகிறது. ‘கேப்டன் ஸ்டீவ். நீங்கள் அந்த ரயிலில் பாம் வைத்தவனை கண்டுபிடித்தீர்களா ’ எனக்கேட்க, ‘நீ யார்? இங்கு நான் எப்படி வந்தேன். இது என்ன இடம்’ என்று ஸ்டீவ் குழம்புகிறான். சிறிதுநேரத்தில் தன்னுடன் பேசும் பெண்ணின் உருவம் அவன் அறையில் இருக்கும் டி.வியில் தெரி்கிறது. அவள் மீண்டும் மீண்டும் பாம் வைத்தவனைக் கண்டுபிடித்தீர்களா? எனக் கேட்க, இல்லை என்று ஸ்டீவ் சொல்கிறான். அப்போதுதான் அவனுக்கு அவள் பெயர் குட்வின் என நியாபகம் வருகிறது. ‘சரி, மீண்டும் முயற்சியுங்கள் . உங்களுக்கு முன்பு போலவே 8 நிமிடம் மட்டுமே இருக்கிறது’ என்று சொல்லிவிட்டு அவனை மீண்டும் ரயில் வெடிவிபத்து நடைபெறுவதற்கு 8 நிமிடங்களுக்கு முன்பு அனுப்பி விடுகிறாள்.

இம்முறை பாமைக் கண்டுபிடிக்கும் ஸ்டீவ், அதை எப்படி செயலிழக்கச் செய்வது எனத் தெரியாமல் விழிக்கிறான். அதனால் பயணிகளிடம் செல்போன், லேப்டாப், பேஜர் போன்றவற்றை அணைக்கச் சொல்கிறான். ஆனால் பாம் வெடித்துவிடுகிறது. மறுபடியும் அறைக்குள் இருக்கிறான். குட்வின் அவனிடம் மீண்டும் அனுப்புவதாக கூறுகிறாள். ஆனால் ஸ்டிவ் தன் தந்தையிடம் பேசவேண்டுமென கோரிக்கை வைப்பதற்குள் ரயிலுக்குள் அணுப்பப்படுகிறான். ரயிலில் சந்தேகத்துக்கிடமானவர்களை பார்க்கிறான். அதில் ஒருவனை பாலோவ் செய்து கிறிஸ்டீனாவுடன் சிகாகோவிற்கு முன்னாடி ரயில் நிலையத்தில் இறங்குகிறான். அந்த சந்தேகத்துக்கிடமான ஆசாமியுடன் சண்டை போடும் நேரத்தில் ரயில் தூரத்தில்  வெடிக்கிறது. அதேநேரம் ஸ்டீவ் தவறி ட்ராக்கில் விழுந்து வேறொரு ரயிலில் அடிபட்டு இறக்கிறான்.

மீண்டும் அறை. இம்முறை தன்முன்னுள்ள டி.வி. ஸ்க்ரீனீல் பேசிக்கொண்டிருக்கும் குட்வின்னிடம் உன்னுடைய பாஸிடம் பேசவேண்டுமென வற்புறுத்துகிறான். வேறுவழியில்லாமல் டாக்டர்.ரட்லஜ் ஸ்டீவ்விடம் பேசுகிறார். இம்முறை பிளானை முழுமையாக விவரிக்கிறார் ரட்லஜ். சோர்ஸ் கோட் என தான் கண்டறிந்த ஒரு சமாச்சாரமானது, ஒரு நிகழ்வு நடந்ததற்கு 8 நிமிடத்திற்குமுன் அந்த நிகழ்வில் இருந்த ஒருவரின் மூளையோடு, இப்போதிருக்கும் ஒருவரின் மூளையை கனெக்ட் செய்யும் ஒரு டெக்னாலஜி என்றும் அதைவைத்து அந்த பாம் வைத்தவனைக் கண்டறிந்தால் மட்டுமே, இன்னும் சிறிதுநேரத்தில் சிகாகோவில் வெடிக்க இருக்கும் மிகப்பெரிய வெடிவிபத்தை தடுக்க இயலும் என்றும் கூறுகிறார். ஆனால் இந்த சோர்ஸ் கோடினால் இறந்தகாலத்தை மாற்றமுடியாது எனவும் கூறுகிறார். அப்படியே மாற்றப்படும் இறந்தகாலமானது ஆல்டர்நேட்டிவ் டைம்லைனில் இயங்கும் எனக் கூறுகிறார். ஆனால் தான் கிறிஸ்டீனா எனும் பெண்ணைக் காப்பாற்றியதாக ஸ்டீவ் தெரிவிக்க, கிறிஸ்டீனா தற்போது இறந்தவிட்டாள், ஆனால் அவள் வேறொரு டைம்லைனில் உயிருடன் இருக்கலாம் என ரட்லஜ் கூறுகிறார்.

இதற்குபின் மீண்டும் ரயில்; மீண்டும் அறை; இடையில் கிறிஸ்டீனா மீது காதல் வேறு. தன் தந்தையிடம் ஒருமுறையாவது பேசிவிட வேண்டும் என பரிதவிப்பு வேறு; யார் அந்த பாமர் என்ற பெரும் கேள்வி வேறு. தான் எப்படி இங்கு வந்தோம்? தன் குழுவில் பணியாற்றிய சக ராணுவ வீரர்கள் என்ன ஆனார்கள் என பற்பல சந்தேகங்களைக் கொண்டிருக்கும் ஸ்டீவ்விற்கு எல்லா குழப்பங்களும் பிரச்சனைகளும் எப்படி முடிவுக்கு வந்தது என்பது மீதிப்படம்.

மூன் என்ற ஒற்றைப் படத்திலே உயரம் தொட்ட டங்கன் ஜோன்ஸ் , தனது இரண்டாவது திரைப்படத்திற்காக நடிகர் ஜேக் கில்லன்ஹாலை சென்று சந்தித்தார். தான் ம்யூட் (MUTE) எனும் திரைப்பட ஸக்ரிப்ட் எழுதி இருப்பதாக தெரிவித்த ஜோன்ஸ், அதை இயக்க ஒரு வருடத்திற்கு மேலாகும் என்றார். சரி அதுவரைக்கும் எதற்கு சும்மா இருக்கவேண்டும்? ஸ்பிசியஸ் போன்ற திரைப்படங்களுக்கு திரைக்கதை எழுதிய பென் ரிப்லியின் ஒரு திரைக்கதை என்னிடம் இருக்கிறது. படித்துப்பாருங்கள்; அட்டகாசமாக இருக்கிறது என்றாராம் ஜேக். டங்கன் ஜோன்சும் படித்துப் பார்க்க அப்படி உருவானது தான் இந்த சோர்ஸ்கோட். ஆனால் பாருங்கள்; டங்கன் அதன்பின் வார்க்ராப்ட் எடுத்தார். தன் கனவுத்திரைப்படம் என்று சொன்ன ம்யூட் இப்போதுதான் எடுத்துக்கொண்டிருக்கிறார் . ஹைலைட் என்னவென்றால் ம்யூட் திரைப்படத்தில் இப்போது ஹீரோவாக நடித்துக்கொண்டிருப்பவர் நம் லெஜன்ட் ஆஃப் டார்சன் ஹீரோவான அலெக்சான்டர் ஸ்கார்ஸாட்.

ஒருவகையில் இந்த திரைப்படம் EDGE OF TOMMORROW-வின் முன்னோடி எனலாம். அத்திரைப்படம் உங்களுக்கு பிடித்திருந்தால் இதுவும் கண்டிப்பாக பிடிக்கும்.  திரைக்கதை பிரியர்களுக்கு ஏற்ற தீனி இந்த திரைப்படம் என்றும் சொல்லலாம். ஒரு அட்டகாசமான திரைக்கதையை வைத்துக்கொண்டு பட்டாசாக நகர்த்தியிருக்கும் திரைப்படம் தான் சோர்ஸ்கோட்.



Wednesday, 9 November 2016

MIRACLE IN CELL NO. 7 – சினிமா விமர்சனம்



என்னதான் ஹார்ரர், சயின்ஸ்-பிக்சன், த்ரில்லர், ஆக்சன் என்று பலவகையான திரைப்படங்களைப் பார்த்தாலும் இந்த ஃபீல்-குட் திரைப்படங்கள் தரும் அனுபவம் அலாதியானது. பெரும்பாலான ஃபீல்-குட் திரைப்படங்கள் நம்மையறியமால் நம் மென் உணர்வை தூண்டிவிடக்கூடியவை. அதனால்தான் இந்த வகையறா திரைப்படங்களில் நடித்துவரும் டாம் ஹேங்ஸ் உலகின் மோஸ்ட் பவர்ஃபுல் ஹீரோவாக இருக்கிறார் (மோஸ்ட் வான்டட் ஹீரோ – ஜானி டெப்).

ஃபீல் குட் திரைப்படங்கள் ஹாலிவுட்டில் தாராளமாய் ஏராளம் உள்ளது. ஹாலிவுட் தவிர்த்து வேற்றுமொழிகளில் வரும் அற்புதமான பல திரைப்படங்கள் தற்போது தான் நம் பார்வையில் விழுகின்றன. பாரசீக நாடுகளில் மஜித் மஜிதி போன்றோர்  கலக்கிக் கொண்டிருக்க, சைலன்டாக கொரியர்கள் உலகத்தரத்தில் பல அற்புத படைப்புகளைத் தந்துகொண்டிருக்கிறார்கள்.  கிம்-ஜி-வூன், கிம்-கி-டுக், சான்-வூக்-பார்க் போன்றோர் எடுக்கும் திரைப்படங்கள் தற்போது உலகளவில் ட்ரென்டாகி வருகிறது. கொரியர்களின் சினிமாக்கள் அழகியலைக் கவித்துமாக பேசுகிறது. அந்த கொரியர்களின் படைப்புதான் இந்த திரைப்படம் .

லீ-வான்-க்யுன்க் இயக்கத்தில் 2013-ல் வெளிவந்த இத்திரைப்படம் அப்போதைய கொரிய பாக்ஸ் ஆபிசை அடித்து நொறுக்கியது. சில்ட்ரன்ஸ் ஆஃப் ஹெவன், ஐ யம் சாம் போன்ற திரைப்படங்கள் பிடிக்குமெனில் கண்டிப்பாக இந்த திரைப்படமும் உங்களுக்கு மிகமிகப் பிடிக்கும். கதையானது மனநலம் குன்றிய தந்தைக்கும் அவனுடைய மகளுக்கும் இடையே நடக்கும் பாசப்போராட்டத்தை அடிப்படையாக கொண்டது. லீ-யாங்-கோ எனும் மனநலம் குன்றியவர் தன் ஆறு வயது மகள் யே-சங்குடன் சந்தோஷமாக வசித்து வருகிறார். தன் மகள் ஆசைப்படும் ஒரு ஸ்கூல்பேக்கை வேறொரு குழந்தையின் பெற்றோர் வாங்க, அந்த பேக் என் மகளுடையது என வம்பு செய்கிறார் லீ. அப்பிரச்சனைக்குப் பின் ஒருநாள் மார்க்கெட்டில் நடந்துசென்று கொண்டிருக்கும் ஒரு பெண் , லீ-யாங்-கோ ஒரு பெண்குழந்தையை ஏதோ செய்துகொண்டிருப்பதைக் கண்டு போலிசை அழைக்கிறாள். அந்த பெண்குழந்தை தான் ஸ்கூல் பேக்கை வாங்கியவள். அவளை வல்லுறவில் ஈடுபடுத்தி கொடூரமாக கொன்றுவிட்டான் லீ-யாங்-கோ என்று கேஸ் போட்டு போலிஸ் கைது செய்கிறது. இறந்த பெண்ணின் குடும்பமோ பெரும் வசதி படைத்தது. லீ-யாங்-கோவிற்கு மரணதண்டனை அளித்து கோர்ட் தீர்ப்பளிக்கிறது. அவன் ஜெயிலுக்கு கொண்டு செல்லப்படுகிறான். ஜெயிலில் அவனுடன் சில கிரிமினல்கள் இருக்கிறார்கள். அந்த அறையின் எண் தான் 7.

தன் தந்தையை பிரிந்த யே-சாங் எப்படியாவது அவருடன் வாழவேண்டும் என துடிக்கிறாள். சிறையில் இருக்கும் கைதிகளுக்கு ஒருமுறை லீ-யாங்-கோ உதவ, அவனுக்கு என்ன வேண்டுமானாலும் செய்து தருவதாக அவர்கள் வாக்களிக்கிறார்கள். அதன்படி அவனுடைய குழந்தையை சிறையில் ஒருநாள் யாருக்கும் தெரியாமல் கொண்டு வருகிறார்கள். இந்த உண்மையை ஜெயில் வார்டனுக்கு தெரிய வருகிறது. அவரோ தன் மகளை நோயினால் பறிகொடுத்தவர்.  இதன்பின் யே-சாங் சிறைக்கு யாருக்கும் தெரியாமல் பலமுறை வருகிறாள். ஒருகட்டத்தில் லீயின் அறையில் இருப்பவர்களுக்கும், ஜெயில் வார்டனுக்கும் லீ எந்த தவறும் செய்யவில்லை என்ற உண்மை தெரியவருகிறது. மறு விண்ணப்பம் அளித்து மீண்டும் சரிவர விசாரனை நடத்த வேண்டும் என்று எல்லோரும் கோரிக்கை வைக்கிறார்கள். மறுவிசாரணையில் தான்தான் அக்குழந்தையைக் கொன்றதாக லி-யாங்-கோ வாக்குமூலம் அளிக்கிறான். எதனால் அவன் அப்படி செய்தான்? யே-சாங்கின் நிலை என்ன? அந்த அறையில் இருந்தவர்களின் கதி என்ன? என்பது போன்றவை மீதிப்படம்.

படத்தில் பாராட்டப்படவேண்டிய விசயம் ஒளிப்பதிவு. இவ்வளவு ரிச்சான ஒளிப்பதிவை நான் எந்தவொரு திரைப்படத்திலும் பார்த்ததே இல்லை. ஒவ்வொரு காட்சியிலும் கேமரா கவிதை பாடுகிறது. கொரியர்களுக்கென்று தனி கேமரா செய்து விற்பார்கள் போல. A BITTERSWEET LIFE –வை விட மிகத் தெளிவான அற்புதமான ஒளிப்பதிவு. இத்திரைப்படத்தின் கேமரா ஆங்கிள் , கலரிங், வி.எப்.எக்ஸ் போன்றவற்றை நம் தமிழ் ஆட்களும் பின்பற்றவேண்டும். இவ்வளவு அழகான ஒளிப்பதிவைத் தந்தமைக்காக ஒளிப்பதிவாளர் காங்-ஸ்யூங்-கி-யை எவ்வவளவு பாராட்டினாலும் தகும்.

லீ-யாங்-கோவாக வரும் ர்யூ-ஸ்யூங்-ர்யாங் –கும் (இவனுங்க பேர எழுதறதுக்குள்ள விடிஞ்சிடும் போல) மகளாக வரும் கால்-சோ-வான் இருவரும் ஏதோ ஒரிஜினல் தந்தை-மகள் என நினைக்கத் தோன்றும் அளவுக்கு நடித்திருக்கிறார்கள். ஒரு காட்சியில் கூட ஆர்ட்டிபிஷியலை பார்க்க இயலவில்லை. அவ்வளவு இயற்கையான நடிப்பு. ஏதோ திரைக்குள் இருவரும் வாழ்ந்தது போன்றதொரு உணர்வு. யாருக்காக இல்லையென்றாலும் இவர்களிருவரின் நடிப்புக்காக கண்டிப்பாக பார்க்க வேண்டிய திரைப்படம்.


இப்படத்தின் இயக்குநர் ஏற்கனவே நான்கைந்து திரைப்படங்களை எடுத்திருந்தாலும் பெரிய அளவில் பேர்வாங்கி கொடுத்த திரைப்படம் இதுதான். இத்திரைப்படம் கொரியன் என்றாலும் ஏதோ ஒரு அழகான தமிழ்ப்படம் பார்த்தது போல் உணர்வைத் தந்தது. யே-சாங் தன் தந்தையை ‘அப்பா’ (கொரியனிலும் தந்தைக்கு அப்பா தான்) என்று அழைக்கும்போது ஏதோ ஒரு தமிழ்க்குழந்தையே பேசுவது போலிருந்தது. பிரம்மாதமான இசை, ஆங்காங்கே குட்டிக்குட்டி சிரிப்பலைகள், மனதை உருக்கும் சோகக்காட்சிகள் என ஒரு கலக்கலான ஃபீல்குட் திரைப்படமாக இது இருக்கிறது. சமீபத்தில் என்னை அழவைத்த ஒரே திரைப்படம் இதுதான்.    

Thursday, 7 July 2016

தில்லுக்கு துட்டு - சினிமா விமர்சனம்




சந்தானம் ஹீரோவாக நடிக்க ஆரம்பித்தபின் வெளிவந்த முதலிரண்டு படங்களும் சுமாராகவே செல்ல , மூன்றாவதாக தமிழ்சினிமாவின் இன்றைய கலெக்ஷன் ஜானரான ஹாரர்ரைக் கையில் எடுத்திருக்கிறார். அதுவும் அவருக்கு பக்காவாகவே கைக்கொடுத்திருக்கிறது. கதை என்று பெரிதும் அலட்டிக்கொள்ளாமால் , நம்மிடம் ரசிகர்கள் எதிர்பார்ப்பது காமெடியைத் தான் என்று நன்குணர்ந்து ஒரு பக்காவான காமெடி கம் ஹாரர்ரை திகட்டத் திகட்ட தந்திருக்கின்றனர் ராம்பாலாவும் சந்தானமும்.

சிவன்மலைக்கோட்டை எனும் ஊருக்கு ஒருகாலத்தில் வியாபார விசயமாக வந்த திபெத்திய மகாராஜாவை வசியம் செய்து திருமணம் செய்துகொள்கிறாள் ஒரு வசியக்காரி. ராஜா வியாபாரத்துக்கு வெளியூர் போகும்போதெல்லாம் தன் கள்ளக்காதலனுடன் சரசம் செய்து அவன்மூலம் ஒரு பையனை பெற்றெடுத்து ராஜாவுக்கு தெரியாமல் வளர்க்கிறாள். ஒருநாள் அறிந்துகொள்ளும் ராஜா அவளின் கள்ளக்காதலனையும், குழந்தையையும் கொன்றுவிட்டு, அவளுக்கு கடுமையான தண்டனையைக் கொடுக்கும்படி ஆனையிட்டுவிட்டு , தன் மூட்டை முடிச்சைக் கட்டிக்கொண்டு தன் சொந்த ஊருக்கே கிளம்பிவிடுகிறார். பழிவாங்கவேண்டும் என்ற வெறியுடன் இருக்கும் அந்த வசியக்காரி, தன் உயிரை சாத்தானுக்கு காணிக்கையாக்கி விட்டு அந்த பங்களாவில் பேயாக அலைகிறாள். 

இப்படி டைட்டில் கார்டில் சொல்லப்பட்டதும் ஒரு புத்த சாமியார் பெட்டியில் பேயை அடைக்கிறேன் என்று பங்களாவிற்குள் செல்ல, ஏதேதோ விபரீதங்களுக்குப் பின் ஸ்ட்ரெச்சர் கட்டி அவரை அள்ளிச் செல்கிறார்கள். சென்னையில் பணக்கார ஹீரோயின் இன்ட்ரோ. அவளின் ப்ளாஷ்பேக்கில் தன் பள்ளியில் படித்த குமாரை தான் இன்னமும் விரும்புவதாக கூறுகிறாள். மோதலில் துவங்கி காதலில் முடிய, அதையறியும் ஹீரோயினின் தந்தை லோ-கிளாசான குமாரைப் போட்டு தள்ள முடிவெடுத்து மொட்டை ராஜேந்திரனை  அணுகுகிறார். கொல்வதற்காக பல ப்ளான்களை யோசிக்கும் ராஜேந்திரன், கல்யாணத்தை சிவன்மலைக்கோட்டையில் உள்ள பங்களாவில் நடத்துமாறு நைசாக சொல்லி அங்கே வைத்து போட்டு விட முயற்சிக்கிறார். பங்களா சென்றதும் என்ன ஆனது என்பது மீதிக்கதை.

சந்தானம், மொட்டை ராஜேந்திரன் கூட்டணி பட்டாசு கிளப்புகிறது. கலகலப்பு திரைப்படத்தை தியேட்டரில் பார்க்கும்போது தொடர்ந்தாற்போல் வாய்விட்டு சிரித்தது. அதன்பின் எத்தனையோ திரைப்படங்களைப் பார்த்திருந்தாலும் சிரிப்பு அந்தளவிற்கு இருக்காது. என்னையும் மறந்து வாய்விட்டு, கண்ணில் நீர்வழிய சிரித்தது இத்திரைப்படத்தில்தான். அதுவும் இரண்டாம் பாதி அட்டகாசம். முதல்பாதியை வழக்கம்போல மெதுவாக நகர்த்திக்கொண்டு வந்து இரண்டாம்பாதியில் வெளுத்து வாங்கியிருக்கிறார் ராம்பாலா. 

சந்தானம் பார்க்க பக்காவாக இருக்கிறார்; கெட்டப், டான்ஸ், ஸ்டைல், சண்டை என அனைத்திலும்  நன்கு தேறி , ஒரு ஹீரோவுக்கான அந்தஸ்தை அடைந்துவிட்டார். முதல் பாடலில் மட்டும் திணறித் திணறி டான்ஸ் ஆடுவது போலிருந்தது. சந்தானம் முதல் ஹீரோ என்றால் ராஜேந்திரன் இரண்டாவது ஹீரோ. மனுசரின் கேரியரில் இந்தளவு இவரை வேறு எந்த திரைப்படத்திலும் பயன்படுத்தியதில்லை என்றே சொல்லலாம்.  ஆனந்தராஜ், கருணாஸ் வரும் காட்சிகளில் ரகளை கட்டுகிறது. 

வசனங்கள் அனைத்தும் கவுண்டர் ரகம். நினைத்து நினைத்து சிரிக்கவைக்கும் அளவிற்கு இருந்தது. திரைக்கதையை கொண்டுபோட விதம், ஒளிப்பதிவு, எடிட்டிங், கார்த்திக் ராஜாவின் பிண்ணனி இசை என அனைத்தும் அட்டகாசம்.  தமனின் பாடல்கள் மட்டுமே ரொம்ப சுமார் ரகம்.  சந்தோஷமாக சென்று பார்த்து விட்டு வரலாம்.  செம ரகளையான திரைப்படம்.

Monday, 13 June 2016

THE CONJURING 2 – சினிமா விமர்சனம்



பேய் திரைப்படம் என்றாலே உடனே நினைவுக்கு வரும் ஆள் ஜேம்ஸ் வான். ஆள் பார்க்க பாஸ்ட்புட் கடையில் நூடுல்ஸ் கிளறும் வட இந்திய பையன்போல் இருந்துகொண்டு ஹாரர் ஜானரில் கலக்கியெடுத்துக் கொண்டிருக்கிறார். அதுவும் குறிப்பாக பேய் திரைப்படங்களில் ஜேம்ஸ் வான் செய்த சாதனைகளை மறக்கவே முடியாது. DEATH SILENCE, THE CONJURING, INSIDIOUS இரண்டு பாகங்கள் இயக்கியதோடு ANNABELLE , INSIDIOUS 3, வெளிவர இருக்கும் LIGHTS OUT ஆகிய பேய்த் திரைப்படங்களையும் தயாரித்துள்ளார். இது போதாதென்று SAW திரைப்படங்களைத் துவக்கி வைத்ததோடு மட்டுமில்லாமல் 6 பாகங்களை தொடர்ந்தார்போல் தயாரித்துள்ளார். என்னால் இன்னும் நம்பமுடியாத விசயம் FAST AND FURIOUS 7 திரைப்படம் இவர் இயக்கத்தில் உருவானது என்பதுதான். 

THE WARREN FILES எனப்பெயரிடப்பட்டு இன்ஷிடியஸ் முதல் சாப்டரை முடித்த கையோடு ஜேம்ஸ் வான் இயக்க ஆரம்பித்த திரைப்படம் தான் கான்ஜுரிங். வெறும் 20 மில்லியன் பட்ஜெட்டில் உருவான அத்திரைப்படம் அடித்த கலெக்ஷனைப் பார்த்து ஹாலிவுட்டே ஸ்தம்பித்தது எனலாம். கிட்டத்தட்ட 320 மில்லியன் டாலர் வசூல்வேட்டை நடத்திய அமிட்டிவில்லி பேயைப் பார்த்து உலகமே நடுநடுங்கியது (இந்த அமிட்டிவில்லியானது ஹாலிவுட் பேய்த்திரைப்பட இயக்குநர்களுக்கென்றே நேர்ந்து விடப்பட்ட இடம்போன்றது. எப்போது பார்த்தாலும் அமிட்டிவில்லியிலேயே பேய் உள்ளது என எக்கச்சக்கமாக அடித்து துவைத்துள்ளார்கள். இரண்டாவது பேவரைட் ஸ்பாட் கனெக்டிக்கட்). ஹாலிவுட்டில் ஒரு திரைப்படம் ஹிட் ஆனாலே சீக்குவல்ஸ் அல்லது ப்ரீக்குவல்ஸ் எடுத்து கல்லா கட்டாமல் விடமாட்டார்கள். சூப்பர்ஹிட் அடித்தால் சும்மா விடுவார்களா ???

எட்வர்ட் வார்ரன் மற்றும் லோரைன் வார்ரன் தம்பதியினர் பேய் ஓட்டுவதில் வல்லவர்கள் என சென்ற பாகத்திலேயே பார்த்துவிட்டோம். சென்ற பாகமான அமிட்டிவில்லி கொலைகளைப் பற்றிய ஆய்வு செய்யும்போது லோரைன் தன் கணவரும் பார்ட்னருமான எட்வர்ட் கொடூரமாக கொல்லப்படுவதையும், ஒரு கன்னியாஸ்திரி பேய் (கன்னியாஸ்திரினா ஏதோ மோகினிப் பிசாசு போல சின்ன வயசு பேயா இருக்கும் என்று எண்ணிவிடாதீர்கள். அதற்கு 60-க்கும் மேல் இருக்கும் வயது.) தன்னை எச்சரிப்பதையும் உணருகிறாள். இனிமேல் பெண்டிங்கில் இருக்கும் கேஸ்களை முடித்துவிட்டு இத்தொழிலை விட்டொழித்துவிடலாம் என லோரைன் முடிவெடுக்கிறாள். அதேசமயம் இங்கிலாந்தில் கணவரைப் பிரிந்து தன் 4 குழந்தைகளுடன் ஏழ்மையாக வாழ்ந்துவருகிறாள் பெக்கி ஹாட்க்சன். அவளுடைய குழந்தைகளில் ஒருத்தியான ஜானெட்டிற்கு அமானுஷ்ய குரலும் தொடர்ந்தாற்போல் அமானுஷ்ய விசயங்களும் நடக்கிறது. ஒருகட்டத்தில் அவளை வழக்கம்போல பேய் கடித்துவிட, அதைத்தொடர்ந்து காவலர்கள் வர, அவர்களும் வீட்டில் நிகழும் அமானுஷ்யங்களை கண்டு கதிகலங்க, இவ்விஷயமெல்லாம் டி.வி மற்றும் பேப்பரில் வர, இதைக் காணும் சர்ச் ஆட்கள் அமெரிக்காவிலிருக்கு வார்ரன் தம்பதியினருக்கு போன் போட்டு அங்கு வரசொல்லுகிறார்கள்.

அங்கு வேண்டா வெறுப்பாக செல்லும் லோரைனால் அங்கு இருக்கும் ஆவியுடன் பேசமுடியவில்லை. ஆனால் அங்கு அமானுஷ்யமாக ஏதோ நடக்கிறது என்பதை உணருகின்றனர். வழக்கம்போல திடீர் திடீர் என டி.டி.எஸ் சவுண்டோடு பேய் வந்து அலப்பறை செய்ய அதைப் படமெடுத்து சர்ச்சுக்கு அணுப்பலாம் என முடவெடுகிறார்கள். ஆனால் ஒரு கட்டத்தில் இம்மாதிரியெல்லாம் ஜானெட்டே செய்து நடிக்கிறாள் என்பது வீடியோ ஆதாரத்தில் தெரியவர , அவர்கள் அவ்வீட்டை விட்டு கிளம்பும்படியாக ஆகிறது. அதன்பின் ஜானெட் என்ன ஆனாள், அவர்களைப் பாடாய் படுத்தும் ஆவி எது, வார்ரன் தம்பதியினரின் நிலை, லோரைன் கண்ட காட்சிகள் போன்றவற்றிற்கெல்லாம் படத்தைப் பார்த்து தெரிந்துகொள்ளுங்கள்.

உண்மையைச் சொல்லவேண்டுமெனில் எனக்கு படத்தின் முதல்பாதி சுத்தமாக பிடிக்கவில்லை (முதல்பாதி என்றால் நம்ம ஊர் ஆட்கள் அவர்களாக இஷ்டப்பட்டு இடைவேளை விடும் நேரம் வரை) . ஒரு கட்டத்தில் கொட்டாவி மேல் கொட்டாவியாக விட்டு தூங்கும் அளவிற்கே சென்று விட்டேன். ஏனென்ற காரணத்தையும் சொல்லிவிடுகிறேன். பேய் திரைப்படங்கள் என்றாலே ஃபுல் சவுண்டில் தன்னந்தனியாக பார்த்து பார்த்து பழகியவன் நான். அதுவும் லேப்டாப்பில் ஹெட்போன் மாட்டிக்கொண்டு சரியாக இரவு நேரங்களில் 11 மணிக்கு மேல்தான் எந்தவொரு பேய்த்திரைப்படத்தையும் பார்ப்பேன். எனக்கு அப்படிப் பார்ப்பதில்தான் பிரியம். அந்த அனுபவங்களாலோ என்னவோ தான் என்னை அவ்வளவு எளிதாக ஏமாற்ற முடியாமல் இயக்குநர்கள் திணறுவார்கள். என்னால் நன்றாகவே உணரமுடியும்; இந்திந்த இடங்களில் சவுண்ட் எஃபெக்ட், இங்கெல்லாம் கோரக்காட்சிகள் என முன்னதாகவே என் மனதையும் உடலையும் தயார் செய்துவிடுவேன். அது நடந்தாலும் நடக்காவிட்டாலும் எனக்குள் எந்தவித படபடப்பும் இருக்காது. நான் தனியாக பார்த்த பல பேய்த்திரைப்படங்களை என் நண்பர்கள் பார்த்து விட்டு அடிவயிறு கலங்கியெல்லாம் வந்துள்ளார்கள். அதற்காக என்னைப் பெரிய தைரியசாலி என்றெல்லாம் சொல்லவில்லை; நிறைய படங்களைப் பார்த்த அனுபவத்தால் அந்த படபடப்பைக் கையாள பழகிக்கொண்டேன். போதாக்குறைக்கு நாங்கள் 12 பேர் தியேட்டருக்கு காலைக் காட்சி சென்றோம். தியேட்டரில் பீதியிலிருந்த பலர் பேய் வரும்போதெல்லாம் சிரித்துக் கொண்டும், தான் பயப்படவில்லை என காண்பிப்பதற்காக பேசிக்கொண்டும் இருந்ததெல்லாம் எனக்கு  எரிச்சலைத் தான் வரச்செய்தது. அதிக பயத்தில் இருந்தவர்கள் தான் பயப்படுவதை மறைக்க  கலாய்த்துக் கொண்டிருந்தவர்கள் என்பது தான் உளவியல் உண்மை.

ஆனால் இரண்டாம்பாதியில் வழக்கம்போல கொட்டாவி விட வாயைத் தொறந்த எனக்கு வைத்தார் பாருங்கள் ஷாக். சாமி; உடம்பே தூக்கிப்போட்டுவிட்டது. முதல்பாதியில் மெதுவாக நகர்த்திக்கொண்டு சென்ற படத்தை இரண்டாம்பாதியில் திடுக் திடுக் சவுண்ட் எபக்டோடு அட்டகாசமாக சென்று முடித்தார்.  என் நண்பர்களெல்லாம் முதல் பாதியிலேயே அடிவயிறு கலங்கிவிட்டது; எழுந்து ஓடிவிடலாம் போலிருக்கிறது என்று கூறினார்கள். ஆனால் இரண்டாம் பாதியில் என்னை நன்றாகவே ஏமாற்றி திடுக்கிட வைத்துவிட்டார் ஜேம்ஸ் வான். இத்தனைக்கும் படத்தில் முதல் காட்சி மட்டுமே கொடூரமாக இருக்கும். மற்றபடி டீசன்டாகவே செல்லும்.

படத்தில் ஒளிப்பதிவு, இசை, எடிட்டிங், லொகேசன் எல்லாம் பிரம்மாதம். சோர்ஸ்  கோட் மற்றும் ஆர்பன் புகழ் வெரா பார்மிகா அருமையாக நடித்துள்ளார். பேய் பிடித்து திரியும் ஜேனட்டாக வரும் மேடிசன் நடிப்பு அட்டகாசம். படத்தில் ஓஜா போர்டு காட்சிகளும் தொடர்ந்தாற் போல் பேய் பற்றிய காட்சிகளும் பார்க்கும்போது எனக்குள் ஆச்சரியம். சென்ற வாரம் நண்பர்களுடன் சேர்ந்து நானும் ஓஜா போர்ட் விளையாடினேன். ஆனால் பேயெல்லாம் வரவில்லை. நாங்கள் பேயை வரவைக்க பேசிய பல வசனங்கள் திரைப்படத்தில் இடம்பெற்றது. ஓஜா போர்ட் விளையாடும்போது வராத பேய், அதன்பின் வரும். அதேபோல் நாம எத்தன பேய உசுப்பிவிட்டமோ தெரியலையேனு யோசிக்கும்போதே ‘நல்லவேளை. நாம் பேயிற்கு குட்பை சொல்லிவிட்டுதான் ஓஜா போர்டை அழித்தோம்’ என்றான் நண்பன். 

மொத்தத்தில் கண்டிப்பாக பார்க்கலாம். இதயம் பலவீனமானவர்கள் தவிர்ப்பது நலம். இம்மாதிரியான திரைப்படங்களால் ஸ்ட்ரோக் வருவதற்கு நிறைய வாய்ப்புகள் உள்ளது. என்னது? சாகற அளவுக்கு வொர்த்தா என்று ஆச்சரியப்படாதீர்கள். 3 காட்சிகள் நம் நெஞ்சை அடைத்துக்கொள்ளும் வண்ணம் சவுண்ட் எஃபெக்ட்களைக் கொண்டுள்ளது. மற்றபடி முதல் பாகத்தின் ரெக்கார்டை அடித்துத் துவைத்துவிடும் இந்த லண்டன் பேய். எனக்கே பிடித்திருக்கிறது என்றால் கண்டிப்பாய் உங்களுக்கு மிகவும் பிடிக்கும் என நினைக்கிறேன்.

Sunday, 5 June 2016

THE PURGE – சினிமா விமர்சனம்



சயின்ஸ் பிக்சன் என்றால் யாருக்குத்தான் பிடிக்காது? அந்த சயின்ஸ் பிக்சனிலேயே நெறைய வகையறா உள்ளது. ஸ்பேஸ் அட்வெஞ்சர், டைம் ட்ராவல், எதிர்காலத்தில் நிகழும் த்ரில்லர், க்ரைம் என எடுத்துக்காட்டுகளை அடுக்கிக்கொண்டே போகலாம். இந்த சயின்ஸ் பிக்சன் ஜானரில் வெளிவந்த ஒரு சீட்எட்ஜ் ஹார்ரர் கம் த்ரில்லர் தான் இந்த பர்ஜ். 2022-ல் அமெரிக்கா மிகசுத்தமாக இருக்கிறது. க்ரைம் ரேட் 1 சதவீதமாக குறைந்து நாடே மிக மகிழ்ச்சியாக இருக்கிறது. ஆனால் எப்படி? வருங்கால அமெரிக்கர்கள் குற்றங்கள் குறையவும், நாட்டின் வளர்ச்சிக்காகவும் ஒரு தினத்தை ஆண்டவன் பெயரில் அறிவிக்கிறார்கள். அதுதான் பர்ஜ். அந்த தினத்தில் மனதில் உள்ள துவேஷத்தையும், கொலைவெறியையும், வஞ்சத்தையும் இன்னபிற கெட்டவை அனைத்தையும் தீர்த்துக்கொள்ளலாம். அன்றிரவு 7 மணியிலிருந்து அடுத்தநாள் 7 மணி வரை போலிஸ் கிடையாது; மருத்துவமனை கிடையாது; இவ்வளவு ஏன்? அரசாங்கமே  12 மணிநேரம் செயல்படாது. அன்றைய தினம் யாரும் யாரையும் கொலை செய்யலாம்; யாரை வேண்டுமானாலும் ரேப் செய்துகொள்ளலாம்.  கொலை செய்வதற்குக்கூட குறிப்பிட ஆயுதங்களைப் பயன்படுத்த அரசாங்கமே பரிந்துரை செய்யும். அன்றைய தினத்தை ரேடியோக்களும், டி.விக்களும் ஏதோ பொங்கல் திருநாள் நிகழ்வுபோன்று கொண்டாடும். அந்த தினம்தான் பர்ஜ்.

கதைப்படி ஜேம்ஸ் எனும் பணக்காரர் தன் மனைவி மேரி, டீன் ஏஜ் மகள் ஷோயி மற்றும் மகன் சார்லி வசித்து வருகிறார். அன்றைய தினம் இரவு 7 மணியிலிருந்து மறுநாள் காலை 7 மணிவரை அந்த வருடத்தின் சுத்திகரிப்பு தினம் கொண்டாடப்பட இருக்கிறது.  அன்றிரவு அவர்கள் குடும்பத்தில் நடக்கும் நிகழ்வுகளே இத்திரைப்படம். ஜேம்ஸ் ஒரு செக்யூரிட்டி சிஸ்டத்தைத் தயாரிக்கும் நிறுவனத்தின் தலைமை அதிகாரி. அவர் உருவாக்கிய செக்யூரிட்டி சிஸ்டத்தையே அமெரிக்காவின் மிகப்பெரும்பாலான வீடுகள் பயன்படுத்துகின்றன. மகள் ஷோயி அவளின் காதலன் ஹென்றியுடன் ஜாலியாக இருக்கிறாள். ஜேம்ஸ் அலுவலகம் முடித்து காரில் வீடு திரும்புவதாக படம் துவங்குகிறது. இதைக் கண்டு ஷோயி தன் காதலன் ஹென்றியை வீட்டிலிருந்து அனுப்புகிறாள். இன்னொருபுறம் சார்லி தான் கண்டுபிடித்த ஸ்பூகேமராவை வைத்துக்கொண்டு வீட்டில் நடப்பதையெல்லாம் பார்த்துக்கொண்டிருக்கிறான். வீட்டிற்கு ஜேம்ஸ் வந்ததும் டின்னர் முடிகிறது. மணியும் 7-ஐத் தொடுகிறது. பர்ஜ் தினத்திற்கான அறிவிப்பு சத்தம் கேட்டதும் தன் வீட்டின் செக்யூரிட்டி சிஸ்டத்தை ஆன் செய்துவிட்டு அனைவரும் அவரவர் அறைக்குச் செல்கிறார்கள். ஷோயியின் அறையில் ஹென்றி வீட்டிற்கு செல்லாமல் ஒளிந்துகொண்டிருக்க, ஷோயி வந்ததும் அவளிடம் ஜேம்ஸிடம் நம் காதலைச் சொல்லவேண்டும் என்று கிளம்புகிறான். இன்னொருபுறம் வீட்டிற்கு வெளியில் இருக்கும் சிசிடிவி புட்டேஜ்களைப் பார்த்துக்கொண்டிருக்கும் சார்லி ஒரு மனிதன் ஓடிவருவதையும் அவனைக் காப்பாற்றுமாறு கதறுவதையும் கண்டு அவனுக்கு உதவ முயற்சிக்கிறான்.

செக்யூரிட்டி சிஸ்டத்தை அன்லாக் செய்துவிட்டு அந்த மனிதனைக் காப்பாற்றுகிறான் சார்லி. சிஸ்டம் அன்லாக் ஆனதை உணரும் ஜேம்ஸ் கதவருகே வர, அதேநேரம் ஹென்றியும் அங்கே வருகிறான். பட்டென்று ஹென்றி துப்பாக்கியை எடுத்து ஜேம்சைக் கொல்ல முயற்சிக்க, நடக்கும் சண்டையில் ஹென்றி ஜேம்சால் கொல்லப்படுகிறான். அந்த கேப்பில் உள்நுழைந்த அந்த மனிதன் வீட்டிற்குள் எஸ்ஸாகிறான். சிறிது நேரத்தில் ஒரு டீன்-ஏஜ் ஆண்களும் பெண்களும் முகமுடி அணிந்து சைக்கோக்கள் போல வீட்டிற்கு வந்து ஜேம்சை மிரட்ட ஆரம்பிக்கிறார்கள். உள்நுழைந்த ஆசாமியை வெளியில் பிடித்துத் தந்தால் ஜேம்ஸின் குடும்பத்தை விட்டுவிடுவதாக சொல்கிறார்கள். வீட்டிற்குள் சார்லி அந்த மனிதனுக்கு உதவி செய்ய, இன்னொருபுறம் ஷோயி மனதளவில் ஹென்றியின் இறப்பை ஜீரணிக்கமுடியாமல் எங்கோ ஒளிந்து கொள்கிறாள். அந்த மனிதனை ஜேம்ஸ் பிடித்தாரா, ஜேம்ஸின் குடும்பம் என்ன ஆனது என்பது மீதிக்கதை. 

இந்த திரைப்படத்தில் உள்ள மிகப்பெரிய ப்ளஸ் என்னவென்றால் அதிவேக பரபர  திரைக்கதையே ஆகும். ஒரு ஆசாமி ஜேம்ஸ் வீட்டினுள் துழையும்போது ஆரம்பிக்கும் வேகம் படம் முடியும்வரை துளிகூட குறையாமல் நகர்ந்துகொண்டே இருக்கும். கான்செப்ட் ரீதியாக நம்பமுடியாததாக இருந்தாலும் திரைக்கதையானது அதையெல்லாம் ஓரங்கட்டி நம்மையும் அந்த வீட்டிற்குள் இழுத்துச்செல்லும். வில்லனாக வரும் ரைஸ் வேக்ஃபீல்டின் நடிப்பு அசத்தலாக இருக்கும். ‘மிஸ்டர் சான்டின். உங்கள் வீட்டிலிருக்கும் அந்த மனிதனைக் கொன்று எங்கள் மனதைத் தூய்மைப் படுத்தவேண்டும். தயவு செய்து அவனை வெளியே அனுப்புங்கள்’ என்று ரைஸ் கேட்கும்போது கூட இருக்கும் ஒரு பர்ஜர் கெட்ட வார்த்தையில் ஹீரோவைத் திட்டும்போது படக்கென்று அவனைச் சுட்டுவிட்டு ‘சீக்கிரம் அனுப்புங்கள். இவன் என் நண்பன்; ஆனால் நீங்கள் என் நண்பன் இல்லை’ என்று கூலாக மிரட்டும்போது நமக்கே உடல்சிலிர்க்கும். உள்ளே நுழையும் ஆசாமியான எட்வின் ஹாட்ஜ் உயிர்பிழைக்கவேண்டும் என்று துடிக்கும்போது நமக்கேபாவமாக இருக்கும். இவர்களையெல்லாம் தூரத்தூக்கிப்போட்டு கலக்குகிறார் உமா தெர்மனின் முன்னாள் கணவரும் ‘அந்த குழந்தையே நீங்க தான் ’ புகழ் ப்ரிடெஸ்டினேசன் ஹீரோவுமான ஈதன் ஹாக். ஜேம்சாக வரும் இவர் வீட்டில் பதுங்கியிருக்கும் எட்வின் ஹாட்ஜை சேரில் கட்டிப்போடும்போது ஏதோ சமையல் குறிப்பு சொல்வதுபோல மனைவியிடம் ‘கத்தியை எடுத்து அவன் உடலில் புல்லட் இறங்கிய இடத்தில் சொருகு’ என்று சொல்லிவிட்டு ‘இங்கே பாருங்க. இப்படி பண்ண உங்களுக்கு வலிக்கும். தயவு செஞ்சு என் குடும்பத்த காப்பாத்தறதுக்காக வெளிய போய் செத்துடுங்க’ என்று சொல்வதெல்லாம் ரணகளம். 

படத்தில் மூன்றுபேரை மிகமுக்கியமாக பாராட்டவேண்டும். ஒளிப்பதிவாளர் ஜாக்கஸ், இசையமைப்பாளர் நாதன் வைட்ஹட் மற்றும் எடிட்டர் பீட்டர். ஒளிப்பதிவு ஏதோ பிரம்மாண்ட திரைப்படங்களைப் பார்ப்பதைப் போன்றதொரு குவாலிட்டியில் உள்ளது. இயக்குநர் ஜேம்ஸ் டீமொனாக்கோ (இவர் பெயரும் ஜேம்ஸ் தான்) எழுதி, இயக்கிய இரண்டாவது படம் இது. 3 மில்லியனில் எடுக்கப்பட்ட இத்திரைப்படம் 90 மில்லியன் வசூல் செய்த காரணத்தால் தொடர்ந்தாற்போல் இரண்டாண்டுகளுக்கு ஒரு பர்ஜ் திரைப்படத்தை இயக்கிக்கொண்டே போகிறார். 2014-ல் வெளிவந்த இத்திரைப்படத்தின் இரண்டாம்பாகமும் செம ஹிட் ஆனதைத் தொடர்ந்து இவ்வருடம் ஜூலை மாதம் இத்திரைப்படத்தின் மூன்றாம் பாகம் ரிலிசாக இருக்கிறது.

வருங்காலத்தில் இப்படியெல்லாம் ஆகுமா? ஆகாதா என்பதை யோசிப்பதற்கு பதில் ஆகாமல் இருக்கவேண்டும் என்று வேண்டிக்கொள்வதில் தவறில்லை; ஏனென்றால் நம் மனதில் இருக்கும் வன்முறைகளைக் கட்டவிழ்த்துவிட வாய்ப்பு கிடைக்கும்போது என்னென்ன விபரீதங்கள் நிகழும் என்பதை படத்தின் கிளைமேக்ஸில் பார்க்கும்போதும் அதைப் பற்றி யோசிக்கும்போதும் மனது துடிதுடிக்கிறது. இன்று உத்தமர்களாக மெச்சக்கொள்ளும் ஹோமோசெப்பியன்ஸ் ஒரு காலத்தில் நியான்டர்தால் மனித இனத்தையே கூண்டோடு அழித்த பழிக்கு சொந்தக்காரர்கள் என்பதை நாம் நினைவுபடுத்திக் கொள்ளவேண்டும். ஏற்கனவே மதம்,இனம்,சாதி,நாடு, மொழி எனப்பல்வேறு காரணங்களால் மனிதர்கள் தங்கள் வெறுப்பைத் தீர்த்துக்கொண்டிருக்கிறார்கள். அதில் இம்மாதிரியெல்லாம் அறிவிக்கப்பட்டால் அவ்வளவு தான். அதையெல்லாம் விடுங்கள்; இந்த திரைப்படம் ஒரு மஸ்ட் வாட்ச் என்டெர்டெயினர் என்பதில் சந்தேகமில்லை. படம் முடிந்தபின் ரேடியோவிலும், டி.வி.யிலும் வரும் அறிவிப்புகளைக் கேட்க மறக்காதிர்கள்.

Saturday, 4 June 2016

SNATCH - சினிமா விமர்சனம்






கிட்டத்தட்ட ப்ளாக்கில் சுறுசுறுப்பாக இயங்கி நான்குமாதங்களுக்கும் மேலாகின்றது என நினைக்கிறேன். சில பர்சனல் காரணங்களால் எழுதுவது மட்டுமில்லாமல் வாசிப்பது, திரைப்படங்களைப் பார்ப்பது போன்ற மகத்தான காரியங்களையும் தடைசெய்யவேண்டியதாகி விட்டது. இந்நான்கு மாத காலத்தில் அதிகபட்சமாக பார்த்த  திரைப்படங்களின் எண்ணி்க்கை 20 இருக்கலாம். அதேபோல் இக்காலகட்டத்தில் படித்த நாவல்களின் எண்ணிக்கையும் 10-ஐத் தாண்டவில்லை என்பது எனக்கே வாய்த்த சோகம். வாரத்திற்கு குறைந்தபட்சம் ஒரு நாவல், 3 திரைப்படம் என்று சூளுரைத்த சபதத்தை நிறைவேற்ற கடைசி 20 நாட்களாக போராடி வருகிறேன். கிட்டத்தட்ட தினமும் 3 திரைப்படங்களும் 3 நாளுக்கு ஒரு நாவலும் படித்துவருகிறேன். இதைத்தவிர வேறு வேலையே இல்லையா என்று என்னைப்பார்த்து நீங்கள் பொறுமுவது புரிகிறது. சரி இப்போது எதற்கு இந்த ப்ளாஷ்பேக்? தேவையற்ற ஒரு பத்தி. பரவாயில்லை விட்டுத்தள்ளுங்கள். எல்லாம் க்வென்டின் திரைப்படம் பார்த்து  என்னைத்தாண்டி இப்படி ஒட்டிக்கொண்டது.

உங்களுக்கு பரபர வேகத்தில் கேங்ஸ்டர் காமெடி திரைப்படம் பார்க்கவேண்டும் என்ற ஆசை இருந்தால் சிறிதும் தாமதிக்காமல் இந்த திரைப்படத்தை டவுன்லோட் செய்துவிடுங்கள்; ரிவியூகூட படிக்கத் தேவையில்லை. திரையுலகைப் பொறுத்தவரை ஒவ்வொரு இயக்குநருக்கும் ஒரு ஸ்டைல் இருக்கும்; இந்த கேட்டகரியில் 95 சதவீத இயக்குநர்களை அடக்கிவிடலாம். ஸ்டைல் இல்லையென்று காட்டுவதுகூட ஒரு ஸ்டைல் தான்; ஸடான்லீ குப்ரிக் போன்ற ஒரு சிலரை இதில் சேர்க்கலாம். இயக்குநர் கெய் ரிட்சி (GUY RITCHIE) எழுதும் திரைக்கதைகள் அலாதியானவை. அசால்டாக போகிறபோக்கில் காமெடியைத் தூவிவிட்டு, அழகாக திரைக்கதையை நகர்த்திச் செல்வார். LOCK,STOCK AND TWO SMOKING BARRELS, SNATCH, ROCKNROLLA என இவர் எழுதிய இயக்கிய படங்கள் எல்லாம் சுந்தர்.சி ரகம். அதுவும் வெறும் காமெடியை மட்டும் பிரதானப்படுத்தாமல் ஒரு கேங்ஸ்டர் கதையில் பயங்கரமான சூழலில் தன் கேரக்டர்களை உலாவவிட்டு அதனுள் காமெடியைத் திணித்து நமக்கு ஒரு கலக்கல் கா்கடெய்லைக் கொடுத்துவிடுவார். அதுதான் கய் ரிட்சி ஸ்பெஷல். 

சினிமா எடுக்கப்படும் விதத்திலும் திரைக்கதை அமைப்பைக் கொண்டும் பல்வேறு வகையாக சினிமாவை வகைபடுத்துவார்கள் என்பது ஊரறிந்ததே. அந்தாலஜி, ஃப்லிம் நாய்ர், ஆர்ட் ஃப்லிம், எக்ஸ்பிரமென்டில் ஃப்லிம் இப்படி ஏகப்பட்ட ஸ்டைல்களை  சொல்லிக்கொண்டே போகலாம். 2005-ல் டான் ரூஸ் எனும் பிட்டுப்பட இயக்குநர் இயக்கிய ஹாப்பி என்டிங்ஸ் எனும் ஹாலிவுட் திரைப்படத்திற்கு விமர்சனம் எழுதிய அலைசா முதன்முதலில் அப்படத்தின் ஸ்டைல் குறித்து ஒரு புது வார்த்தையை உதிர்த்தார். அதுதான் ஹைபர்லிங்க் சினிமா எனும் பதம் (முன்குறிப்பு – ஸ்டைல் வேறு; ஜேனர் வேறு. திரைப்படம் எடுக்கப்படும் விதத்தைக் கொண்டு சொல்வது ஸ்டைல் எனப்படும். திரைப்படம் கொண்டு செல்லப்படும் விதத்தைப் பொறுத்து ஜேனர் குறிக்கப்படும். எடுத்துக்காட்டாக இத்திரைப்படத்தின் ஸ்டைல் ஹைபர்லிங்க் சினிமா; அதேநேரம் ஜேனர் என்றால் இது காமெடி க்ரைம் ஜானரை வந்து சேரும்). 

அதாவது ஒன்றுக்கொன்று சம்பந்தமே இல்லாத பல கேரக்டர்கள் கடைசியில் ஒருமுறை தெரிந்தோ, தெரியாமலோ சந்திக்கும்போது படத்தின் கதை திசை திரும்புவதே இந்த பதம். தமிழில் தசாவதாரம், சூதுகவ்வும் போன்ற படங்களைக் கூறலாம். இந்த பதம் வழக்கிற்கு வந்தபின் இதற்கு முன்வந்த திரைப்படங்களையெல்லாம் வகைப்படுத்த ஆரம்பத்தார்கள். அப்படி வகைப்படுத்திய பின் ஹைபர்லிங்க் சினிமாவில் கெத்துக்காட்டியவர்கள் இருவர் என கண்டறிந்தனர். ஒன்று கய் ரிட்சி; மற்றொருவர் தொடர்ந்தார்போல் இந்த ஆண்டும் கடந்த ஆண்டும்  ஆஸ்கார் அடித்த அலயேந்த்ரோ கொன்சாலஸ் இன்அரிட்டு. ஆனால் அலயேந்த்ரோ ஆரம்பத்தில் ஸ்பானிஷில் இயக்கியவர் என்பதால் ஹாலிவுட் ஹைபர்லிங் சினிமாக்களில் அவர் பெயர் இடம்பெறவில்லை. ஆனால் ஹைபர்லிங்க் சினிமாவில் உலகளவில் முன்னோடி யாரென்று பார்த்தால் நமக்கெல்லாம் உடல் சிலிர்க்கும். ஆம்; அவர் ஒரு இந்தியர் தான். சினிமா என்றதும் நினைவுக்கு வரும் சத்யஜித்ரே எனும் அந்த மேதை தான் உலகின் முதல் ஹபைர்லிங் சினிமாவை இயக்கிய பெருமைக்குரியவர்.

சரி; இத்திரைப்படத்திற்கு வருவோம். திரைப்படமானது டர்கிஷ் (ஜேசன் ஸ்டாதம்) வாய்ஸ் ஓவரில் ஆரம்பிக்கிறது. ‘வைரங்களைப் பற்றி எனக்குத் தெரியாது. நான் ஒரு பாக்ஸிங் ப்ரமோட்டர். இது என் பார்ட்னர் டாம்மி’ என்று அவர் தன்னையும் தன்னுடன் இருப்பவரையும் அறிமுகப்படுத்தும் அதேநேரம் பெல்ஜியத்திலுள்ள ஆன்ட்வெர்ப் வைரப்பாதுகாப்புக் கிடங்கில் நான்கு ஆசாமிகள் ஜாலியாக க்வென்டின் திரைப்படத்தில் வருவதுபோல் பேசிக்கொண்டு வருகின்றனர். மெயின் டோரை அடைந்து உள்நுழைந்ததும் படபடவென்று ஆடைக்குள் பதுக்கியிருக்கும் துப்பாக்கிகளை எடுத்து ஒரு பெரிய வைரக்கல்லைக் கொள்ளையடித்துச் செல்கின்றனர். அக்கூட்டத்தின் தலைவன் ஃப்ராங்கி தி ஃபோர் பிங்கர்ஸ் (பெனிசியோ டெல் டோரா). தடதடவென திரைப்படத்தில் வரும் முக்கிய கதாபாத்திரங்கள் அனைத்தும் (ஆக்சுவலி காட்சிகளில் வரும் அனைவருமே முக்கிய கதாபாத்திரங்கள்தான்) நமக்கு அறிமுகமாகின்றன. 

கொள்ளைக்கு பின்பு அனைவரும் லண்டன் சென்று பிரிகின்றனர். பிரியும் நேரத்தில் ஒரு ரஷ்யன் ஃப்ராங்கிடம் ‘உனக்குத் துப்பாக்கி வேண்டுமெனில் இவரைப் பார்’ என்று கூறி ஒரு அட்ரஸைத் தருகிறான். அந்த ரஷ்யனின் அண்ணன் தான் அந்த ஆயுத விற்பனையாளர் ; போரிஸ் தி ப்ளேட் (அ) போரிஸ் த புல்லட் டாட்ஜர் (ரேட் செர்பெட்ஷீசா). ஃப்ராங் , போரிசைப் பார்த்து துப்பாக்கி வாங்குகிறான். அவனிடம் போரிஸ் கேம்ப்ளிங்கைப் பற்றிக்கூறுகிறான். ஃப்ராங்கிற்கு கேம்ப்ளிங் மேல் அதீத ஆர்வம். இன்ஃபாக்ட் ஃப்ராங் தி ஃபோர் பிங்கர்ஸ் எனும் பேர் உண்டானதே சூதாட்டத்தில் தன் ஒருவிரலை பந்தயம் கட்டி இழந்ததால்தான். ஏற்கனவே போரிஸின் சகோதரன் ஃப்ராங்கைப் பற்றியும் அவனிடம் இருக்கும் வைரத்தைப் பற்றியும் போரிஸிடம் தெரிவித்ததால் கேம்ப்ளிங்கை வைத்து ஃப்ராங்கை கவிழ்த்துவிடுவான் போரிஸ். 

அதேநேரம் டர்கிஷ் ஒரு பாக்ஸிங் ப்ரமோட்டர். லண்டனில் வெய்ட்டு கையான ப்ரிக் டாப் (ஆலன் ஃபோர்ட்) ஏற்பாடு செய்யும் ஒரு அன்லைசென்ஸ்டு பாக்ஸிங்கில் தன் ஆளான பாக்சர் கோர்ஜியஸ் ஜார்ஜை  விளையாட வைக்கிறான். டர்கிஷ்கு அவசரமாக ஒரு கேரவன் தேவைப்பட, வாங்கிவர டாமியையும் கோர்ஜியஸ் ஜார்ஜையும் அனுப்பி வைக்கிறான். சிப்பாக கிடைக்குமென்பதால் டாமி செல்லுமிடம் பைக்கி என்றழைக்கப்படும் ஐரிஷ் நாடோடிகள் இனத்திற்கு. அங்கே மைக்கி எனப்படும் ப்ராட்பிட்டைச் சந்தித்து கேரவன் வாங்குகிறார்கள். ஒரு கட்டத்தில் வாய்க்கால் தகராறாக கோர்ஜியஸ் ஜார்ஜுக்கும்  மைக்கிக்கும் சண்டை வர, ஜார்ஜை ஒரே அடியில் வீழ்த்திவிடுகிறான் மைக்கி. டர்கிஷ் இப்போது சண்டையில் பங்கேற்க வைக்க ஆளில்லாமல் தவிக்க, மைக்கியையே சண்டையில் கலந்துகொள்ள செய்யவைக்கிறான். அதற்காக ப்ரிக் டாப்பிடம் சென்றுபேச, ப்ரிக்டாப் ‘உன்னுடைய ஆளை 4 ரவுண்ட் வரைத் தாக்குபிடித்து விளையாடி தோற்க வேண்டும்’ என்று கட்டளையிடுகிறான். ப்ரிக்டாப் பற்றி சின்ன முன்னோட்டம்; தனக்கு ஆகாதவர்களே, தன் சொல் கேட்காதவர்களைத் துண்டுதுண்டாக வெட்டி ஒரு வாரம் பசியோடு இருக்கும் பன்றிகளுக்கு உணவாக்கிவிடுவான் (தடையறத்தாக்க நினைவுக்கு வந்தால் நான் பொறுப்பில்லை). டீலை ஏற்றுக்கொள்கிறான் டர்கிஷ்.

அதேநேரம் போரிஸ்,  அடியாள்களை வைத்து ஃப்ராங்கியைக் கடத்தி, அவன் கையுடன் இணைக்கப்பட்டுள்ள வைரத்தைக் கடத்த முடவெடுக்கிறான். அதற்காக அவன் தேடிச்செல்வது அடகுக்கடை ஓனரான வின்னி. வின்னியின் பார்ட்னர் சால் மற்றும் தைரன். அவர்களிடம் பாக்சிங் நடக்கும் இடத்தில் கொள்ளையடிக்கவேண்டும் மற்றும் ஒருவனைக் கடத்தவேண்டும் என்று போரிஸ் கூற, மூவரும் கொள்ளையடிக்கச்செல்லும்போது ப்ரிக் டாப் ஆபிசில் இருக்கும் CCTVயில் மாட்டிக்கொள்கிறார்கள். எப்படியோ அடித்துப்பிடித்து அவர்கள் ஃப்ராங்கியைக் கடத்தி வருகிறார்கள். ஃப்ராங்கியிடம் இருக்கும் வைரத்தைப் பற்றி தெரிந்துகொள்ளும் மூவரும் போரிசிடம் அதிக அமௌன்ட் கேட்க, போரிசோ ஃப்ராங்கியைக் கொன்றுவிட்டு கிளம்புகிறான். அதேநேரம் பாக்சிங் மேட்சில் தோற்கவேண்டிய மைக்கி, ஒரேஅடியில் எதிரியை வீழ்த்திவிடுகிறான். இதனால் செம காண்டாக இருக்கும் ப்ரிக்டாப், டர்கிஷ்ஷை மிரட்டி, மீண்டும் மைக்கியை சண்டையில் கலந்துகொண்டு தோற்கவைக்க வேண்டும் என்று கட்டளையிடுகிறான். டர்கிஷ், மைக்கியிடம் சென்று கேட்க அதை ஒப்புக்கொள்ள மறுக்கிறான் மைக்கி. இதனால் காண்டாகும் ப்ரிக்டாப் , மைக்கியின் அம்மாவை கேரவனில் வைத்து எரித்துவிடுகிறான். அதனால் தான் மீண்டும் சண்டையிடுவதாக ஒப்புக்கொள்கிறான் மைக்கி.

அதேநேரம் அமெரிக்காவின் ஃப்ராங்கியின் சொந்தக்காரரும் வைரவியாபாரியுமான கசின் ஏவி, ஃப்ராங்கி கடத்தப்பட்டதை அறிந்து கிளம்பி லண்டன் வருகிறார். அங்கே அவனுடைய தோழன் டஃப் த ஹெட்டைச் சந்தித்து, ஃப்ராங்கியையும் வைரத்தையும் கண்டறிவதற்காக புல்லட் டூத் டோனி என்பவனை நியமிக்கிறான். இவர்கள் மூவருக்கும் போரிஸ் பற்றி தெரியவர, போரிஸ் மாட்டிக்கொள்கிறான். 

ப்ரிக்டாப் தன் ஆபிசில் மிரட்டிய வின்னி குழுவினரைக் கொல்லமுயற்சிக்க, அவர்கள் வைரத்தைப் பற்றித் தகவல் தர, வைரத்தைக் கண்டுபிடித்துக்கொண்டு வர 2 நாள் கெடு விதிக்கிறான் ப்ரிக்டாப். அதேநேரம் போரிஸ் ஒரு கட்டத்தில் ஏவி குழுவிடம் இருந்து தப்பிக்கிறான். வைரம் என்ன ஆனது? மற்ற கதாபாத்திரங்களின் நிலை என்ன? போன்ற பல என்ன-க்களைப் படத்தைப் பார்த்து தெரிந்துகொள்ளுங்கள். 


அடேங்கப்பா. சிம்பிளாக வைரக்கொள்ளை என்று ஒரு வார்த்தையில் எவனும் கதையைச் சொல்லிவிடக்கூடாது என்பதற்காகவே மாய்ந்து மாய்ந்து இத்தனை கேரக்டர்களை நுழைத்து மிகத்துல்லியமாக தான் நினைத்ததைச் சாதித்திருக்கிறார் கெய் ரிட்சி. கதையை ஒரு பத்தியில் எழுதிவிடலாம் என்று நினைத்த என்னையே இந்த வாங்கு வாங்கவைத்துவிட்டார். கதை பயங்கர குழப்பகரமானதாக படிக்கும்போது உங்களுக்கு தோனலாம். ஆனால் திரையில் பார்க்கும்போது துல்லியமாக, மிகத்துல்லியமாக விளங்கவைத்திருப்பார் இயக்குநர். ஒவ்வொரு கேரக்டரைப் பற்றியும் முன்பே அறிமுகப்படுத்திவிட்டு (ஒரே செகன்டில்) அவர்களைப் பற்றிய பின்னூட்டங்களை ஆங்காங்கே விவரித்திருப்பார். எடுத்துக்காட்டாக ஃப்ராங்கி தி ஃபோர் பிங்கர்ஸ் என்று கூறப்பட்டவன் எதற்காக ஃபோர் பிங்கர்ஸ் என்று அழைக்கப்படுகிறான் என்பதை நடுவில் கூறப்படும். இதேபோல் ஒவ்வொரு அடைமொழிக்கும் ஒவ்வொரு விசயத்தைக் குறிப்பிட்டிருப்பார். தீப்பொறித் திருமுகம், அட்டாக் ஆறுமுகம், படித்துறை பாண்டி என நமக்கு இந்த அடைமொழியெல்லாம் புதுசல்ல. எம்.ஜி.ஆர் காலத்து படங்களிலேயே கத்தி கபாலி, பயில்வான் பாண்டியன், கருந்தேள் கண்ணாயிரம் (கருந்தேள் அண்ணன சொல்லலிங்க) போன்று பல அடைமொழிகளைப் பார்த்துவிட்டோம். ஆனால் ஆங்கிலத்தில் பார்க்கும்போது இன்னும் ஜாலியாக இருக்கிறது.  

படத்தில் ஒன்லைன் காமெடிகள் கொடிகட்டி பறக்கிறது. டர்கிஷ் , டாமியிடம் பேசிக்கொண்டிருக்கும்போது (நம்மிடமும் தான்) சமையல் செய்து கொண்டிருப்பவனைப் பார்த்து
What's with those sausages,Charlie? என்று கேட்க,
Two minutes, Turkish. என்பான் சமையல் செய்பவன். சிறிதுநேரம் கேரவன் பற்ற டாமியிடம் பேசிவிட்டு மீண்டும்,
What's happening with them sausages? என்று கேட்க
-Five minutes. என்பான் .
It was two minutes five minutes ago. என்று டர்கிஷ் சொல்லும்போது நமக்கே சிரிப்பு முட்டும். 

அதேபோல் வின்னி, தன் பார்ட்னர்ஸ் சால் மற்றும் தைரனுடம் காரில் செல்லும்போது, குண்டாக இருக்கும் தைரன் கார் ஓட்ட உட்காருவான். அவனை எதற்கு உட்கார வைக்கிறாய் என்று சால் கேட்க, அவன் ஹவிவெய்ட் ட்ரைவ்விங்கில் ஸ்பெசல் ட்ரைனிங் எடுத்தவன் என்று வின்னி கூறுவான். காரைக்கொண்டுபோய் பார்க் செய்யும்போது அங்கே பார்க்கிங் இடம் இருக்கிறது தைரன் என்று சால் சொல்ல, அது மிக மிக நெருக்கமாக இருக்கிறது என்று தைரன் சொல்லுவான். திரும்பி வின்னியும் சாலும் பார்க்க, 20 மீட்டர் அகலத்திற்கு இடைவெளி விட்டு கார் நிறுத்தப்பட்டிருக்கும். ஆம் இவன் ஹெவிவெய்ட் ட்ரைவர் தான் என்று சால் சொல்வதும் தாறுமாறு.. மைக்கியிடம் டாமும் டர்கிஷ்ஷும் மீண்டும் சண்டை போட வா என்றழைக்க மைக்கி ஐரிஷ் கலந்த இங்கிலிஷில் பல கண்டிசன்களை போட, இரு என் பார்ட்னரிடம் கேட்டுவிடுகிறேன் என்று திரும்பி டர்கிஷ் டாமிடம் ‘அவன் பேசியதில் ஒருவார்த்தையாவது உனக்கு புரந்ததா?’ என்று அப்பாவியாய் கேட்குமிடம் குபுக் சிரிப்பு.  இதேபோல் எண்ணற்ற காமெடிகளைப் பார்க்கலாம் . அதுவும் கடைசி 30 நிமிடம் காமெடிக்கென்று நேர்ந்துவிட்ட திரைப்படம் இது. 

பைக்கிகளைப் பற்றி சொல்லவேண்டுமெனில் எக்கச்சக்கம் உள்ளது. நம் ஊரில் குறவர், குறத்தியர் போன்ற நாடோடி இனமக்கள் தான் இந்த பைக்கிகள். அவர்களின் ஆங்கிலமானது ஐரிஷ் உச்சரிப்போடு கூடியது. டாக் (நாய்) என்பதை , டேக் என்று சொல்லுவார்கள். படபடவென பேசிக்கொண்டே செல்வார்கள். அந்த கேரக்டரில் ப்ராட்பிட் அசத்தியிருப்பார் . பிராட் பிட்டின் ரசிகர்கள் தவறவிடக்கூடாத திரைப்படம் இது (மற்றொன்று 12 மங்கிஸ்). ஜேசன் ஸ்டாதமை ஆக்சன் ஹீரோவாக மட்டும் பார்த்தவர்களுக்கு இத்திரைப்படம் ஒரு ஷாக். அப்பாவியாக முகத்தை வைத்துக்கொண்டு, வேலைக்காகதவர்களை வைத்துக்கொண்டு அவர் படும்பாட்டைப் பார்க்கும்போது தானாகவே புன்னகைப் பூக்கும். புல்லட் டாக் டூத்தாக வரும் வின்னி ஜோன்ஸ் மிரட்டியிருக்கிறார். படத்தில் என்னால் நம்பமுடியாதது இவ்வளவு பெரிய நட்சத்திர பட்டாளம் எப்படி இத்திரைப்படத்தில் இணைந்தது என்பதுதான். பெனிசிலோ டெல் டோரா, ஆலன் ஃபோர்ட், பிராட் பிட், ஸ்டேதம் என எங்கு திரும்பினும் பெரிய நட்சத்திர பட்டாளமே உள்ளது. 

படத்தில் இதைத்தாண்டிய விசயம் இசை. கிக் ஆஸ் திரைப்படத்திற்கு இசையமைத்த ஜான் மர்பி தான் இத்திரைப்படத்திற்கும் இசை. டேனி பாய்ல்லின் ஆஸ்தான இசையமைப்பாளரான இவர், கெய் ரிட்சியின் முதலிரண்டு திரைப்படங்களும் இசையமைத்தார். அதில் இத்திரைப்படம் கிளாஸிக்கல் என்றுகூட சொல்லலாம். ஆட்டகாசமான பிண்ணனி இசை. நான் இதுவரை பிஜிஎம்களை அவ்வளவு எளிதாக டவுன்லோட் செய்யமாட்டேன். Road To Perdition, Departed, Kill-Bill என என்னிடம் இருக்கும் மியூசிக் ட்ராக்குகளில் இப்போது இத்திரைப்படமும் இடம்பெற்றுள்ளது. எடிட்டர் ஜோன்ஹாரிஸ் மிகச்சிறப்பாக எடிட்டிங் செய்துள்ளார். ஒரு காட்சியில் கிட்டத்தட்ட 30-லிருந்து 40 டேக்குகள் வரை சொருகப்பட்டுள்ளன. ஆனால் அத்தனையும் மிகத்தெளிவாக கத்திரித்து ஒட்டியிருப்பதில் இவரின் திறமை வெளிப்படுகிறது.

மொத்தத்தில் காமெடி பிரியர்கள், வித்தியாசமான திரைக்கதைக் கொண்ட படங்களின் பிரியர்கள் மட்டுமல்லாமல் அனைவருமே கண்டிப்பாக பார்க்கவேண்டிய திரைப்படம் இது. ஒரே ஒரு இடத்தில் அரைநிர்வாண காட்சி இடம்பெறுகிறது என்பதையும் முன்னமே சொல்லிவிடுகிறேன். வன்முறைக்காட்சிகள் படத்தில் காட்டப்படவில்லை என்பது ஆறுதல் விசயம்.    


Friday, 20 May 2016

X-Men : APOCALYPSE – சினிமா விமர்சனம்



வெல், X-MEN சீரிஸ்களைப் பற்றித் தனியாக சொல்லத்தேவையில்லை. ஹாலிவுட் ரசிகர்கள் அனைவருக்கும் பரிட்சயமான பெயர்களில்  மிகமுக்கியமான ஒன்று X-MEN. சூப்பர்ஹீரோக்கள் என்றாலே உடனுக்குடன் நியாபகம் வரும் மார்வல் காமிக்ஸ் படைத்த மிகமுக்கியமான காமிக்ஸ்களில் எக்ஸ்மேனும் ஒன்று. காமிக்ஸ் உலகபிதாமகன் ஸ்டான் லீயால் 1963 உருவாக்கப்பட்ட X-MEN இன்று 2016-ல் அதிகம் எதிர்பார்க்கப்பட்ட 10 திரைப்படங்களில் ஒன்றாக இருக்கிறது. அதற்கு மிகமுக்கிய மூன்று காரணங்கள் என்று பார்த்தால் இயக்குநர் ப்ரைன் சிங்கர், FIRST CLASS-ன் இரண்டாம் படைப்பான DAYS OF FUTURE மற்றும் இதுவரை சூப்பர் ஹீரோக்கள் கண்டிராத மிகபலசாலியான வில்லன் என் சபா நர் என்றழைக்கப்படும் அபோகலிப்ஸ்.  வெளிவர இருக்கும் அபோகலிப்சை, உருவான இடமான அமெரிக்காவிற்கு முன்பே நாம் காண இருக்கிறோம். ஆம், இத்திரைப்படம் உலகெங்கும் வெளியாகுவதற்குள் ஒருவாரம் முன்பே இந்தியாவில் ரிலிஸ் செய்யப்படுகிறது. இந்தியாவில் X-MEN ஃப்ரான்சீஸ்களுக்கென மிகப்பெரிய ஃபேன் பேஸ் இருப்பதால் இந்தியாவில் முதலில் ரிலிஸ் செய்வதாக ஃபாக்ஸ் ஸ்டார் நிறுவனம் அறிவித்துள்ளது. (இப்போதெல்லாம் ரிலிசாகும் பெரும்பான்மையான ஹாலிவுட் திரைப்படங்கள் மற்ற நாடுகளில் ரிலிசாகும் முன்பே இந்தியாவிலும் சீனாவிலும் ரிலிசாகிவிடுகிறது.)

இதுவரை வெளிவந்த X-MEN திரைப்படங்களை மூன்றாக பிரிக்கலாம். முதலில் வெளிவந்த X-MEN, X-2 மற்றும் THE LAST STAND ஆகியவற்றை ஒரு ட்ரையாலஜி ஆகவும், WOLVERINE இரு பாகங்களாகவும், FIRST CLASS, DAYS OF FUTURE மற்றும் வரவிருக்கும் APOCALYPSE  ஆகியவற்றை ஒரு ட்ரையாலஜி எனவும் காலத்தைக் கணக்கில் கொண்டு மூன்றாக பிரிக்கலாம். இவற்றில் முதல் மூன்று திரைப்படங்கள் நிகழ்காலத்தில் நடப்பது போலவும், WOLVERINE-ன் இரு பாகங்களும் (தற்போது வரவிருக்கும் மூன்றாம் பாகத்தையும் சேர்த்துக்கொள்ளவும்) லோகன் யார் என்பதைக் கூறும் தனிக்கதையாகவும், FIRST CLASS ட்ரையாலஜி இறந்த காலத்தில் (1980-களின் மத்தியில்) நடப்பதாகவும் எடுக்கப்பட்டிருக்கும். 

மார்வலின் தந்தை ஸ்டான் லீ உருவாக்கிய இந்த X-MEN கதாபாத்திரங்களை திரையில் கொண்டு வர, இன்று நேற்றல்ல, கிட்டதட்ட 32 வருடங்களுக்கு முன்பே பரபரப்பாக வேலைகள் நடந்தன. மார்வல்லின் எடிட்டரான ராய் தாமஸ் மற்றும் கெர்ரி ஆகியோர் X-MEN-கான திரைக்கதையை எழுதி முடித்துவிட்டு, அப்போதைய காபிரைட் ப்ரொடக்சன் கம்பனியான ஒரியனை அணுகியது. ஆனால் அந்த திரைக்கதையைத் திரைப்படமாக்க போதிய அமௌன்ட் இல்லை என்று ஒரியன் நிறுவனம் கைவிரித்துவிட்டது. அதன்பின் ஸ்டான் லீயின் முயற்சியால் ஒரியனிடம் இருந்து X-MEN  கரோல்கா நிறுவனத்திற்கு கைமாறியது.   X-MEN –ஐத் திரையில் கொண்டுவர நடத்தப்பட்ட டிஸ்கஷனில் இடம்பெற்ற மிகமுக்கியமான இருவர் ஜேம்ஸ் கேமரூன் மற்றும் கேத்ரின் பிஜ்லோ. கேமரூனைப் பற்றி நாயக்கன்பட்டியில் 7-வது படிக்கும் மாணவருக்குக் கூடத் தெரியும் என்பதால் கேத்ரீனைப் பற்றிப் பார்க்கலாம். 2008 அகாடமி அவார்டைத் தட்டிய இவர் ஹர்ட் லாக்கர் திரைப்படத்தை இயக்கி ஓவர்நைட்டில் உலகப்புகழ் பெற்றவர்.  அதைத்தொடர்ந்து இயக்கிய ஜீரோ டார்க் தர்ட்டியும் விருதுகளைச் சம்பாதிப்பதற்காக உருவாக்கப்பட்டதுபோல் எண்ணற்ற விருதுகளைத் தட்டிச் சென்றது. கேமரூன் தயாரிப்பில் கேத்தரின் இயக்குவதாக இருந்த  அந்த ப்ராஜக்ட்டும் மேகரூனின் குளறுபடியால் நிறுத்தப்பட்டது. இதன்காரணமாக இத்திரைப்படத்தின் தயாரிப்பில் ஈடுபட்டிருந்த கார்கோலோ நிறுவனம், பல்வேறு காரணங்களால் தயாரிப்பைவிலக்கிவிட்டு, காமிக்ஸ் மீதான தன் உரிமையை மார்வலிடமே வழங்கியது. மார்வல் வந்த விலைக்கு விற்றுவிடலாம் என்ற முடிவில் கொலம்பியா நிறுவனத்துடன் பேச்சுவார்த்தை நடத்த, அக்காலக்கட்டத்தில் அனிமேசன் X-MEN டி.வி. சீரியஸ் ஒருபுறம் வெற்றியடைந்தது. இதைக்கண்ட ஃபாக்ஸ் நிறுவனம் உரிமையை மார்வலிடம் பேசி வாங்கியது.

உரிமையை வாங்கியதும் ப்ராட் பிட் நடிப்பில் டேவிட் ஃபிஞ்சரின் இயக்கித்தில் வெளியான செவன் திரைப்படத்தின் திரைக்கதையை எழுதிய ஆன்ட்ரூ, ஸ்கைஃபால், த அவியேட்டர், ஸ்பெக்டர், ஹுகோ, க்ளாடியேட்டர் போன்ற திரைப்படங்களிடன் திரைக்கதை ஆசிரியர் ஜான் லோகன், த கேபின் இன் தி வுட்ஸ், அவெஞ்சர்ஸின் இருபாகங்களை இயக்கிய ஜோஸ் வேடன் மற்றும் எழுத்தாளர் மைக்கேல் கேபோன் போன்றோர்களை அணுகியது. இவர்களிடமெல்லாம் காமிக்ஸை திரைப்படமாக்கும் சாத்தியத்தைப் பற்றி விசாரித்த ஃபாக்ஸ் நிறுவனம் 1996-ல் காமிக்ஸைத் திரைக்குக் கொண்டுவரும் தன் திட்டத்தை செயல்படுத்த ஆரம்பித்தது.

பொதுவாக காமிக்ஸ்களில் பெரும் வெற்றிபெற்ற கேரக்டர்களைத் திரைப்படமாக்க முயற்சிக்கும் எந்தவொரு நிறுவனமும், முதல் திரைப்படத்தைப் பெரிய இயக்குநர்களைக் கொண்டே இயக்கத் திட்டமிடும். எடுத்துக்காட்டாக 1966-ல் வெளியான பேட்மேனிற்கு திரைத்துறையில் பலவிதமான அனுபவம் வாய்ந்த லெஸ்லியை ஃபாக்ஸ் நிறுவனம் பணிக்கு அமர்த்தியது. இதேபோல் சூப்பர்மேன் திரைப்படத்தையும் குறிப்பிடலாம். 1978-ல் வெளிவந்த சூப்பர்மேன் திரைப்படத்தை இயக்கியவர் ரிச்சர்ட் டோன்னர். ஓமன் திரைப்படத்தை இயக்கி உலகப்புகழ் பெற்றிருந்த அவருக்கு சூப்பர்மேன் திரைப்படத்தின் திரைக்கதையை எழுதித் தந்தவர் மரியோ பூசா. இப்படி இருக்க ஃபாக்ஸ் நிறுவனம் X-MEN ஃப்ரான்சீஸின் முதல் திரைப்படத்தை இயக்க நியமித்த இயக்குநர் ப்ரைன் சிங்கர். பப்ளிக் அக்ஸஸ் எனும் சுமாரன திரைப்படத்தை தந்திருந்த ப்ரைன் சிங்கருக்கு பேர் வாங்கிக்கொடுத்த திரைப்படம் என்றால் அது யூசுவல் சஸ்பெக்ட்ஸ்.  ப்ரைன் சிங்கரை அப்போது எந்தவொரு தயாரிப்பு நிறுவனமும் ஏற்றுக்கொள்ள முன்வராத காரணத்தால் யூசுவல் சஸ்பெக்ட்ஸ் திரைப்படத்தைத் தன் சொந்தக்காசில் தயாரித்து வெளியிட்டார். போதிய விளம்பரமின்மை காரணத்தால் பெரும் வெற்றியடைய வேண்டிய திரைப்படம் சூப்பர்ஹிட்டோடு நின்றது. இந்த திரைப்படத்தின் தாக்கம் ஸ்கேரிமூவியின் முதல்பாகத்திலேயே இடம்பெறும் அளவுக்கு சென்றது. இப்போது ப்ரைன் சிங்கருக்கு மீடியா வெளிச்சம் கிடைத்தது. அடுத்த என்ன செய்வார் என்று எல்லோரும் எதிர்பார்த்திருந்தபோது அப்ட் பிப்புள் எனும் திரைப்படத்தை இயக்கினார். யூசுவல் சஸ்பெக்ட்ஸ் இயக்குநர் என்பதால் சோனியின் ட்ரைஸ்டார் நிறுவனம் திரைப்படத்தை வாங்கி திரையிட்டது. படம் அட்டு ப்ளாப் ஆகியது. 

இப்போது யோசித்துப் பாருங்கள். இதுவரை வெறும் இரண்டே திரைப்படங்கள் மட்டுமே ஒரு இயக்குநர்; அதிலும் ஒரு திரைப்படம் அட்டு ப்ளாப். இவரை நம்பி ஃபாக்ஸ் நிறுவனம் 60 மில்லியனைக் கொட்டத் தயாராக இருந்தது. இதற்கு இரண்டு காரணங்களில் ஒன்று யூசுவல் சஸ்பெக்ட்ஸ்; மற்றொன்று இத்திரைப்படத்தை இயக்குவதற்காக இதற்குமுன் நியமித்த இருவரில் ஒருவரான சின் சிட்டி இயக்குநர் ராபர்ட் இத்திரைப்படத்தை நிராகரிக்க, மற்றொருவரான ப்ரெட் ராட்னருக்கும் ஃபாக்ஸ் நிறுவனத்திற்கும் சண்டை வர இச்சந்தர்ப்பத்தைப் பயன்படுத்திய டாம் டீசாண்டோ சிங்கரை இத்திரைப்பபடத்திற்கு இயக்குநராக்கி விட்டார். ப்ரைன் சிங்கரை அப்ட் பிப்புள் திரைப்படம் வருவதற்குமுன்பே X-MEN-காக புக் செய்துவிட்டதால் ஃபாக்ஸ் நிறுவனத்திற்கும் வேறுவழி தெரியவில்லை. இத்தனைக்கும் சூப்பர்ஹீரோ கான்செப்ட் பற்றி சரிவரத்தெரியாதவர் சிங்கர்; ஆனால் சயின்ஸ் பிக்ஷன் திரைப்படம் இயக்கவேண்டும் என்பது அவர் கனவு. அவர் இயக்கிய இரண்டு திரைப்படங்கள் மற்றும் குறும்படம் ஆகியவை அனைத்துமே மிகமெதுவாகத்தான் நகரும். இது ஒருபுறம் இருக்க முதல்பாகத்திற்கு திரைக்கதை எழுத நியமிக்கப்பட்ட டேவிட் ஹெய்டருக்கு முதல் திரைப்படமே இதுதான். அதற்குமுன் நடிகராக  பெயர் தெரியாத சில படங்களில் நடித்தும், ஒன்றிரண்டு திரைப்படங்களின் தயாரிப்பாளராகவும் இருந்த டேவிட் ஹெய்டர் இத்திரைப்படத்தின் திரைக்கதை ஆசிரியராக நியமிக்கப்பட்டார். இதுதான் இப்படி என்றால் படத்தின் கதையை எழுத ப்ரைன் சிங்கர் தன்னுடன் இணைத்துக் கொண்டது சிங்கரின் நீண்டகால நண்பரான டாம் டிசான்டோ . அவருக்கும் கதையெழுதுவது இதுமுதல் திரைப்படம். படத்தின் மிகமுக்கியமான மூன்று துறைகளையும் இதுவரை எந்தவொரு அனுபவமும் இல்லாதவர்கள் நியமிக்கப்பட்டார்கள்.  ஆனால் நல்லவிஷயம் என்னவெனில் படத்தின் இசையமைப்பாளர், ஒளிப்பதிவாளர் உட்பட மற்ற டெக்னீஷியன்கள் அனைவருமே பல ஆண்டுகள் அனுபவம் வாய்ந்தவர்கள்.

இவ்வளவு நடந்தபின் படத்திற்கு பூஜைபோட்டு ஆரம்பிப்பார்கள் எனப்பார்த்தால் அதுதான் இல்லை. மீண்டும் மீண்டும் உள்ளுக்குள்ளே பல பூசல். திரைக்கதை ஆசிரியராக தனது நண்பர் க்றிஸ்டோபர் மொக்கொய்ரியை நியமிக்கவேண்டும் என சிங்கர் கேட்க, அது முடியாது என ஃபாக்ஸ் சொல்ல, பின் அடித்துப்பிடித்து அவரையும் உள்ளே இழுத்துவந்தார் சிங்கர். இப்படியாக பல சிக்கல்களுக்கு மத்தியில் திரைப்படத்தின் வேலைகள் துவங்க நடிகர் தேர்வு துவங்கியது. A BEUTYFULL MIND, L.A.CONFIDENTIAL போன்ற திரைப்படங்களின் நாயகன் ரசல் க்ரோவை சென்று பார்த்தார் சிங்கர். இவரை அணுகியதான் காரணம் வொல்வொரின் கேரக்டரில் நடிக்க. ஆனால் ரசல் க்ரோ கால்ஷிட் பிரச்சனையால் மறுத்தார்.  அந்த சமயத்தில் அவர் நடித்துக்கொண்டிருந்த திரைப்படம் ரிட்லி ஸ்காட்டின் க்ளாடியேட்டர். சரி என்று ஹூயு ஜாக்மேனிடம் வந்தார். எதோவொன்று மனதில் உதைக்க மீண்டும் வொல்வரின் கேரக்டருக்கு ஆல்தேடி கிளம்பினார் சிங்கர். இம்முறை அவர் அணுகியது டக்ரே ஸ்காட். அவரோ மிஷன் இம்பாஸிபிள் திரைப்படத்தின் இரண்டாம்பாகத்தில் வில்லனாக பிஸியாக இருக்க, வேறுவழியில்லாமல் ஹாலிவுட்டில் யாரென்றே தெரியாத ஜேக்மேனையே வொல்வரைனாக தேர்ந்தெடுத்தார். 

ஒருநிமிடம் அப்படியே 1998-ஐ விட்டுவிட்டு 2012-க்கு வாருங்கள். நோவா,  தி மேன் வித் ஐர்ன் பிஸ்ட்ஸ்,  ராபின் ஹுட், பாடி ஆஃப் லைஸ், எ ப்யூட்டிஃப்ல் மைன்ட் , தி கிளாடியேட்டர் L.A. CONFIDENTIAL  போன்று பல படங்களில் கலக்கிய ரசல் க்ரோ 2012-ல் LES MISERABLES எனும் திரைப்படத்தில் இரண்டாவது ஹீரோவாக நடித்தார். அப்போது முதல் மற்றும் முக்கியமான ஹீரோ யாரென்று கேட்கிறீர்களா? 1998-ல் ஹாலிவுட்டிற்கு யாரென்றே தெரியாத ஹூயூ ஜேக்மேன் தான் அது. 
இப்போது மீண்டும் 1998-ற்கே செல்லலாம்.  நடிகர் தேர்வில் மட்டுமல்லாமல் இசையமைப்பாளர் தேர்விலு பற்பல குழப்பங்கள் ஓடியது. சிங்கர் ஒருவரை நியமித்தால் ஃபாக்ஸ் நிறுவனம் நீ என்ன சொல்றது? நான் என்ன கேக்றது என்பதுபோல் வேறொருவரை நியமிக்க சொல்லி வற்புறுத்தும். சரி தயாரிப்பு நிறுவனம் சொல்வதையாவது கேட்போம் என்று சிங்கர் முடிவெடுத்தால், அந்த ஆள் அவைலபிளாக இருக்கமாட்டார். சரி நாம்  முதலில் பார்த்த ஆளையே நியமிப்போம் என்று அங்கு சென்றால் அவரும் பிஸியாகிவிடுவார். என்னடா இது என்று சிங்கர் வாழ்க்கையையே வெறுத்திருந்தாலும் ஆச்சரியப்படுவதற்கில்லை. எப்படியோ அடித்துப்பிடித்து ஷூட்டிங்கை நடத்தினால் கொடுத்த பட்ஜெட்டைத் தாண்டிப்போக ஆரம்பித்தது. 60 மில்லியனில் முடிக்கப்பட வேண்டிய திரைப்படம் 70 மில்லியனில் வந்து நின்றது. 

இன்னும் 5 மில்லியன் கொடுத்தா முடிச்சிடலாம் என சிங்கர் சொல்ல, அவரை ஏதோ சொத்தைப்பிரிக்க வந்த பங்காளியைப் போல் முறைத்தது ஃபாக்ஸ். நீ மட்டும்தான் எங்ககிட்ட இருக்க டைரக்டரா? ஸ்பில்பெர்க்க வச்சி மைனாரிட்டி ரிப்போர்ட் எடுத்துட்டு இருக்கோம். அதுக்கு செலவு பண்ணவா? இல்ல உனக்கு செலவு பண்ணவா? என டோஸ் விட வழக்கம்போல டாம் டீசான்டோ தலையிட்டு பேசி வாங்கி்க்கொடுக்க ஷூட்டிங்கை முடித்துவிட்டு ப்ரி-ப்ரொடக்சன் வேலையை ஆரம்பித்தார்.  சி.ஜி. செய்தபின் பார்த்த சிங்கருக்கு ஏமாற்றம் வர, வேறொருவரை வரவைத்து சி.ஜியை முடித்து வெளியிட்டார். ஃபாக்ஸின் நம்பிக்கை வீண்போகவில்லை. X-MEN ஃப்ரான்சீஸின் முதல் திரைப்படம் பெரும் வெற்றியடைந்ததோடு நல்ல பெயரையும் சம்பாதித்தது. அதுவரை காமிக்ஸ்களைத் தழுவி வெளிவந்த திரைப்படங்களுக்கு மத்தியில் X-MEN தனியாக ஒளிவிட்டது. 

இவ்வளவு பெரிதாக விக்கிபீடியாவை தமிழில் ட்ரான்ஸ்லேட் செய்து நான் கொடுக்கக் காரணம், இத்திரைப்படம் ஊத்திக்கொண்டிருந்தால் இன்று X-MEN ஃப்ரான்சீஸ் தொடர்ந்து இவ்வளவு தூரம் வந்திருக்குமா என்பது சந்தேகம்தான். இத்திரைப்படம் கொடுத்த தைரியத்தில் வதவதவென X-MEN சீரிஸை எடுக்க ஆரம்பித்தது ஃபாக்ஸ்; ஆனால் கவனமாக, மிக கவனமாக ஒவ்வொரு அடியையும் எடுத்துவைத்தது. ஒவ்வொரு திரைப்படத்தின் தரத்தையும் மெருகேற்றிக் கொண்டே வந்தது. அத்துடன் ஒவ்வொரு திரைப்படத்திலும் ஒரு கன்டினியூவிட்டியை முன்பே பிளான் செய்துவைத்தது என்றும் கூறலாம். ஆனால் இவ்வளவு கஷ்டப்பட்டு எடுக்கப்பட்ட ஃப்ரான்சீஸின் எட்டாவது திரைப்படமான (ஒன்பதுதான் ஆக்சுவல் கணக்கு. இந்த ஆண்டு சாதாரணமாக வெளியாகி அசாதரண வெற்றி பெற்ற டெட்பூலுடன் சேர்த்து ஒன்பது ) அபோகலிப்ஸ், ரசிகர்களின் எதிர்பார்ப்பை பூர்த்தி செய்ததா என்று பார்ப்போம்.

ட்ரைலரைப் பார்த்தவர்கள் அனைவருக்குமே தெரிந்திருக்கும். உலகின் முதல் மியூட்டன்டான அபோகலிப்ஸ், ஏறத்தாழ 5600 வருடங்களுக்குப்பின் மீண்டும் எழுந்து உலகை அழிக்க ஆரம்பிக்கிறது. அபோகலிப்ஸின் படைப்பிரிவில் 4 ஹார்ஸ்மேன் என்றழைக்கப்படும் நான்கு தளபதிகளாக மெக்னிட்டோ, ஸ்டோர்ம், ஸைலாக், ஏஞ்சல். அவர்களை எதிர்க்கும் ப்ரொபசர் சேவியரின் அணியில் ஸ்காட், ஜேன், க்யூக் சில்வர், மிஸ்டிக், நைட் க்ராலர், பீஸ்ட், ஹவாக் ஆகியோர் இடம்பெறுகின்றனர். நிற்க! இவர்களெல்லாம் யார் மற்றும் இந்த படத்துடன் தொடர்புடைய முந்தைய திரைப்படங்கள் எவை என்பதை முன்னமே கூறிவிடுகிறேன். தெரிந்துகொண்டு பார்க்கும்பட்சத்தில் படத்தில் இடம்பெறும் கேரக்டர்களின் பிண்ணனியை அறியலாம். X, X2, X3, FIRSTCLASS, ORIGINS WOLVARINE, DAYS OF FUTURE ஆகிய ஆறு திரைப்படங்களையும் கண்டிப்பாக பார்த்தாலொழிய இத்திரைப்படத்தின் பிண்ணனி குழப்புவதற்கான வாய்ப்புகள் அதிகம். எடுத்துக்காட்டாக மெக்னிட்டோவிற்கென்று ஒரு சின்ன ப்ளாஷ்பேக் வரும்போது FIRST CLASS பார்க்காதவர்களுக்கு புரிவது கடினம். சார்ல்ஸ் சேவியருக்கும் மெக்னிட்டோவுக்கும் ரேவனுக்கும் இடைப்பட்ட உறவினை விளக்க அத்திரைப்படம் உதவும். மேலும் இப்போதைய மெக்னிட்டோ எதற்காக தலைமறைவான வாழ்க்கை வாழ்கிறார் என்பதை அறிந்துகொள்ள DAYS OF FUTURE வும் உதவும். இடையே கெஸ்ட்டாக வரும் வொல்வரினுக்கும் ஸ்ட்ரைக்கருக்குமிடைப்பட்ட உறவை உணர DAYS OF FUTURE மற்றும் ORIGINS WOLVARINE தேவைப்படுகிறது. மயுராவிற்கும் சேவியருக்குமான உறவை அறிந்துகொள்ள FIRST CLASS தேவைப்படுகிறது. இப்போது மெயின் கதைக்கு வரலாம்.

கி.மு. 3600-ல் எகிப்தில் துவங்குகிறது திரைப்படம். என் சபா நர் என்றழைக்கப்படும் பவர்ஃபுல் மியூட்டன்ட் நமக்கு அறிமுகமாகிறான். அவனுடைய ஸ்பெசணல் என்னவென்றால் அவனால் கூடு விட்டு கூடு பாய முடியும். அவன் யாருடைய உடம்பில் புகுகிறானோ அவர்களுடைய சக்தியைஅப்படியே பெற்றுக்கொள்வான். எகிப்தில் வொல்வரின் போன்று குணமடையும் சக்தியை பெற்ற ஒரு மியூட்டன்ட் உடலில் புகுந்து கொள்ளும்போது அங்கிருக்கும் புரட்சியாளர்களால் நிரந்தர உறக்கமடைகிறார். அவரை மீண்டும் ஒருகட்டத்தில் உறக்கத்திலிருந்து விழித்தெழ வைக்கிறார்கள். விழித்தெழும் அபோகலிப்ஸ் சந்தையில் தன் சக்தியை பயன்படுத்தி திருடும் ஸ்டோர்மைக் கண்டறிந்து தன் அணியில் சேர்த்துக்கொள்கிறார். இவ்வாறே ஏஞ்சல், ஸைலாக் ஆகியோரை சேர்த்துக்கொள்ளும் அபோகலிப்ஸ் மெக்னிட்டோவிடம் வருகிறார். மெக்னிட்டோ DAYS OF FUTURE-ல் ஏற்படுத்திய விபத்துகளால் தலைமறைவாகி சாதாரண இல்லறவாழ்க்கை வாழ்கிறார். ஒருகட்டத்தில் அவர் யாரென்று அறியும் போலிஸ் அவரைச் சுற்றி வளைக்க அந்தநேரத்தில் தன் மனைவியையும் மகளையும் இழந்துவிடுகிறார். மீண்டும் மனிதர்களின் மீது பயங்கர கோவத்தில் இருக்கும் மெ்கனிட்டோ அபோகலிப்ஸ் உடன் சேர்ந்துகொள்கிறார். அபோகலிப்ஸ் தன்னுடைய அல்டிமேட் சக்தியைப் பயன்படுத்தி தன் அணியில் உள்ள நால்வரின் பவரையும் அதிகரிக்க வைக்கிறார். இதை எல்லாம் மிகமிக லேட்டாக ரேவன் மூலமும் மயுரா மூலமும் அறியும் சேவியர் அபோகலிப்ஸைத்தடுக்க முயற்சிக்கும்போது சேவியரைக் கடத்துகிறான் அபோகலிப்ஸ். சேவியரின் உடலில் கூடு விட்டு கூடு பாய முயற்சிக்கிறான் அபோகலிப்ஸ். இதை எல்லாம் மீதி உள்ள மியூட்டன்ட்கள் எப்படித் தடுத்தார்கள் என்பதே மீதிக்கதை.

முதலில் அபோகலிப்ஸைப் பற்றி அறியவேண்டுமெனில் அவன் ஒரு இம்மோர்ட்டல். அதாவது காமிக்ஸ்படி அழிவில்லாதவன். இன்னும் சொல்லப்போனால் க்ளாஸ்  மியூட்டன்ட் வகையைச் சார்ந்தவன். அவனால் அனைத்தையும் கன்ட்ரோல் செய்யமுடியும். நியாயப்படி அவனுக்கு டெலிபதி சக்தி உள்ளதாக காமிக்ஸ் சொல்கிறது. ஆனால் திரைப்படத்தில் டெலிபதி பவரை அடைய அவன் சேவியரை அணுகவேண்டியாக காட்டப்பட்டுள்ளது. அவன் ஒரு கடவுள் என விளம்பரப்படுத்தப்பட்டு கடைசியில் அவனுக்கும் அழிவு இருக்கிறது என்று காட்டியது அந்தர்பல்டி வகையறா. அவனால் டெலிபதியை எதிர்க்கமட்டுமே முடியும் என்று திரைப்படத்தில் காட்டப்பட்டுள்ளது. காமிக்ஸில் வரும் வெறித்தனமான அபோகலிப்ஸைக் காட்டிலும் திரைப்படத்தில் காட்டப்படும் அபோகலிப்ஸ் படு வீக்கானவன். இதற்கு முந்தைய பாகமான DAYS OF FUTURE-ல் வரும் சென்டினல்ஸ் ரோபாட்டை பார்க்கும்போது நமக்கே ஆச்சரியாகும். படுபயங்கர வில்லனாக முன்னிறுத்தப்பட்ட அபோகலிப்ஸ் சென்டினல்சை விட வீக்காக உருவாக்கப்பட்டிருக்கிறான். 

மெக்னிட்டோ – எப்பேர்பட்ட வில்லன். எக்ஸ் மேன் ப்ரான்சீஸில் வொல்வரினை விட மெக்னிட்டோவுக்கு ரசிகர்கள் அதிகம். அப்படிப்பட்ட வில்லனும் அபகலிப்ஸுடன் இணைந்து செய்வது படுசப்பை. இதைவிட அதிபயங்கரமான மெக்னிட்டோவை நாம் பார்த்துள்ளோம். ஏதோ செய்யப்போகிறார்கள் என்று ஆவலுடன் எதிர்பார்த்திருந்த நமக்கு மிஞ்சுவது ஏமாற்றமே. உலகின்  அணுஆயுதங்களையெல்லாம் அபோகலிப்ஸ் ஏவத்தொடங்கும்போது ஏற்படும் ஆச்சரியம் அவை விண்ணில் வீணாக வெடிக்கும்போது அப்படியே புஸ்ஸாகிறது. கடைசியில் எல்லா மியூட்டன்ட்களும் ஒன்றிணைந்து அபோகலிப்ஸை அழிக்க முயற்சிக்கும்போது ஜேன் மட்டுமே அவனை அழிக்கமுடியும் என்று சேவியர் நம்பியது சரியான முடிவெனினும் நம்மால்தான் ஏற்றுக்கொள்ள முடியவில்லை. வொல்வரின் ஒரே காட்சியில் வருகிறான். கடைசி பாகத்தில் ஸ்ட்ரைக்கரால் பிடிக்கப்பட்ட வொல்வரின்  வரும் காட்சியில் விசில் பறக்கிறது.
பொதுவாக X-MEN சீரிஸ்களைப் பொறுத்த வரைக்கும் திரைக்கதை செம பலமாக விறுவிறுப்பாக இருக்கும். ஆனால் இந்த திரைப்படத்தின் முதல் 1 மணிநேரம் வரை படுதொய்வாக செல்வது பெரும்பலவீனம். கடைசி 20 நிமிடமும் இடையில் குயிக் சில்வரின் காட்சியையும் தவிர சொல்லிக்கொள்ளும்படியான காட்சிகளும் இல்லை. இத்தனைக்கும் DAYS OF FUTURE-கு திரைக்கதை எழுதிய அதே சைமன் கின்பெர்க் தான் இப்படத்திற்கும் திரைக்கதை. எப்படி இதில் கோட்டைவிட்டார் என்றே தெரியவில்லை. முதல் படத்தில் முட்டிமோதி கஷ்டபட்டு எடுத்த ப்ரைன் சிங்கர் இந்த திரைப்படத்தில் ஏன் இந்த சொதப்பு சொதப்பினார் எனத் தெரியவில்லை. இத்தனைக்கும் X, X2, FIRST CLASS (CO - WRITTER), DAYS OF FUTURE என ப்ரைன் சிங்கரால் படைக்கப்பட்ட அத்தனை திரைப்படங்களும் அட்டகாசமானவை. ஆனால், இத்திரைப்படம் X-MEN தொடர்களில் விழுந்த ஒரு ப்ளாக் மார்க் என்றே கூறலாம். 

X-MEN ரசிகர்களுக்கு வேறு வழியில்லை. நாம் ரசிக்கும்படியான சில காட்சிகளுக்காக பார்க்கலாம். X-MEN பார்க்காதவர்கள், பெரிதும் அபிமானமில்லாதவர்கள் பார்த்தால் X-SERIES களின் மீதான எதிர்மறை எண்ணம் உருவாக வாய்ப்புள்ளது. வெறும் கிராபிக்ஸ் மற்றும் 3D பிரியர்கள்  சலுப்புக்கு பார்க்கலாம். X-MEN ப்ரான்சீஸைப் பொறுத்தவரை 3டி எபெக்ட் எப்போதும் பட்டாசாக இருக்கும் என்பதை இத்திரைப்படமும் நிருபித்துள்ளது. டெக்னிக்கலாக ஜெயித்து மெயின் மேட்டரில் ஊற்றிக்கொண்டது அபோகலிப்ஸ். இதுவரை வந்த X-சீரிஸ்களில் நான் மொக்கையென நினைப்பது THE WOLVARIE (2013) மட்டுமே. ஆனால் அந்த திரைப்படமும் நீட்டாக போகும். அதில் ஒரு அட்வெஞ்சர் ஃபில் இருக்கும். ஆனால் இப்போது அபகலிப்ஸ் தான் X-MEN சீரிஸில் படுதொம்மையான படமாக கருதுகிறேன்.